«Россиысь куас сюресъёс» ӵошатсконъёсы шаерамы пыриськиз 7 сюрслэсь ятыр адями

Удмурт Дунне
By Удмурт Дунне Февраль 12, 2018 11:45

Воргоронъёс пӧлын вормись луизы Можгаысь Дмитрий Япаров, Алексей Зубков но Якшур-Бӧдьяысь Александр Телегин.

«Россиысь куас сюресъёс» ӵошатскон туэ 35-тӥзэ радъяськиз. Россиысь 73 улосын ортчиз.

Шаерысьтымы 30 интыын куасэн бызьылонъя ӵошатсконъёс ортчизы, куас сюрес вылэ 7 сюрслэсь ятыр адямиос султылӥзы. Валтӥсь старт вал Можга городын. Спортсменъёслы вольыт сюрес сӥзизы мугорез кыдатон культурая, спортъя но егитъёсын ужан политикая министрлэсь ужзэ быдэсъясь Наталья Гольцова, Можга городлэн йырыз Алексей Шишов, Паралимпиадае пыриськыса медальёс басьтэм спортсмен Владимир Кононов но мукетъёсыз. Пусйыны кулэ, та старт кутскон сётӥз на Удмуртилэн кубокез понна нюръяськонлэн нырысетӥ люкетэзлы. Сое ортчытъяны ӵектӥз Удмуртилэн Тӧроез Александр Бречалов, ӵошатскон луоз 4 люкетлэсь.

Можгаын ортчем стартэ 1 сюрс 500 пала адями пыриськиз. Кужмо нюръяськон пуромиз воргоронъёс но нылкышноос пӧлын, соос 10 иськемез ортчизы. Воргоронъёс пӧлын вормись луизы Можгаысь Дмитрий Япаров, Алексей Зубков но Якшур-Бӧдьяысь Александр Телегин. Нылкышноос пӧлын — Вавожысь Валентина Телицина, Можгаысь Екатерина Бушмакина но Людмила Познянская.

Валентина Емельянова

Туспуктэм: csp18.ru

Удмурт Дунне
By Удмурт Дунне Февраль 12, 2018 11:45