Удмуртиысь военной комиссар Александр Комлев: Кужмо кунэз дорзэс яратӥсь адямиос кылдыто

Удмурт Дунне
By Удмурт Дунне Февраль 28, 2018 15:35

Александр Комлев.

Визьмо, кышкасьтэм, кужмо воргоронъёс вӧзын ӵуказе нуналлы оскон юнма. Соос бордын шуныт но гань-гань. Атыкай музъемзэс яратӥсь, ӟеч, кышкасьтэм пиосъёсты будэтон сярысь вераськиськом Удмуртиысь военной комиссарен, запасысь полковникен Александр Комлевен.

— Александр Георгиевич, тӥ военной семьяын вордӥськымтэ. Озьы ке но быдэс улондэс сӥзиды армилы, военной службалы.

— Мон вордӥськи огшоры семьяын. Атае быдэс улонзэ ТЭЦ-ын ужаз, анае бухгалтер вал. Пичи дыръям йырам ӧз но чилектылы военной луон сярысь. Военной училищее дышетскыны пырон сярысь малпан шӧдтэк шорысь 3 нунал куспын лыктӥз. Мон школаме Барнаулын йылпумъяй, нош артысь Кемеровоын, кытын вордӥськи, военной училище вал. Анай-атае та удысэз быръемелы пумит ӧз кариське, валазы: военной училищеысь курсант дышетӥсьёслэн син азязы, дӥсямын, сюдэмын, тӧлэз ӵыжаса, ульча кузя уз ветлы.

— Нош Удмуртие кызьы сюриды?

— Кемеровоысь училище бере распределениея сюри кунгож сьӧры — Германие. Отчы кыльыны но ӵектӥзы вал, но семьяеным кенешим, Россие берытскыса ик умойгес луоз шуыса. Нырысь службаме нуи Оренбург улосысь Тоцкое черкогуртын. Со вакытэ, 1990-тӥ аръёсы, армия, быдэс кунмы сямен ик, секыт югдуре шедемын вал. Шуг-секытъёс шоры учкытэк, быгатӥ пырыны Москваысь общевойсковой академие. Сое йылпумъяме бере келязы Башкирие. Отысен улон сюрес монэ тодмотэм Удмуртие вуттӥз. Ужаны пыри Удмуртиысь военкоматэ. Озьы та удысын пӧртэм ёзъёсын, должностьёсын 2000-тӥ арысен тыршисько ни. Нош 2007-тӥ арын монэ пуктӥзы военной комиссаре.

Быгатонлыкез волятоно ялан.

— Военной комиссариат арлы 2 пол — тулыс но сӥзьыл — пияшъёсты армие келянэн выре. Мукет дыръя кыӵе ужен выриськоды?

— Зэм но, валтӥсь ужпуммы — 18 арессэс тырмытэм егит пияшъёсты военной службалы дасян, кутон, контрактъя мынӥсьёсын ужан. Озьы ик ми вылын, ожмаськон кутскиз ке, шаерысьтымы вань пыӵал возьыны быгатӥсьёс пӧлын мобилизация ортчытон. Та сяна, ми военной пенсионеръёслы пенсия тыронэн выриськомы на. Бадӟым уж нуиськомы егитъёс пӧлын, соослы Атыкай музъемез яратон мылкыд пыӵатон сярысь сюлмаськиськом, ужаськомы юнармиен, кадетъёсын. Та ужез берыктыны милемлы юртто «Инвалиды войны», «Боевое братство» но мукет ветеран огазеяськонъёс.

— Ӵемысь вераськиськом патриотизм, Атыкай музъемез яратон сярысь. Та ужлэн кулэлыкез зэм ик трос-а?

— Та пумысен военкоматлэн ужез шоры учконо ке, со кадет классъёсын кусып тупатон гинэ ӧвӧл. Со трос пумо ужрадъёс ортчытъян, кытчы пырисько нылпиос но соослэн анай-атайёссы, дышетӥсьёс, военной комиссариатъёс, ДОСААФ система.

