Рукопашной бойя Удмуртилэн первенствояз пыриськиз 167 спортсмен

Удмурт Дунне
By Удмурт Дунне Февраль 12, 2018 12:10

Ӵошатскон сӥземын Афганистанысь войскоосты поттэм дырысен 29 ар тырмонлы

Толон Ижевскын ортчиз 12 — 17 аресъем пиналъёс пӧлын рукопашной бойя Удмуртилэн первенствоез. Ӵошатсконэ пыриськизы Ижевск, Можга, Вотка, Глазов городъёсысь, Ува каргуртысь но Пичи Пурга ёросысь, Татарстанысь Агрыз ёросысь нылпиос, ваньмыз-ӧвӧлэз ог 167 спортсмен.

Ужрад сӥземын вал службазэс нуыкузы бырыны шедем солдатъёсты буре ваёнлы. Люкаськемъёсты ӟечкылазы но сӥзёнъёссэс веразы шаерысьтымы вылӥ кивалтӥсьёс. Главалэн но Правительстволэн администрациенызы кивалтӥсь Сергей Смирнов шуиз: ӵошатскон сӥземын Афганистанысь войскоосты поттэм дырысен 29 ар тырмонлы, тросэз солдатъёс улэп кылизы ас вакытаз спортэн эшъяськемзылы луыса. Ӵапак таӵе ӵошатсконъёсын кыдало зэмос геройёс.

Огъя зачётын вормисе потӥзы «Витязь» клубе ветлӥсь нылпиос. Ас ёзо эшъёссы пӧлын висъяськизы Станислав Волков, Никита Александров, Анна Смердова, Мария Ворожцова, Роман Шибанов, Виолетта Тимеева, Кирилл Агеева но мукетъёсыз. Та ӵошатсконын вормисе потэмъёс табере пыриськозы Приволжск федерал округъя ӵошатсконэ, со ортчоз 22-тӥ — 23-тӥ феврале Нижний Новгород улосын.

Валентина Емельянова
Туспуктэмъёс: udmurt.ru

Удмурт Дунне
By Удмурт Дунне Февраль 12, 2018 12:10