Лыдӟонъёсын Кузебай Герд пумитаз кырӟаса

Удмурт Дунне
By Удмурт Дунне Февраль 26, 2018 15:48

К. Герд нимо премиен пусъем Н. Пахомова но В. Ившин.

Быдӟым удмурт югдытӥсьлы Кузебай Гердлы сӥзьыса, Вавожын ортчизы 21-тӥ элькун Герд лыдӟонъёс. Соосты радъянэ, оло, вань вавож калык пыриськиз. Ужрад зэмос праздниклы пӧрмиз.

Сюлэм уг чида

«Удмурт Кенеш» огазеяськон К. Гердлы сӥзем лыдӟонъёсты 1993-тӥ арысен ортчытъя ни. Нош туэ, К. Герд вордӥськем дырысен 120 ар тырмон аре, лыдӟонъёсты ортчытон борды басьтӥськиз Вавож ёрос. Угось татын, Покчивуко (Большая Докъя) гуртын, 1898-тӥ арын удмурт калыклэн югдытӥсез вордӥськиз. Герд лыдӟонъёсты вавожъёс быдэсак асьсэ вылэ басьтӥзы, республикалэн бюджетысьтыз копейка но кутытэк. Озьы ке но, азьвылъёсыныз ӵошатыса, ужрад паськытгес радъяськиз. Вавожъёс возьматыны тыршизы кадь: тани ми кызьы ужаськом, тыршиськом, Гердлэсь ужзэ азинтӥськом.

Паймимы, культура юрт доры матэктыку ик: Вавожысь сюрес дурын К. Гердлы сӥзем лыдӟонъёсъя нимысьтыз билбордъёс сыло. Озьыен, вань мынӥсь-ветлӥсь тодэ, кыӵе туннэ быдӟым нунал. Культура юртын калыкез шулдыр кырӟанъёсын пумитазы, одӥгаз вӧл-вӧл залазы тодматскыны луиз кибашлыослэн ужъёсынызы, радъяськизы пӧртэм мастер-классъёс.

Конференция кутскиз Гердлэн кылбуреныз но… Гердлэн ик кырӟаменыз. Зэм-зэм, нырысьсэ куноосты пумитаз аслаз Гердлэн сюсь валикъёсы гожтыса кельтэм но татчыозь вуэм куараез: «Кызьы меда лыктӥды, ӟечесь-а тӥ вуиды…». Кузебайлэн куараез туж ненег, чебер вылэм, кырӟамзэ лӧбак ӝутыса кадь азинтӥзы ни туала кырӟасьёс, Вавожысь кенакъёс.

Нырысьсэ куноосты пумитаз аслаз Гердлэн сюсь валикъёсы гожтыса кельтэм но татчыозь вуэм куараез: «Кызьы меда лыктӥды, ӟечесь-а тӥ вуиды…».

— Куке-соку Герд туж оскиз, солэн вордӥськем интыез сяськаялоз шуыса, — веранзэ мытӥз Вавож ёрослэн йырыз Николай Чайников. — Ми тыршиськом со оскемзэ уж вылын быдэстыны, гурт хозяйствоын но, спортын но, дышетон удысын но. Вавож ёросын али 56 процент удмуртъёс уло. Гердлэн вордӥськем нуналызлы сӥзьыса, ёросамы пӧртэм конкурсъёс, флешмобъёс ортчытъям ни, ар ӵоже эшшо ужрадъёс луозы на.

— К. Герд кадь адямиос сярысь секыт вераны, — пусйиз нациосын ужан политикая министр Лариса Буранова. — Ваньзэ верано ке, быдэс нунал уз тырмы, ӧжыт ке — сюлэм уг чида. Тодӥсько на, кызьы Гурезь-Пудга гуртын, Гердлы 100 ар тырмыку, солы сӥзем музей усьтӥмы. Соку мон быдэс толэзь пуки, дыр, компьютер сьӧрын, Герд сярысь текстъёс люкаса. Туж пайми: кӧня со удмурт калык понна лэсьтыса вуттӥз! Кӧня со понна кужым но яратон кулэ вал!

