Журналистъёслэн спартакиадаязы «Удмурт дунне» газет нырысетӥ интыын мынэ

Удмурт Дунне
By Удмурт Дунне Февраль 7, 2018 13:50

Сьӧлта ёросысь Югдон гуртэ люкаськылӥзы шаерысьтымы журналистъёс но. 5-тӥ спартакиадамы кутскиз куасэн бызьылонъя ӵошатскон бордысен.

Максим Егоров

Нылкышноос пӧлын, ваньзэсты азьпалтыса, бызе Ангелина Снигирёва («Удмурт дунне»)

Спортъя вожвылъяськонэ шаерысьтымы, Печатья но ивор вӧлмытонъя агентствоын, 18 газет-журналъёсын ужасьёс пыриськизы: 18 воргоронъёс но 39 нылкышноос. Нылкышноос 1 иськеме бызизы, воргоронъёс — 2 иськеме. Гурезё куас сюрес тросэзлэсь кужымзэс быдтӥз, люкетӥз на лек тӧл. Арлыдэз лыдэ басьтыса, вормисьёс луизы: Валентина Емельянова («Удмурт дунне»), Людмила Сурчакова («Алнаш колхозник»), Ангелина Снигирёва («Удмурт дунне»), Роман Полянкин ( «Авангард», Вавож), Сергей Антонов («Увинская газета») но Денис Корнилов («Удмурт дунне»). Огъя зачётын вормисе потӥзы «Удмурт дунне», «Алнаш колхозник» (Алнаш) но «Авангард» (Вавож) газетъёс.

Ӵошатскон йылпумъяськем бере вань журналистъёс ёросэн тодматскизы. Нырысь ик администрацие пыразы, Сьӧлта ёрослэн йырыз Василий Протопопов пресс-конференция сётӥз, нош собере Копки черкогуртэ интыяськем питомнике вуылӥзы, пуныосын но пӧйшуръёсын тодматскизы.

Валентина Емельянова

Туспуктӥз Максим Егоров

Удмурт Дунне
By Удмурт Дунне Февраль 7, 2018 13:50