Зинаида Рябинина: Малы мукет изданиослэн подписчикъёссы уг куашето?

Удмурт Дунне
By Удмурт Дунне Февраль 9, 2018 11:55

Зинаида Рябинина: Малы мукет изданиослэн подписчикъёссы уг куашето?

Бадӟым ужрад ортчытэммы бере таяз арняе майбырак ужалом ни малпасько вал. Но ми понна со кутскиз дурыен тэкит омыръянэн…

Йылтэм-пумтэм жингыръяны-гожъяны кутскизы ӝожомем подписчикъёсмы — 1-тӥ феврале потэм номер соос доры та дырозь ӧвӧл вуэм! Почтаын, пе, шуо — редакция ӧз келя. Югдурез эскерыса, тодмо луиз: почта удысысь кыӵе ке ёзлэн ӝегаменыз йырин кылем арняе газет быдэс республикае вуымтэ. Со пумысен Почталэн управлениезлэн кивалтӥсезлы Претензия ыстэмын, кинлы «Удмурт дунне» озьы но ӧз вуы, куриськом эшшо огпол ивортыны.

Туж оскиськом, югдур тупатскоз шуыса. Но мынам эшшо огпол валэктэме потэ: редакция газет потон дырез воштэ яке праздникъёсын валче уг поты ке — со сярысь тӥледлы азьло ик ивортэ. 1-тӥ феврале потоно номерез ми печате сётӥм 31-тӥ январе 18 часын ӝыт. Сое лыдӟисьёс доры вуттон понна сюлмаськыны кулэ почта! Со понна со подписчикъёслэсь но, редакцилэсь но суменак коньдон басьтэ! (Газетэз  лыдӟись доры вуттон понна кыл кутӥсьёсты мед тододы шуыса, юромо суред дасям, учкелэ артысь материалэз).

Но вань та учырын пичияк шумпотонэз но. Юасько газет келян пунктысь: милесьтым газетмес гинэ-а, мар-а висъяса кельтӥды, малы мукет изданиослэн подписчикъёссы уг куашето? «Удмурт дуннелы» мында одӥг изданилы но уг гожтӥсько, валэктэ сортировка понна кыл кутӥсь. Иське, тӥледыз укыр ярато, соин ик возьмало…

Удмурт Дунне
By Удмурт Дунне Февраль 9, 2018 11:55