Улонын буш интыос ӧвӧл ук: отчы умойзэ уд выжыятӥськы ке, соку ик уродэз пушъе. Асьмеос егитъёсты вордскем музъеммес, кунмес яратыны ӧм дышетэ ке, со борды мукетъёсыз басьтӥськозы. Туж умой, адями вань сюлмыныз анай-атайзэ, вордӥськем дорзэ, кунзэ яратэ ке. Умоен уг лыдъяськы, куке вылӥ кивалтӥсьёслэн нылпиоссы кунгож сьӧрын уло. Со чебер ӧвӧл кадь. Угось ӵапак бадӟым кивалтӥсьёслы, нырысь ик асьсэ улонэнызы, будӥсь нылпиослы шонер улон сюрес возьматоно. Кужмо кун нырысь ик дорзэс яратӥсь кужмо адямиос бордысь кылдэ.

Патриотической ужрад дыръя: калыклы — праздник, ожгарчилы — уж.

— Школаосын кадет классъёс кылдыло, военнойлэсь сюрессэ бырйисьёс арысь аре тросгес луо. Со вакытэ ик ичи ӧвӧл сурон сапег кутчанлэсь пегасьёс но.

— Зэм, военнойлэн удысэз берло дыре троссэ егитъёсты гочатэ. Со бадӟым уждунэн, военнойёслы улон инты сётъямен гинэ герӟаськемын ӧвӧл. Тросаз школаосын кадет классъёс вань ини, отысь нылпиос пичиысен асьсэдыз Атыкай музъемез утисьёсын адӟо. Соос озьы ик сюлэмзы куремъя военнойлэсь профессизэ быръё, кызьы мукетъёсызлэн дышетӥсь, врач, адвокат луэмзы потэ.

Армие мыныны пумит луон сярысь ке… Уноезлэн пияшъёслэн сурон сапеглэсь, военной формалэсь пеган мылкыдзы асьсэлэн ӧвӧл — анай-атайлэсь выжем малпанъёс озьы кузёясько. Угось ӵемгес ӵапак мумы-бубыос пиналзэс армие келяны кышкало. Мон малпамъя, сыӵе мылкыдъёс калыкын 1990-тӥ аръёсы кылдӥзы. Соку быдэс Россиын, армиын сямен ик, секыт аръёс вал. Нош али армие мыныны ӵапак вуэмын со вакытъёсы вордӥськем пиналъёс. Туннэ тросэз шугъяськонъёсмы со вакытысь пото, кылсярысь, патриотической воспитанилэн тырмымтэосыз. Туала армия чылкак мукет ни.

Собере, государство ваньзэс эшелонъёсын кунгожъёсты утьыны уг келя ук — кунмы пияшлы дышетскыны, тазалыксэ тупатыны, висись мумы-бубыоссэ утялтыны луонлыкъёс сётэ. Нош мугъёстэк армилэсь пеган — со законэз тӥян, сыӵеос кыл кутон улэ кыскемын луыны кулэ.

Собере, валаны кулэ, вордскем шаерез утён — со одно ик границаос дорын пыӵалэн сылон ӧвӧл, со паськытгес, бадӟымгес валан. Мон малпамъя, али асьме спортсменъёсмы олимпийской медальёс утыло, соос но Атыкай музъемзэс утё. Асьме специалистъёсмы быдэс Европаетӥ газ кыско, кунмылы пайда потто — соос но утисьёсмы. Удмуртиысь гурт удысын ужасьёс йӧл кыскемзыя быдэс Россиын 3-тӥ инты басьтӥзы. Соос шат ӧвӧл асьме утисьёсмы? Котькудмы бадӟым музъеммес утён вылысь пичи ке но уж быдэстӥськомы. Юнме шорысь уг сётъяло Россиысь но Ужысь Герой нимъёс. Уж — туж бадӟым, секыт ныпъет.

Оборона удысысь ветеранъёссэс син азязы возё.

Зэм, солдат кышкыт югдуре ӵемгес учыраны быгатэ. Но со понна государство солы трос сётэ. Учке, кыӵе умой условиосын службазэс ортчыто туала ожгарчиос, кыӵе ӟеч техника армиын. Государство трос сюлмаське военнойлэсь улонзэ ӟечомытон сярысь. Призывной пунктэ вуэм егитъёс шуныт, чылкыт дӥсь басьто, ӟеч сисько. Асьме сухпаёкмы быдэс дуннеын тужгес ӟечен лыдъяське. Улӟытэмын спортивной ротаос, отын егитъёс асьсэлэсь быгатонлыксэс волятыны быгато. Али егитъёс мыло-кыдо мыно научной ротаосы. Кылем сӥзьыл гинэ та удысъя службазэ нуыны кошкиз 12 пияш. Тросэз, армилэсь азинскемзэ адӟыса, службазэс контрактъя азинто.

