Башкириысь йӧскалык вожвылъяськонын вормиз удмурт кылбур

Удмурт Дунне
By Удмурт Дунне Март 2, 2018 15:20

Башкириын быдэс ар ӵоже кыстӥське «Мой язык — язык дружбы. Минең телем — дуҫлыҡ теле» акция. Вань мылкыд карисьёс, калык дӥсьсэс дӥсяса, калык гур чузъяськем улсын видеое кылбурзэс лыдӟо.

Тулыспалэ вормисе потӥзы Башкириысь Татышлы ёросысь удмурт историко-культурной центрлэн кивалтӥсез Ирина Самигулова Эмиль пиеныз.

Вожвылъяськонэ пыриськисьёс нырысь ик дасяло анай кыллы, вордскем шаерлы сӥзем кылбур, лыдӟо сое калык инструментсы чузъяськем улсын, видеое гожто но радъясьёслы ысто. Та ужъёс пото «Культурный мир Башкортостана» вотэсбаме, отчы пырыса, котькуд адями соосты учкыны быгатэ. Кыӵе видео тужгес трос адямиослы кельшоз, со ик вормоз.

Ирина Самигулова пиеныз акцилы пыр-поч дасяськизы. Выль Татышлы культурая юртысь крезьгурчи Александр Галиев крезен шудӥз, Ирина Муллаяновна Эмиль пиеныз удмурт дӥсьсэс дӥсязы но лыдӟизы анай кыллы сӥзем кылбур. Чуръёс огшорыесь ӧй вал, сое гожтӥз ачиз Ирина Самигулова — вормыны та эшшо но юрттоз шуыса, оскиз.

— Таяз толэзе милям видеомылы тужгес трос лайкъёс пуктозы шуыса оскон вал, — вера Ирина Самигулова. — Пие соку ик шуиз: ми вормом, анай! Шумпотӥсько, удмуртъёс Башкириын но вань, уло, ужало, ас культуразэс утё но азинто шуыса. Милемыз учкыса, Башкириысь трос пӧртэм калыкъёс удмуртъёсын тодматскизы, лякыт, чебер но шуныт удмурт кылмес кылзӥзы…

Башкириын, Удмуртиын кадь ик, уно калыкъёс уло — ог 160 мында. Тросэз та акцие пыриськозы. Нош ар пумын йылпумъянъёс лэсьтэмын луозы, вормисьёсты, огазе люкаса, данъялозы.

— Туж кулэ акция, ас кылдэ, калыкдэ яратон, данъяськон мылкыд сюлмын бугырске, — вера Ирина Муллаяновна. — Туж зол сюлмаськи, ку акциез усьтон нуналэ Башкириысь кун филармониын мукет калыкъёс пӧлын удмурт кылын гожтэм кылбурме лыдӟыкум…

Вераны кулэ, Башкириысь Татышлы ёросысь удмурт историко-культурной центр мылысь-кыдысь пыриське вань ужрадъёсы. Алигес Уфаын ортчиз калыкъёслэн «Вместе» фестивальзы. Отын центр удмурт культураез возьматӥз.

Туспуктэм но видео: vk.com (Ирина Самигулова)

Удмурт Дунне
By Удмурт Дунне Март 2, 2018 15:20