Удмурт кун университетын шаертодонъя элькун олимпиада ортчиз

Удмурт Дунне
By Удмурт Дунне Февраль 14, 2018 16:55

Кылем арняе Удмурт кун университетлэн научной библиотекаяз нылпиос пӧлын шаертодонъя 21-тӥез элькун олимпиада ортчиз. Котьку сямен, радъязы сое УдГУ-ысь Историяя но социологияя институт но Нылпиослы ватсаса тодон-валан сётӥсь элькун центр (РЦДОД).

Нылпиосты ӟечкылаз «Удмурт Кенеш» огазеяськонлэн тӧроез Татьяна Ишматова.

Элькунысьтымы 60-лэсь уно пиналъёс — ваньзы ик шаертодонъя ёрос олимпиадаосын вормисьёс — люкаськизы тодон-валанзэс но малпаськыны быгатэмзэс эскерыны. Соос люкисько 2 группалы: 7-тӥ-8-тӥ классъёс но 9-тӥ-11-тӥ классъёс.

— Мон та олимпиадае 2-тӥзэ пыриськисько, — вераз Шаркан ёросысь Мувыр школаысь 9-тӥ классын дышетскись Юля Фёдорова. — Кылемаз покчи группаын на вал, соку 1-тӥ интыен бертӥ. Шаертодон мыным тунсыко потэ, исследовательской уж гожъясько инты нимъёсъя.

Шаертодонъя олимпиадаын покчиослы музейысь арбери сярысь рос-прос гожтоно, нош бадӟымъёслы вашкала документлы анализ лэсьтоно. Кыкетӥез люкет ваньмыз понна огкадь — мадёно аслад исследовательской ужед сярысь. Та 2 ужез быдэстэмъёс пӧлысь котькуд группаысь быдэн 3 финалистъёсты быръё, соос понна ортчытӥське 3-тӥез тур: ог 15 минут ӵоже дасяськыса, верасько ӵектэм темая. Туэ финалистъёслы мадьыны косӥзы Удмуртилэн брендэз сярысь.

9-тӥ-11-тӥ классъёс пӧлын 2-тӥ интые потӥз Алнаш ёросысь Варзи-Ятчи школаысь 10-тӥ классын дышетскись Саша Рябин. Шаертодонъя элькун олимпиадае со 3-тӥзэ пыриськиз ини, озьы ке но секытэн сётӥськиз, пе, исторической документлы анализ лэсьтон.

— Школаын ми ӵемысь эссеос гожъяськом яке ог-огмы азьын вераськиськом, нош вашкала документъёслы анализъёсын шер выриськом, — шуэ Саша Рябин. — Туэ милемлы сётӥзы ВКПБ-лэн Удмурт обкомезлэсь отчётсэ. Отын рос-прос валэктэмын, мар лэсьтӥськиз шаерамы ар ӵоже, кыӵе уж нуизы большевикъёс. Нош финалын мон верай асьме «Варзи-Ятчи» санаторий но отысь эмъясь дэри сярысь, нырысь удмурт кылын, собере вакчияк — ӟуч кылын.

Пусъёно: финалэ потэмъёс ӵектэм темая удмурт но, ӟуч но кылын вераськыны быгато — кинлы кызьы каньылгес.

— Туннэ татчы люкаськизы визьмо, вордскем шаерзылэсь историзэ но культуразэ ӟеч тодӥсь муртъёс. Малпасько, пӧлады пуко вуоно тодосчиос но, — шуиз Кун Кенешысь Наукая, дышетонъя, лулчеберетъя, йӧскалык политикая но егитъёсын ужан политикая но спортъя ялан ужась комиссиен кивалтӥсь Татьяна Ишматова. — Пиналъёслэн тодосчи луыны луонлыксы вань: книгаос но мукет ӟеч кузьымъёс сяна, шаертодонъя олимпиадаын вормисьёслы, соос Удмурт кун университетысь Историяя но социологияя институтэ пырыны мылкыд каро ке, огъя кун экзаменъёсын люкам баллъёссы борды эшшо баллъёс ватсасько на.

Алёна Михайлова

Удмурт Дунне
By Удмурт Дунне Февраль 14, 2018 16:55