— Туала армиез курортэн ӵошатыло ни. Зэм но, туала солдатлы, азьвыл сярысь, тросгес эрик сётӥське кадь. Озьы пияшлэсь солдат пӧрмытыны луэ шат?

— Али солдатъёслэн нуназе куазен изён дырзы но вань! Нош серекъятэк ке, туала армиын служба ӟеч радъямын, вакчи дыр куспын пияш басьтэ специальность но дась луэ пӧртэм ужпумъёсты быдэсъяны. Егит мурт басьтэ тактикая, ожез нуонъя тодон-валанъёс, строен ветлыны дышетске. Вань солдатъёслы ыбылӥськонъя норма сётэмын, берло дыре солы висъяськись патронъёс 2-3 поллы гинэ ӧвӧл, трослы будэтэмын. Меӵак вераса, азьвыл 2 ар куспын солдат 2-3 пол пыӵалэн ыбылӥськиз, мукет дыръя казармаын чыры-пыры ужъёсты быдэсъяса улӥз. Али пияш солдатлэсь улонзэ котыр ласянь шӧмъя.

— Озьыен, 1 ар тырме зэмос солдатэз будэтон понна?

— Та юан пумысен али но трос споръяськонъёс мыно. Но ми валаськомы: туала егитъёс азинскемзыя, тодон-валанъёссыя быдэс йырлы вылӥын 10 ар талэсь азьло службазэс нуэм адямиослэсь. Туалаосыз трос ивор басьто Интернетысь, котырысьтызы адямиослэсь. Егитъёсмы валасагес быръё ини военной профессиосты. Куд-огез, 1 арлы армие мынытэк, 2 арлы контракт гожто но ӟеч уждун басьто. Зэм, отчы куто профессия басьтэмъёссэ гинэ.

Службаез одӥг ар карыса, государствомы, мон малпамъя, лыдъя: егит мурт армия сярысь нырысетӥ тодон-валан басьтӥз ни, пӧртэм патриотической ужрадъёсы пыриськыса, школаын ОБЖ урокъёс дыръя.

Вуоно солдатъёсын пумиськон.

— Берло кӧня ке аръёсты учконо ке, армие кошкем пияшъёслэн лыдзы ичигес луэ. Маин со герӟаськемын?

— Шонер, срочной службае кошкемъёслэн лыдзы пумен ичия. Кылем сӥзьыл сурон сапег дӥсяз 1 сюрс 400 адями, солэсь азьвыл та лыдпус 1 сюрс 500 пала вал. Государство туала армиез тырмытэ контрактникъёсын. Соос арысь аре тросгес луо.

Кин ке шуоз, оло, армиез быдэсак контрактникъёс чотын гинэ возёно. Но мон малпасько, государство та ныпъетэз вормыны узгес быгаты на, угось армия возьыны туж трос коньдон кошке. Эшшо ке, ваньмыз тазалыксыя тупась пияшъёс армиын каданы кулэ.

— Али чылкак таза адямиос ӧвӧл ни, шуо. Секытгес ик йӧтэ, дыр, призывникъёс ласянь пуктэм планэз быдэстыны?

— Удмуртия — аспӧртэмлыко улос. Асьме дорын малы ке, огъя Россиез учконо ке, тазалыксыя армие мыныны тупась пияшъёс 9-10 процентлы ӧжытгес. Шуом, кунамы 78 процентэз егитъёс служба ортчыны тупало, нош Удмуртиын та лыдпус кема аръёс ӵоже 65-68 процент вылын возиське. Соин ик Удмуртиысь Тазалыкез утёнъя министерствоен валче призывникъёсъя планэз секытэн быдэстӥськом.

9-тӥ Май парад дыръя.

— Армилэсь пеганы мылкыд карисьёс пӧлын кузьмаськисьёс но планэз быдэстыны люкето, дыр?

