Улон инты борды ӝутӥськозы нылпи садъёс

Удмурт Дунне
By Удмурт Дунне Февраль 2, 2018 09:30

Россиысь Президентлэн Приволжск федерал округъя оскем муртэныз Михаил Бабичен ӵош 26-тӥ январе элькунамы вуылӥз лэсьтӥськонъя но ЖКХ-я министрлэн воштӥсез Никита Стасишин. Пырак аэропортысен со Ижысь лэсьтӥськон интыосы мынӥз.

Н. Стасишин (бурысез) эскериз, кызьы Ижын мынэ лэсьтӥськон.

Луоз школа но

Ижысь Архитектор Берш урамысь выль пуктӥськись нылпи садлэн адресэз туннэ ӧвӧл на. Отын лӧсъяське выль буям зын. Москваысь куно вуон азьын садлэн азбарысьтыз чырмыт поттало лымыез. Никита Стасишин утялтэм азбарез синйылтӥз-а, ӧз-а — син шораз соку ик йӧтӥз, нылпи сад 3 этажъем шуыса.

— Нылпи садлы, оло, 2 этажен гинэ но тырмысал, анай-атайёс уз курадӟе-а? — юаз со.

— Та проектэз ми 2012-тӥ арысен кутӥськом ни, — валэктӥз элькунысьтымы лэсьтӥськонъя, архитектурая, ЖКХ-я но энергетикая министр Иван Ястреб. — Уг ӝожтӥсько анай-атайёс но, кельше со воспитательёслы но. Угось со понна шудон, кӧлон интыос вӧл-вӧлэсь…

Куно ваньзэ тае ас синмыныз адӟоно кариськиз, возьматыны куриз на сиён пӧран интыез… Соглаш кариськиз: со туала куронъёслы тупа.

— Одӥг интылэн кӧня дуныз? — эшшо одӥг юан сётэ Н. Стасишин.

— 800 сюрс манет, — валэктэ асьме министр.

— Нош ку усьтыны чакласькоды?

— Кылемын на благоустройствоя ужъёс, куазь чеберскиз ке, азбарез сузяны-шулдыртыны кутском.

— Эн ӝегалэ…

Озьы валамон луиз: 220 интылы чаклам нылпи сад матысь дыре усьтӥськыны кулэ. Сое ӝутыны элькун бюджетысь ог 55 миллион манет висъямын вал, со сяна, коньдон «Улон инты» программа чотын вуиз Россилэн казнаысьтыз — 129 миллион манет пала.

Зэм, «Улон инты» программа туэысен йылпумъяськиз. Но со интые кылдӥзы выльёсыз. Одӥгез соос пӧлысь — «Ипотека но арендной улон инты» проект. Никита Стасишин вераз:

— Та проект Удмуртиын одно пыӵатӥськыны кулэ! Макем тросгес выль юртъёс пуктоды, сокем тросгес уксё вуоз выль кылдӥсь микрорайонъёсын нылпи садъёс, школаос, спортъя комплексъёс пуктонлы.

Ижын туннэ нуналлы туж паськыт лэсьтӥськон мынэ Устинов ёросысь 7-тӥ но 8-тӥ микрорайонъёсын — ӵапак Архитектор Берш урам бордын. Лэсьтӥськонлы оглом 57 гектар музъем чакламын. Матысь дыре отын 23 улон юртъёс ӝутӥськыны кулэ, лапегъёсыз — 5 этажъемесь, ӝужытъёсыз — 16-17 этажъемесь.

Кызьы вераз лэсьтӥсь-конъя, архитектурая, ЖКХ-я но энергетикая министр И. Ястреб, улон интыосын ӵош кылдозы нылпи садъёс, вуз каронниос, больницаос, спортзалъёс, черк. Нош 1 сюрс 224 интыем школа пуктонлы куриськон келямын ни Москвае. Али солэн проектэз дасяське. Дуныз 905 миллион манет пала луоз (кылем арын дунъёсъя).

Корка пырон лэсьтозы

Дэри ёросысь Хохрякиын 4-тӥ арзэ сылэ йылаз-пумаз вуттымтэ «Родниковый край» улон комплекс. Отчы улон инты басьтэмъёслэн осконзы кылдӥз: туэ ар пумозь корка пыронъёс лэсьтозы.

2014-тӥ арын та комплексын лэсьтӥськон ужъёс моганы ӧдъязы. Отчы квартира басьтэмъёсты застройщик коньдонтэк но, липеттэк но кельтӥз. Йылаз-пумаз вуттымтэ 4 коркаосын 192 квартира луыны кулэ вал. Пӧям дольщикъёс трос пол пикетъёсы потазы, вазиськылӥзы кун ёзъёсы. Озьы ӝыныё ӝутэм 3 этажъем коркаос зор-котэз но, лымы пельтонъёсты но чидазы ни.

Лэсьтӥськон ужъёс выльысь мытэмын ог 4 толэзь талэсь азьло. Выль застройщик али липет лэсьтэ, укно пуктылэ.

Кызьы та комплексын ужъёс мыно — чакласа возе Россиысь лэсьтӥськон удыс понна кыл кутӥсь министерство но. Соин ик Никита Стасишин югдурез умой тодэ.

— Татын улон инты басьтэм одӥг муртлэн но правоосыз тӥямын уз луэ, — шуиз со. — Азьвыл застройщик банкротэн ялэмын вал. Солэсь кышканэз ӧвӧл — документъёсын тыро-пыдо пусъемын дольщикъёслэн нимтулъёссы, кӧня коньдон тыремзы. Соослэн квартираоссы мукет муртъёслы нокызьы вузамын луыны уз быгатэ.

Бен, та комплексъя шугъяськонъёс трос. Но кызьы вераз Иван Ястреб, соос вормонтэмесь ӧвӧл. Та вакытлы уката бадӟым юан: кытысь татчы ву кысконо, кытчы ӧръяно канализациез.

— Луоз-а гумыосты Хохрякиысь кыскыны — нырысь ик эскеронъёс ортчытоно, но со понна куазь -10 градуслэсь кезьыт медаз луы. Малпаськом, 1-тӥ мартозь та ужез быдэстом, — шуизы лэсьтӥськисьёс.

Выль пуктӥськись коркаосты огъя сете огазеяны ӧз пӧрмы ке, вань, пе, мукетыз амал: нимаз скважина лэсьтоно. Озьы-а, тазьы-а, но ужъёсты ар пумозь йылпумъяно.

«Родниковый край» комплексэз йылаз-пумаз вуттыны соглаш кариськемез понна выль застройщиклы элькун кивалтэт дунтэк музъем сӥзиз. Та амал али паськыт кутӥське пӧям дольщикъёслы юрттон вылысь.

Элина Кумачёва

Туспуктэм: udmurt.ru

Удмурт Дунне
By Удмурт Дунне Февраль 2, 2018 09:30