Урал палась шуккиськем куара

Удмурт Дунне
By Удмурт Дунне Январь 16, 2018 13:25

Адӟытонлэн валтӥсь кураторез луэ удмурт тодосчи Светлана Карм.

Европаын фин-угор калыкъёслы сӥзем ялан ужась адӟытон радъямын Эстониысь Йӧскалык музейын гинэ. Нимаське со «Урал палась шуккиськем куара». Адӟытонлэн валтӥсь кураторез луэ удмурт тодосчи Светлана Карм.

— Зэм, фин-угор калыкъёслэсь улэм-вылэмзэс, сям-йылолъёссэс возьматӥсь адӟытон татын гинэ кылемын на, — шуэ со. — Ми кутскыку, таӵе экспозиция Финляндиысь культураослэн музеязы вал на, но 2013-тӥ арын сое ворсазы.

— Нош малы та адӟытон ӵапак та музейын усьтӥськиз?

— Эстониысь та музей фин-угор калыкъёсты эскеронын дуннеысь одӥгез валтӥсез луэ, бадӟым коллекциос вань на Финляндиысь Йӧскалык музейын, Будапештысь но Санкт-Петербургысь Этнографической музейёсын. Эстониысь Йӧскалык музейлэсь ортчем сюрессэ учконо ке, со 1909-тӥ арын кылдэмын. Нырысетӥосыз фин-угор арбериос вуизы татчы 1913-тӥ-1914-тӥ аръёсы, ваемын Пенза но Саратов губерниосын улӥсь мордва калыклэсь. Бичазы эстонъёс. Пыдлогес ке учконо, 19-тӥ даурын кылдытэмын вал ни эстон тодосчиослэн огазеяськонзы, соослэн бичам арбериоссы пӧлын удмуртъёсыз но вал. Кытысь но кызьы соос отчы вуэмын, тодмо ӧвӧл.

Экспозицимы туж кема лэсьтӥськиз, со герӟаськемын музейлы выль юрт пуктонэн. 2006-тӥ арын тодмо ни вал, эстон калыкен герӟаськем адӟытон сяна, выль юртын фин-угор адӟытон но луоз шуыса. Озьы адӟытонлэн валтӥсь малпанэз луиз фин-угор нылкышноосты но пиосмуртъёсты возьматон. Кылсярысь, удмуртъёсты но поръёсты ми удмурт-пор сюан пыр возьматӥськом. Этнографической материалъёсысь тодмо: ӵемысь удмурт нылъёс пор пиослы бызё вал.

— Адӟытонды бордын ужакуды, кыӵе шуг-секытъёсын пумись-кылӥды?

— Оглом учконо ке, фин-угор калыкъёс 25, нош адӟытонэз лэсьтӥсь тодосчиос 6 кузя гинэ вал. Одӥг калыклэсь сям-йылолъёссэ ӟечгес тодӥськод, мукетызлэсь — лябгес. Кыӵе ке калыклэсь люкам арбериос тросгес, мукетызлэн — ӧжытгес. Кызьы ваньзэс возьматоно? Куд-ог арбериос музее асьсэ историенызы вуо ни, тон соосты мылыд потэмъя кутыны уд быгатӥськы ни. Аслэсьтыд культурадэ возьматыкуд, тон кытӥ-отӥ шоккетыны но быгатӥськод, нош мукет калыкъёс бордын ужакуд, озьы уг луы: адями медаз куатаськы. Кураторъёс но, кыӵе калыкъёсын тросгес выремын, соослэсь ик культуразэс тросгес возьматӥзы. Фин-угор калыкъёсын соос книга пыр гинэ тодмо ӧвӧл, трос пол пӧртэм экспедициосы потамын. Кылсярысь, Мадис Арукаск вепсъёс, водьёс доры ветлэмын, Индрек Яатс вепсъёс, коми-пермякъёс доры вуылэмын, Пирет Кооса — Комие. Арт Леэте ветлэмын Сибирь палъёсын улӥсь калыкъёс — хантыос но мансиос — доры. Фин-угор кылъёсын вырись Николай Кузнецов коми луэ. Со сяна, ми юн кусып возьылӥмы Россиысь элькунъёсысь музейёсын но институтъёсын, соос пӧлын — Историяя, кылъя но литературая Удмурт институт.

Эстониысь Йӧскалык музей.

— Но фондъёсады трос арбериос кыллё на, дыр?

— Фондъёсы 10 сюрс пала арбериос бичамын, та экспозициын ог дасмосэз гинэ возьматэмын. Азьланяз малпаськомы мукет адӟытонъёс но лэсьтылыны, соосты пӧртэм интыосын возьматъяны мед луоз шуыса. Кыӵе луоз экспозиция, потэ бичам арбериос бордысь. Кытысь ке палэнысь вуж арбериосты курыны но татчы вайыны али секыт. Нырысь ик, кунгож сьӧры вуж предметъёсты поттыны уг луы ни, со чебер (этично) но ӧвӧл. Али музейёслэн политиказы сыӵе: традиционной калык культура интыяз ик мед возиськоз-утиськоз.

