«Билингва»: Малы Наринэ удмурт кылэз дышетэ?

Удмурт Дунне
By Удмурт Дунне Февраль 5, 2018 10:03

Ижысь удмурт анай-атайёс та нуналэз чидатэк возьмазы! Туэ понна нырысьсэ люкаськылиз «Билингва» семинар. Таяз учыре отчы пыриськизы армян, азербайджан, немец, ӟуч семьяос но.

«Билингва» проект луонлык сётӥз туэысен проект котыре мукет калыкъёсты но кыскыны. Мар пӧрмиз? Туж ӟеч пумиськон. Пӧртэм выжы калыкъёслэсь малпанъёссэс кылзыны тунсыко вал, угось асьмеос, удмуртъёс, ӵемысь ас пушкамыгес пӧзиськом, анай кылэз дышетон сярысь трос вераськиськом, но пиналъёсмы удмурт сямен ӟеч вераськеменызы сокем уг шумпотто. Малы? Кыӵе дэмланъёссэс сётӥзы мукет калыкъёс но котрес ӝӧк котыре лыктэм специалистъёс?

— Мон ноку ӧй малпалля, Армениелэсь палэнэ кошко шуыса, — вера англи но ӟуч кылъёсъя дышетӥсь Татев Мирзоян, — но агае доры Удмуртие лыктӥ но, татчы ик кыли. Татын ик вордӥськизы пиосы. Семьяямы ми армян кылын вераськиськом. Мон уг валаськы, адямиос анай кылзэс дышетэмзы уг луы, луонлыкъёс ӧвӧл шуыса ӝожтӥсько ке. Ваньмыз потэ семья бордысь. Семьяын анай кылын вераськон понна трос кулэ ӧвӧл.

Таӵе ик мылкыдзэ вераз азербайджан анай Мехпара Рагимова. Мон, пе, школае мыныкум, ӟуч сямен умой уг вераськиськы вал, нырысь «кыкъёс» басьяй, нош собере эшъёсме но азьпалтӥ.

Котрес ӝӧк сьӧрын пумиськонэ юромо лыктэм Вавож ёросысь армян семья — Андриас Манукян, Алват Паронян но 15 аресъем Наринэ нылзы.

— Школае мыныкумы, милесьтым юазы, пиналды удмурт кылэз дышетоз-а? Шуим: одно дышетоз. Нырысь секыт вал, — тодаз вае Андриас. — Удмурт сямен ум тодӥське. Котькуд ӝыт учебникез кунулам кутыса, мон йыгаськылӥ бускельёсылэн капкаосазы, юрттэ, валэктэ. Со понна нылме классысьтызы одӥг пияш серем карылӥз. Бӧрдытозь но вуылӥм. Нош огпол контрольной уж лэсьтӥзы, удмурт кылэз эскероно вал. Быдэс классысь Наринэ гинэ «витьлы» лэсьтыны быгатэм. Мон нылылы шуи: тодон-валан люкаса ветлэм понна тыныд возьыт луыны кулэ ӧвӧл, со пияшлы возьыт луыны кулэ, кудӥз аслэсьтыз кылзэ уг дунъя…

Анай-атайёс кенешон вискын нылпиосын удмурт кылъя занятиос ортчо, пиналъёс ог-огенызы шудо, тодматско.

Котрес жӧк сьӧрын вераськонэ пыриськиз Парижысь университетлэн профессорез Ева Тулуз:

— Мыным улонам пичи дырысеным 3 кыл улэ: анае — Италиысь, котьку вераськиз итальян кылын, атае — Португалиысь — португал кылын, нош улӥмы ми Франциын. Озьы пичиысен 3 кылэз тодыса будӥ. Но сюлмам мур пыремын итальян кыл — та кылын монэн вераськиз анае. Анай кыл пыр пинал но анай вискын юн герӟетъёс кылдо.

Ева Тулуз ӝожомемзэ вераз: удмурт семьяын пинал ӟуч кылын вераськыны кутске ке, бадӟымъёс но соин ӟуч сямен верасько. Ог 10 ар талэсь азьло озьы ӧй вал кадь. Нош али песянайёс но внукъёссы сьӧры ӟучомо, югдур сюлмаськытэ.

Нош мар кароно, пиналыныд удмурт сямен вераськиськод, нош со ӟучен вазе ке? Специалистъёс шуо: пиналэз ассэ ик ӟуч сямен верамзэ удмуртэ берыктыны куроно, уг ке быгаты, азьло верано, кызьы кулэ, нош со бӧрсяды мед вералоз. Ялан озьы кариды ке, пинал валалоз, соку ик удмурт сямен вазьыны умойгес, кылысь кылэ берыкъянэз ӧвӧл ни.

Пичиысен ик 3 кылэз тодыса будо Башкортостанысь, Татарcтанысь нылпиос. Со пичи но уг люкеты азинлыко, визьмо, шаплы луыны. Удмуртие вуыса но соос асьсэды туж ӝог шедьто, кивалтон ужын, культураын, наукаын адӟем карымон луо. Пӧртэм калыкъёслэн визькылъёссы вань: «Макем тросгес кыл тодӥськод, сокем узыргес луиськод» яке «Кӧня кыл тодӥськод, сомында пол ик тон адями» но мукет. Ижысь туала анайёс тае туж ӟеч валазы ни.

***

Ужрадэз котьку сямен ик усьтӥз «Билингвалэн» валтӥсез, филология наукаосъя кандидат Татьяна Волкова. Со пусйиз, проект улонэ пыӵа ни 2015-тӥ арысен, Нациосын ужан политикая министерство юрттэмен. Ортчем ар ӵоже 12 занятие радъямын вал. «Билингвалэн» занятиосыз дыръя анай-атайёс пумиськыло психологъёсын, логопедъёсын, мукет специалистъёсын, вераськон мынэ пиналэз огдыре ик кӧня ке кылын дышетон амалъёс, та ласянь кылдӥсь шугъяськонъёс пумысен.

Анай-атайёс кенешон вискын нылпиосын удмурт кылъя занятиос ортчо, пиналъёс ог-огенызы шудо, тодматско. «Билингва» — туала улонын туж кулэ луись проект. Соин ик паймонэз ӧвӧл, дыр, со Россилэн Президентэзлэсь грантсэ утӥз шуыса.

Елена Миннигараева

Туспуктэмъёс: udm.bilingva.ru,

Владимир Вахрушев

Удмурт Дунне
By Удмурт Дунне Февраль 5, 2018 10:03