Александр Бречалов: Ижкарын усьтӥськоз выль эмъюрт

Удмурт Дунне
By Удмурт Дунне Февраль 5, 2018 12:22

Удмуртилэн Тӧроез Александр Бречалов ужан арнязэ котьку сямен кутскиз меӵак эфирысен. Таяз радэ калыклэн юанъёсызлы валэктонъёс сётъяз но элькунамы тужгес адӟем карымон ужрадъёс сярысь вераз «Мынам Удмуртие» ТРК-лэн тулкымъёсыз вылын.

Александр Владимирович ивортӥз, лымы трос усемен сюресъёсты сузянэз Удмуртиысь Правительство сак чакла шуыса. Вераськонзэ кутскыкуз, кивалтӥсь ӟечкылаз Максим Вылегжанинэз — кылем арняе тодмо луиз, Шарканысь куасэн бызьылӥсь калыккуспо ӵошатсконъёсы пыриськыны быгатэ ни шуыса.

Берло дыре элькунамы экономикаез ӝутон пумысен уно ужрадъёс ортчизы. Кылсярысь, Удмуртие вуылӥзы Огазеям авиастроительной компаниысь адямиос. Соос тодматскизы 15 предприятиосынымы, азьланяз, оло, компания соослы заказъёсын вазиськылозы.

— Тодӥськоды, Удмуртиысь предприятиосты ми поттыны тыршиськом Россие но, дуннее но, — пусйиз Александр Владимирович. — Тулыспалэ делегацимы пыриськоз Сочиын ортчылӥсь калыккуспо форуме, малпаськомы инвесторъёсыз тодматыны асьме проектъёсынымы.

Таяз радэ Удмуртилэн Тӧроезлы уно юанъёс вуылӥзы гуртъёсысь: сюресъёс лэсьтоно, гурт удысэз азинтоно, уртъёсы чагыр эстӥськон кысконо… Калыкез сюлмаськытэ тазалыкез утён удыс но. Кызьы ивортӥз Александр Владимирович, али та удысын бадӟым эскеронъёс ортчо.

— Тӥ тодӥськоды, кылем арын мон вазиськи Россилэн Президентэзлы Владимир Путинлы, Ижысь Ленин ёросысь поликлиникаез йылаз-пумаз вуттон понна уксё курыса. Коньдон висъямын. 10-тӥ толсуре та эмъюрт усьтӥськыны кулэ, — шуиз Александр Бречалов.

Сергей Захаров

 

Удмурт Дунне
By Удмурт Дунне Февраль 5, 2018 12:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*