Зинаида Рябинина: Выль аре — ӵошкыт сюрес

Удмурт Дунне
By Удмурт Дунне Январь 11, 2018 12:50

 

Зинаида Рябинина, валтӥсь редактор

Туэ понна таиз нырысетӥез зӧк номермы. Шумпотымон, ваньмыз сямен лыдӟисьёсмы выляз аре но «Удмурт дуннеен» выжизы.

Ми понна со — тужгес бадӟым шумпотон но удыс праздникмы азьын кузьым, 13-тӥ толшоре (январе) уго Россиын пусйиське прессалэн нуналыз. Но эн сюлмаське, соин йырин ужамы вис уз луы.

Шутэтскон сярысь ке, туэ со городъёсын-райцентръёсын туж умой радъямын вал — нуналлы быдэ кыӵе ке ужрадъёс, концертъёс, спектакльёс, бассейнъёс-термыос, нискылан интыос… Ваньмаз уд но вуттӥськы.

Берло аръёсы туж шумпоттэ 1-тӥ январь. Кытысь адямиос кудӟемъёсты адӟо, ӧйтӧд. Егитъёс но, кузпалъёс но  лымшоре ик  кинотеатръёсын тымиськемын ни — «Движение вверх» фильме билетлы черодын сыло! Билетъёс уг сюро, соос вань кинотеатръёсысь 3-4 часлы азьлапал басьтэмын ни.

Зэмос Тол бабай ниманы луоз филармонилэсь директорзэ Алексей Фоминэз — каникулъёсы артистъёс нуналлы быдэ сямен концерт возьматӥзы, нош билетъёс вал… 100 манетэн гинэ!

Зэм, солы пумит  быдэс вышкы тэкит кисьтӥськиз Шор площадь вылэ. Туэ татын  дунтэк нискылан интыос ӧй вал, шуыны луоз, нош чебер йӧ городокез ватӥзы  забор сьӧры. Со шуш гинэ ӧз адӟиськы, туж валантэм но — угось котькуд аре  татын толбыт  чузъяськылӥз шудо нылпи куара,  гурезь вылын огкадесь вал узыр семьяысь но, куанерысьтыз но нылпиос.

Оглом шаерамы каникулъёс шыпыт ортчизы. Кытчы ке мынон азьын ялан сюлмаськыса улӥськиз — нош ик визьтэмъёс полицие уз жингыртэ-а, мина понэмын шуыса. Сыӵе учыръёс зэмзэ но  вал — югдурез утисьёс 6 пол потазы интыосты эскерыны. Мылкыдэз озьы ик куашкато кудӟыса руль сьӧрын ворттылӥсьёс. Шутэтскон нуналъёс ӵоже гинэ 189 кудӟем водитель кырмемын. Нялтас вераса, 44-ез сярысь ивор полицие сётӥзы адӟисьёс — югдурез утёнъя министр Александр Первухин соослы тау каре.

Нырысетӥ ужан  нуналэ элькун Тӧро дорын ортчем кенешын Александр Бречалов ивортӥз: туэ Удмуртиын ялэмын Сюреслэн арез. Мед вуозы соос тросгес гуртъёсы, соку ми но тросгес интыосы поталом.

Удмурт Дунне
By Удмурт Дунне Январь 11, 2018 12:50