— Кузьмаськонэн нюръяськон — военкоматъёслэн ужпумзы ӧвӧл. Но ог 5 ар талэсь азьло, зэм, вал сыӵе учыр военкоматын ужась враченымы. Со армилэсь пегась пияшъёс чотын узырмыны малпам. Но кырсь ужез шараяськиз, со кыл кутон улэ кыскемын. Кузьмаськонъёсын герӟаськем учыръёсты алон вылысь вазиськыны кулэ Югдурез утёнъя министерствое но военной прокуратурае.

— Та арня пумын воргоронъёс Атыкай музъемез утисьёслэсь нуналзэс пусъё. Тӥ понна кыӵе со праздник? Кызьы пумиталоды асьтэ пӧлады?

— Малпасько, 23-тӥ февраль — погон нуллӥсь ваньмыз адямиос понна бадӟым праздник. Мон понна но со данъяськон нунал. Туэ 100 ар тырме Советской армилэн кылдэм дырысеныз. Ми сое быдэс Россиен пумиталом. 100 ар куспын кыӵе зол воштӥськиз асьме армимы. Али отын ӟеч военной техника, со Сириын пуромем ожмаськонэз дугдытыны юрттӥз, кӧня адямиослэн улонзы утемын. Удмуртиын поттэм ож тӥрлыкез Россиын гинэ уг, кунгож сьӧрын но кулэ каро, дунъяло. Кӧня ке ар талэсь азьло военной удысын беспилотникъёс чиньыен лыдъямон вал, нош али соос троссэ секыт ужпумъёсты быдэстыны юртто.

23-тӥ февралез пусъён чотын ортчытомы пӧртэм ужрадъёс, отчы ӧтёмы но ӟечкылаломы оборона удысысь адӟем карымон муртъёсты, ветеранъёсты. Трос ужрадъёс чакламын пиналъёслы.

Александр Комлев: Армия нырысь ик монэ дышетӥз сётэм кылдэ пумозяз вуттыны, тыныд оскем ужез ӟеч быдэстыны, ваньмон дырез дунъяны.

— Патриотизм пичиысен кутске: анай-атайдэ яратон, дор палъёстэ гажан бордысен. Нош тӥ ошмесо шаере лыктэмды дырысен вуиды-а яратыса Удмуртиез?

— Мон вордӥськи Кузбассын, отын одӥг кадь фамилиен адямиосты туж шер пумиталод. Удмуртие лыктыса, туж пайми: татын сомында Комлевъёс вылӥллям. Соин ошмесо шаер мон понна кыӵе ке мурт инты ноку ӧз потылы. Пӧяськысал, дыр, шуысал ке: Удмуртиез яратӥ, татын вордӥськем но будэм мурт сямен. Но мон татын улӥсько ини сомында ар, кӧня мукет интыын ноку ӧй улылы. Мон туж гажасько республикамес, татын улӥсь ужез яратӥсь адямиосты, мыным туж кельше Ижкармы, сюлэмме нырысетӥ нуналъёсысен басьтӥз татысь кылын вераны луонтэм чебер инкуазь.

— Тӥ 30 арлэсь кема ини ужаськоды оборона удысын. Марлы тӥледыз дышетӥз армия, военной улон?

— Армия нырысь ик монэ дышетӥз сётэм кылдэ пумозяз вуттыны, тыныд оскем ужез ӟеч быдэстыны, ваньмон дырез дунъяны.

— Вералэ семьяды сярысь. Нылпиосты асьтэ удыстыя вамыштӥзы-а? Маин яратӥськоды вырыны ваньмон дыръя?

— Семьяе туж огшоры, инмысь кизилиосты кутыны ноку ӧм тыршылэ. Кузпалэным будэтӥмы 2 пиосмес. Бадӟымезлы тазалыкезъя армие ветлыны ӧз кылды, али тырше аслэсьтыз бизнессэ азинтыны. Покчиез пимы сурон сапег мерталляз. Али Удмуртиысь Кыл кутытонъя управлениын службазэ нуэ. Кузпалыным ум ӵыдӥське внукмылэсь но внучкамылэсь.

Ваньмон дыръямы туж яратӥськомы Удмуртиез котыръяны. Туж кельше Кам шурмы. Со гань-гань луэменыз, син сузёнтэм ӧръяськеменыз кужым сётэ.

Ангелина Снигирёва

Туспуктэмъёсыз геройлэн

Удмурт Дунне
By Удмурт Дунне Февраль 28, 2018 15:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*