Улон инты — син азьын

Удмурт Дунне
By Удмурт Дунне Февраль 1, 2018 08:16

Удмуртиын кылем арняе ужаз Россиысь Президентлэн Приволжск федерал округъя оскем муртэз Михаил Бабич. Со кивалтэм улсын ортчиз лэсьтӥськон, ЖКХ удысъёсысь ужпумъёс сярысь кенешон.

М. Бабич но А. Бречалов пыразы Ижысь Удмуртской ульчаысь 261 номеро юртэ.

261 номеро юрт

Нырысь ик М. Бабич вуылӥз Ижысь Удмуртской ульчаысь 261 номеро юртэ, кылем арын ноябрь толэзе отын пуштон учыр луиз вал. Удмуртилэн Тӧроеныз Александр Бречаловен валче эскеризы, кыӵе ужъёс быдэстэмын коркан. Туннэ нуналлы 1-тӥ-3-тӥ подъездъёсысь адямиос квартираосазы берыктӥськизы ни. Али эскеронъёс ортчо на 4-тӥ-6-тӥ подъездъёсын.

М. Бабич тау кариз элькун кивалтӥсьёслы, спасательёслы кышкыт югдурез ӝог тупатэмзы но секыт учыре сюрем адямиослы юрттэт сётэмзы понна. Ваньзэ, мае лэсьтыны луэ вал, лэсьтэмын, пусйиз со.

А. Бречалов тау шуиз федерал кивалтӥсьёслы. Соос нырысетӥ нуналъёсысен секыт югдурез син азязы возизы, коркан эскеронъёс ортчытыны юрттӥзы, вераз со.

Али Удмуртиысь кивал-тӥсьёс коркась улӥсьёслэсь вань сюлмаськонъёссэс син азязы возё. Лэчыт ужпум кылемын 5-тӥ куашкам подъездысь адямиослы улон сэрег сётон пумысен. Кызьы оскытӥз А. Бречалов, отысь адямиослы квартираос сётъяны кутскозы ни 1-тӥ мартысен.

 

Калыклы юрттоно

Кылем арын Удмуртиын пуктэмын но вузамын 657 сюрс квадрат метр улон инты, со, 2016-тӥ арын сярысь, 1,1 процентлы уногес. Корка ӝутон ласянь Удмуртиын югдур урод ӧвӧл, шуиз М. Бабич. Удмуртиын квартираос дунтэмесьгес, кӧня ар ӵоже ини соослэн дунзы одӥг кадь возиське. Огъя учконо ке, асьме дорын ипотека басьтӥсьёс но уноязы. Кылем арын 15 сюрс пала адями улон сэрег басьтыны пунэмаськиз, валля арен ӵошатыса, со 20 процентлы тросгес. Но берло дыре улон инты басьтӥсьёслэн лыдзы ичияз, со застройщикъёслы шуг-секытъёс кылдытэ. Соин бадӟым уж нуоно адямиослэсь квартира, ипотека басьтыны луонлыксэс будэтон понна.

Кенешон дыръя озьы ик М. Бабич бадӟым саклык висъяз куашкан калэ вуэм юртъёсысь адямиосты выль улон сэреге выжтон программалэн быдэсъяськемезлы. Со улосъёсы вуиз Россилэн Президентэзлэн В. Путинлэн кичӧлтэмезъя. Озьы Удмуртиын 2013-тӥ-2017-тӥ аръёсы 648 шальтрам юртъёсысь 8 сюрс 500 пала адями корка пырон ортчытӥз. Солы быдтэмын ог 3 миллиард 100 миллион манет. Но эшшо вуж 35 коркась 131 адями улон сэрегтэк кылемын, соос судэ вазиськемын, выль сётэм квартираос улыны уг ярало шуыса. Та ужез матысь дыре сэрттыны куриз М. Бабич. Кызьы пусйиз А. Бречалов, Удмуртиын эшшо 700 пала куашкан калэ вуэм коркаос. Соин элькун азьын бадӟым ужпум: ужез ӟеч радъяны но тросгес адямиосты выль квартираосын шумпоттыны.

Удмуртилэсь эшшо 2 бадӟым пӧськызэ йӧтылӥз М. Бабич: трос нылпиё семьяослы музъем висъян но сирота нылпиослы улон инты сётон. Удмуртиын трос нылпиё семьяос 20 сюрслэсь уно. Соос пӧлысь 5 сюрсэз, музъем висъяны курыса, вазиськон гожтӥзы. Зэм, куронзэ быдэстыны пӧрмиз ог 2 сюрс 700 семьялэсь гинэ.

Секыт югдур кылдэмын сирота нылпиослы улон сэрег висъянын но. Та вакытэ 3 сюрс 700 нылпи улон интылы кулэяськемез сярысь вераз, соос пӧлысь 2 сюрс 700 палаез 18 арессэ тырмытэмын ни. Кылем арын улон сэрег сётэмын 186 пиналлы гинэ. Трос нылпиё семьяосын но сирота нылпиосын ӟечгес ужано, шуиз Президентлэн оскем муртэз.

— Та дэмланъёсты шонересь, — вазиськиз А. Бречалов М. Бабичлы. — Трос нылпиё семьяосты, сирота нылпиосты сюлмаськытыны ӧвӧл кулэ, шаерамы коньдонэн шугъяськонъёс вань шуыса. Ми адямиослэн улонзы понна кыл кутӥськом бере, тыршомы югдурез воштыны. Али со понна бадӟым уж нуиське.

Ангелина Снигирёва

Туспуктэм: udmurt.ru

Удмурт Дунне
By Удмурт Дунне Февраль 1, 2018 08:16