— Туэ конференция «Герд улэ асьме пӧлын» шуыса нимамын. Быдэс зал тыр люкаським, мон шӧдӥсько, Герд зэмзэ но кытын ке асьме пӧлын, — пусйиз «Удмурт Кенеш» огазеяськонлэн кивалтӥсез Татьяна Ишматова. — Гердлэсь ужзэ азинтыны тыршиськом. Но сюлмаськонъёсмы вань, тужгес но анай кылмес дышетон ласянь. Та конференция мед юрттысал аспӧртэм анализ лэсьтыны, азьланяз ужаны мылкыд мед сётысал.

Туэ конференция «Герд улэ асьме пӧлын» шуыса нимамын

Татьяна Витальевна Вавож ёрослы тау кариз, веме карыса таӵе бадӟым ужрадэз вормизы шуыса.

Кин ке лыктоз…

Конференцилы аспӧртэм мылкыд сётӥз филология наукаосъя докторлэн Алексей Арзамазовлэн докладэз. Кыӵе инвисъёс усьтӥсько удмурт кылэз тодӥсь егитъёс азьын? Тодосчи пусйиз: удмурт кылын вераськисьёс капчиенгес дышето фин-угор, тюрк, китай, япон но мукет кылъёсты.

Филология наукаосъя кандидат Галина Шушакова рос-прос мадиз, кытын но кызьы али утиське югдытӥсьлэн нимыз. Гердлэсь нимзэ калыклы вуттон понна туж трос лэсьтӥзы тодосчиос К. Куликов, В. Ванюшев, А. Шкляев, Ф. Ермаков, историк Н. Кузнецов, шаерчи А. Егоров но мукетъёс. Туннэ нуналлы Гурезь-Пудгалан Гердлы сӥзем музей усьтэмын, Вавожын но, Ижын но солы сӥзем синпелетъёс вань, Гердлэн нимыз сётэмын гимназилы, музейлы, «Удмурт Кенеш» огазеяськонлэн газетэзлы, нимысьтыз премилы, ортчыло пӧртэм конференциос, конкурсъёс. Туала егитъёс но Гердэз уг вунэто, Интернет вотэсын со сярысь гожъяло.

— Гердлэн творчествоез — со азьлань мынонъя программа, — пусйиз филология наукаосъя кандидат Александр Шкляев. — Асьмеос нош но нош берытскиськом со программае, угось сое быдэстыны ӟигармы уг тырмы. Туннэ нуналлы тужгес бадӟым сюлмаськонмы — кыл. Паймымон югдур кылдэ: Будапештын, магазинэ пырыса, «Вӧй вань-а?» юад ке, тонэ валалозы. Нош Ижын юады ке — уз валалэ…

Йӧскалык библиотека

Конференцие люкаськемъёс тодазы вайизы, кызьы К. Гердлэн куараез туннэ нуналозь утемын вал. Та сярысь мадизы филология наукаосъя кандидатъёс А. Шкляев но В. Денисов. 1929-тӥ арын К. Герд шӧдӥз, сое арестовать карозы шуыса. Озьы оглюкетсэ люкам сюсь валикъёссэ тодмоез Вера Недзветская доры кельтӥз. 1970-тӥ аръёслэн пумазы та пересь кышномурт доры вуылӥз Александр Шкляев. Мон тодӥсько вал, кин ке лыктоз мон доры Гердлэн нимыныз, шуэм Недзветская. Озьы Гердэн бичам кырӟанъёс шедё Александр Григорьевич кие, тодосчи соосты Историяя, кылъя но литературая институтэ вае. Али та валикъёс утисько Москваысь Пушкин музейын.

— Герд 300 пала сюсь валикъёсы удмурт кырӟан-веранъёсты, мадёнъёсты гожтэм, — пусйиз Виктор Денисов. — асьме доры вуизы 37 валикъёс гинэ.

