Удмуртиысь калыкъёслэн ассамблеяенызы кивалтоз «Удмурт Кенешлэн» вице-президентэз Владимир Байметов

Удмурт Дунне
By Удмурт Дунне Февраль 7, 2018 12:47

Владимир Александрович — психология наукаосъя кандидат, Удмуртилэн нимыныз Россилэн Общественной палатаяз быръем мурт, Президентэ кандидатлэн Владимир Путинлэн оскем муртэз.

Удмуртиысь калыкъёслэн ассамблеязылы кивалтӥсе быръемын «Удмурт Кенешлэн» вице-президентэз Владимир Байметов.

Та нуналъёсы «Удмуртиысь калыкъёслэн ассамблеязы» огазеяськонлэн конференциез ортчиз. Ассамблеялэн кивалтӥсез — Кун Думаысь депутат Алексей Загребин — берло 3 ар ӵоже ужамзылы йылпумъянъёс лэсьтӥз.

— Та дыр ӵоже ассамблеялы луыса республикаямы трос пӧртэм ужрадъёс ортчизы, — шуиз Алексей Егорович, — тужгес бадӟым проектъёс пӧлын — этнографияя диктант, пельняньлы сӥзем фестиваль но «Герои народа — герои страны» книгаез поттон.

Нациосын ужан политикая министр Лариса Буранова тау кариз Алексей Егоровичлы ӟеч ужамез понна. Шаерысьтымы пӧртэм калык огазеяськонъёслэн кивалтӥсьёссы азьланезлы малпанъёссэс шараязы. Кылсярысь, дэмламын вал 2019-тӥ арын Удмуртиысь пӧртэм калыкъёслэсь конгрессэс ортчытыны.

Конференция дыръя ик быръемын Удмуртиысь калыкъёслэн ассамблеязылы выль кивалтӥсь. Биньгозыез нуыны оскизы «Удмурт Кенеш» огазеяськонлэн вице-президентэзлы Владимир Байметовлы. Владимир Александрович — психология наукаосъя кандидат, Удмуртилэн нимыныз Россилэн Общественной палатаяз быръем мурт, Президентэ кандидатлэн Владимир Путинлэн оскем муртэз. Вордӥськемын  Яр посёлокын. Москваысь кун университетлэн психологияя факультетысьтыз аспирантураез йылпумъяса но психология наукаосъя кандидат луыса, со берытске Удмуртие, Дышетӥсьёслэсь тодон-валанзэс будэтонъя институтын, Удмурт кун университетын ужа, проректор, журналистикая кафедралэн кивалтӥсез луэ. Туннэ нуналлы — Дышетонэз азинтонъя институтлэн ректорез, наукая но методикая 40-лэсь трос ужъёслэн авторзы, дышетон удысысь дано ужась.

Елена Панфилова

Туспуктэм: Владимир Байметовлэн архивысьтыз

 

Удмурт Дунне
By Удмурт Дунне Февраль 7, 2018 12:47