Тол бабай ке луысал… Шаерлы кузьым

Удмурт Дунне
By Удмурт Дунне Январь 10, 2018 14:34

27-тӥ толсур. Уйин. Арлы быдэ пичи пияш Выль ар азьын Тол бабайлэсь кузьым куре. Аслыз гинэ уг — сузэрезлы но вынызлы (соос пичиесь али, гожъяськыны уг быгато), агаезлы (со бадӟым ини, Тол бабайлэн кузьым сётэмезлы уг оскы). Куинь нунал малпаське ини со, номыр йыраз уг лыкты. Тани умме усён азяз Славик малпаз: «Мыным номыр но кулэ ӧвӧл, Удмурт шаерелы кузьымме сёто». Кемалась дасям бумагаяз туж чебер гожтӥз: «Удмурт шаерын вань калык удмурт сямен мед вераськоз»…

…Мон Тол бабай. Дорам удмуртъёслэн Кылдысинзы вуиз. Мон сое кенешыны ӧти. Мукет гожтэтъёсыз  кызьы быдэстыны мон тодӥсько, нош тазэ… Ми Кылдысинэн малпаським, кенешим, кызьы Славик нимо пияшлэсь малпанзэ быдэстоно, таӵе малпанэ вуим: «Удмуртъёс удмурт но, ӟуч но, англи но, мукет но кылъёсты мед тодозы».

31-тӥ толсур. Туннэ вань нылпиослы кузьымъёс сётоно. Ортчи ваньзы дортӥ, кинлэсь ке но кылбур верамзэ кылзӥ, нош кинлэн ке но кыз улаз шыпытак гинэ кема возьмам кузьым поныса кельтӥ, Славик гинэ на кылиз. Тани инбаметӥ лобӟи мон, дӧдьыям пуксьыса. Пужейёс монэ чаляк нуо. Кытысь-марысь, пилемъёс сьӧрысь, мон сьӧры уйиськись луиз. Учкисько: монэ уе Кукрибаба. Со монэ ыбылыны кутскиз, ӵындытӥсь газэн монэ умме уськытӥз, мон лымые зыми. Сайкасько: ветлӥсь коркан кыллисько, киос-пыдъёс думылэмын, вамышъям куараос кылӥсько. Кин ке но парсь кадь нурскетэ, курег кадь но котка. Корка питраз, мон соин ӵош. Ӧс усьтӥськиз но, Вукузё, Коркакузё, Нюлэскузё пыризы. Учкисько соос шоры: дӥськутъёссы азьлолэсь но зол кесяськемын, син улазы лыз-вож.

— Мар луиз тӥледын? — юасько.

— Коркаен жугиським, — дэмен веразы. — Кукрибабалэн та зэмос крепостез, чакласькыса ветлӥсьёсыз но вань, коркаез каратэ жугиськонэн вырыны быгатэ, вормыны сое туж шуг. Ми алдаса гинэ сое вормим, пырыны быгатӥм.

— Мукет амал ӧвӧл, — шуэ Вукузё. — Ойдолэ лушкем кылъёсмес вералом.

Вукузё шуиз: — «УД!» Нюлэскузё: — «МОРТ!» Коркакузё: — «ЁС!» Соос адӟиськисьтэм луизы. Монэ муръёетӥ потыны ӧтизы, асьсэос тубо, монэ но сьӧразы кыскыса нуо.

— Дыртоно, — шуисько мон, — 10 минут гинэ на кылиз, Славиклэсь малпанзэ быдэстоно! Со ведь быдэс арзэ умой ортчытӥз, олимпиадаосын вормылӥз, анай-атаезлы юрттӥськиз, дышетӥсьёссэ вормонъёсыныз шумпоттӥз, сузэрзэ но вынзэ вылезлы дышетӥз.

Ми ураме потӥм но, мон, бодыме шуккыса, шуисько:

— Удмурт калык аслэсьтыз историзэ, анай кылзэ ноку но медаз вунэты! Удмурт Элькунын улӥсь вань калыкъёс тупаса мед улозы!

…Озьы гинэ шуыса вуи, самолётъёс лобаны кутскизы, котыр яркыт тыло салютъёсын Удмурт Элькун ворекъяны кутскиз: Ижкар, Можга, Алнаш, Кузьымгурт…  Ура-а! Выль ар!

Николай Соснов,

Алнаш ёросысь Чем-Куюк школаысь

7-тӥ классын дышетскись

Удмурт Дунне
By Удмурт Дунне Январь 10, 2018 14:34