— Нош Эстониын улӥсьёслэн удмуртъёслэсь улэм-вылэмзэс адӟемзы потӥз ке…

— Али дунне усьтӥсь-кемын. Удмуртъёс асьсэ лулчеберетсэс доразы возьматыны быгато. Куддыръя паймоно кадь: музеямы лыкто Россиысь фин-угоръёс но утчаны кутско асьсэ калыксылэсь пӧртэм арбериоссэ. Юасько: нош асьтэ музеяды марды вань? Ӧм ветлэ, шуо…

— Озьыен, коллекциды уг ни йылы?

— Со бичаське… Люкаськомы туала арбериосты, мае калык асьсэлэн шуэ. Туннэ нунал — со ӵуказе история ни ук. Тросаз музейёсын али бичало интервьюос, киноос, туспуктэмъёс.

— Интерактивной кариськыны туртто? Тӥляд но адӟытонды сыӵе: учкыны луэ калыкъёслэн мадёсъёссыя мультфильмъёсты, сэбедъёсысь видеоосты, кылзӥськыны кырӟанъёсты.

— Зэм. Али котькытын интерактивность, мультимедиа… Но калык акыльтоз талэсь, соос утчаны кутскозы сое, мае киын кутыны-кырманы луэ, адямиос музее «улэп» арбериез учкыны лыктозы.

Тросаз музейёсын ваньзэ огазьын возьматэмзы потэ. Удмуртиысь К. Герд нимо Йӧскалык музейын, кылсярысь, тыршо Ижлэсь но историзэ возьматыны, инкуазез но, элькунын улӥсь пӧртэм калыкъёслэсь сям-йылолъёссэс но. Соин удмуртэзлы отын ӧжыт инты висъяське.

— Тросэз музейёс туала вакытэ лулчеберетъя интылы пӧрмо, нош тӥлядаз наукаен но выро. Кыӵе темаос бордын ужаськоды?

— Та музей кылдыку ик, озьы малпамын вал. Музеез радъясьёс валазы: вашкала эстон культура быроз, сое ӧд утьы ке. 1918-тӥ арын, Эстон Республика кылдэм бере, асьсэлэн эстонецъёслэн та ӧрын тодӥсь-валась адямиоссы ӧй вал, музейлы директоре ӧтизы Финляндиысь этнографез Ильмари Манниненэз. Со шуиз, та, пе, фин-угор калыкъёслэн творческой мастерскойзы мед луоз. Озьы 1924-тӥ аре Эстониысь дышетонъя министерство, тодӥсь-валась адямиосын юалляськон ортчытыса, музеез университетэн герӟаз, озьы со дышетӥсьёслы, студентъёслы научной, практической инты луиз.

Мае эскериськомы? Темаосмы пӧртэмесь: калык дӥськут, улэм-вылэмзы, вашкала но туала осконъёс, улонлэн воштӥськемез но мукет.

http://www.erm.ee/ru

Пор-удмурт залэ пырыку, соку ик чузъяськыны кутско сюанысь кырӟанъёс, залъёсын возьматӥсько вашкала киноос но туала улонэн герӟаськем видеоос, пуктэмын пӧртэм калыкъёслэн юртъер котырзы.

 — Нош фин-угор темаен Европаын тунсыкъясько-а?

— Эстониез учконо ке, Таллинын сярысь, Тартуын золгес фин-угор темаен тунсыкъясько. Нылпиос фин-угор дуннеен тодмо, соин эстон кылъя но обществоведениея урокъёсын тодмато. Али, глобализация дыръя, адямиослэн асьсэ выжызэс ыштэмзы уг поты. Одӥг ласянь, соос дуннелы но усьтӥськыны выро, мукет ласянь, «кин мон?» юанэз ялан тодазы возё.

* * *

Эстониысь Йӧскалык музей интыяськемын Тарту карын, Эстонилэн лулчеберетъя шоркараз. Солэн выль юртэз усьтӥськиз 2016-тӥ арын октябре. Со дырысен музее 500 сюрс пала адями вуылӥз ни.

Таӵе ӟеч адӟытонъёс быдэс дуннеын чиньыен лыдъямон. Пор-удмурт залэ пырыку, соку ик чузъяськыны кутско сюанысь кырӟанъёс, залъёсын возьматӥсько вашкала киноос но туала улонэн герӟаськем видеоос, пуктэмын пӧртэм калыкъёслэн юртъер котырзы. Со сяна, юромо та адӟытонлы лэсьтэмын 9 фин-угор кылъёсын мультфильмъёс. Соос дасямын калыкысь бичам мадёнъёсъя но возьмато воргоронъёслэсь но кышномуртъёслэсь кусыпъёссэс.

Мария Векшина

www.erm.ee/ru

Удмурт Дунне
By Удмурт Дунне Январь 16, 2018 13:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*