Виктор Николаевич пусйиз на: азьланяз, пе, умой луысал Удмуртиысь тужгес дано адямиослэн куараосынызы галерея кылдытыны. Нялтас вераса, конференцие лыктэмъёс Пётр Чайковский композиторлэсь но куаразэ кылыны быгатӥзы.

3 сюрс 903-тӥ…

Конференциын лэчыт ужпумъёсты ӝутӥз писатель Николай Кузнецов.

— Асьмелы туж трос лэсьтыны кулэ на, — шуиз со. — Удмурт кыллы сӥзем нимысьтыз нуналмы, удмурт историлы сӥзем рос-прос книгамы ӧвӧл.

Николай Спиридонович ӟечен пусйиз Никифор Павловлэсь Гердлы сӥзем книгазэ. Та книгаез, пе, со 81 аресказ гожтӥз, озьы Гердэз зэмзэ но эскерисьёслы синпелет пуктӥз. Но, жаль, ассэ Павловез умой-умой дунъяны ӧм быгатэ…

Филология наукаосъя кандидат Людмила Бусыгина: ГУЛаг-лэн виртуальной музеяз 5 сюрс 421 ним пӧлын асьме К. Гердлэн документъёсыз 3 сюрс 903 номер улын.

Нош кыӵе интернет ресурсъёсысь али Герд сярысь тодыны луэ? Та сярысь пыр-поч мадиз филология наукаосъя кандидат Людмила Бусыгина. Кылсярысь, ГУЛаг-лэн виртуальной музеяз, пе, 5 сюрс 421 ним пӧлын асьме К. Гердлэн документъёсыз 3 сюрс 903 номер улын. Но кылдытоно вал ни Гердлы сӥзем нимаз виртуальной музей но.

Егит тодосчи Лариса Дмитриева ивортӥз Национальной библиотекалэн луонлыкъёсыз сярысь. Татын, пе, утисько куд-ог тодмо тодосчиослэн, писательёслэн кузьмам книгаоссы. Лариса тодматӥз Гердэз эскеронлы быдэс улонзэ сӥзем Фома Ермаковлэн куд-ог книгаосыныз. Докладъёссэс лыдӟизы на Гурезь-Пудга школаын дышетскись Аня Зайцева но та школалэн директорез Светлана Щёткина. Светлана Георгиевна пусйиз, берло аръёссэ соос тыршо нылпиосын пӧртэм эскерон ужъёс лэсьтыны. Ёросысь удмурт гуртъёсын удмурт кылъя дышетӥсьёс но мыло-кыдо ужало.

Конференциын К. Герд нимо премиен пусъемын вал «Удмурт Кенешлэн» Кияса ёросысь ёзэныз кема аръёс ӵоже кивалтэм Надежда Пахомова но кылбурчи, «Удмуртия» издательстволэн азьвыл редакторез Вениамин Ившин. Сцена вылын покчиос но бадӟымъёс эктыса-кырӟаса чебер композиция возьматӥзы. Нош экран вылысь адӟыны луиз Вавож музъем вылын К. Гердлы сӥзьыса лэсьтэм флеш-мобез. Туж зол пӧрмем! Собере люкаськемъёс К. Гердлы сӥзем синпелет доры сяська понӥзы, быдэс дуннелы тодмо луэм Г. Чайников суредасьлэн ужъёсыныз тодматскизы, К. Гердлы сӥзем музее, «Луч», Мичурин нимо, «Колос» но «Удмуртия» хозяйствоосы вуылӥзы.

Адӟиськиз: вавожъёс асьсэ улосчизылэсь нимзэ туж юн утё, солэсь адӟем карыса, ужало но, шутэтско но. Вавож ёрослэн йырыз Николай Чайников верамъя, азьланяз соос чаклало Герд сярысь нимысьтыз турмаршрут радъяны. Туристъёс понна усьтэмын ини шутэтскон база. Озьыен, одно ик вуылэ Вавоже.

Елена Миннигараева

Туспуктӥз Елена Рябина

Удмурт Дунне
By Удмурт Дунне Февраль 26, 2018 15:48