Тау тыныд, Трокай агай!

Удмурт Дунне
By Удмурт Дунне Январь 16, 2018 13:02

Тау тыныд, Трокай агай!

Тазьы нимаськиз Ижысь Тодосчиослэн юртазы ортчем ужрад. Со сӥземын вал Трокай Борисовез буре ваёнлы.

Торжественное мероприятие, посвященное Трокаю Борисову

Ужрадэз шулдыртӥзы усточиослэн элькун школа-интернатысьтызы «Шудон»

Трокай Борисов — удмурт калыклэн удалтэм пиез. Солэн тужгес но бадӟым ужез — Удмурт Элькунмес кылдытэмез. Та понна сое ми арлы быдэ данъяськомы. Мон «Дэменэн» кивалтон вакытэ солы сӥзем премия но тупатӥмы.

Трокай агайлэн биографиеныз тодматскыса, воксё абдрано: гимназиын дышетскытэк, Санкт-Петербургысь университетэ пырыны быгатэм! Нырысетӥ курсысен ик кусып тупатэм Дэри ёросысь Люк черкогуртын вордскем Д. Зеленинэн — Наукаосъя академилэн член-корреспондентэныз, наукаен вырыны кутскем.

Научной ужез сӥземын удмуртъёслэн вашкала культуразылы, «Шайтан уллян» сэбедлы. Али со нимаське «Великтэм».  Та сэбед ортчытӥське Будӟынналэ (Шундыез данъян праздник дыръя) — тулыс музъем гырыны вуыку. Будӟыннал — со удмуртъёслэн Выль арзы. Сое пусъён азьын юртъерзэс сузяло, котырзэс чылкытато но шайтанэз улляло. Улляло ӝутскем мылкыдын, кесяськыса, тачыртыса, юртъерысь вань сэрегъёсыз зыръёсын йыгаса, омыре пыӵалысь ыбылыса. Шайтанэз гурт сьӧры уллямзы бере быдэс ар гань-гань уло.

Та сэбедлэн дуныз туж-туж бадӟым. Со возьматэ удмуртлэсь дуннеез аспӧртэм валамзэ: улонын нокинэ виыны уг яра, пе, шайтанэз но улляно гинэ. Паймод: Трокай агай егит дыръяз ик ятвылтэм удмуртъёслэсь нодо луэмзэс, лэчыт визьмын улэмзэс.

Трокай агайлэн лулкужмыз узыр, бадӟым: дышетон удысъя министр дыръяз но, Удмуртиысь облисполкомен (правительствоен) кивалтыкуз но, удмурт учебникъёс, удмурт-ӟуч кыллюкам дасяны, статьяос гожъяны вуылӥз. Туж сюлмаськиз удмурт кадръёс дасяны. 1921-тӥ арын валтӥсь университетъёсы но институтъёсы 100 удмурт нылъёсты но пиосты дышетскыны келяз. Зэм, соку сютэм ар луэмен валче 20-ез гинэ мынӥзы. Нош вуоно араз 200-зэ келяз, эшшо ар ортчыса — 400-зэ.      К. Гердэз, солэсь Инмарен сётэм быгатонзэ валаса,  косӥз шаермылы сӥзем музей, писательёслэсь огазеяськонзэс кылдытыны, «Муш» но «Кенеш» журналъёс усьтыны. Трокай агай тыршемен валче усьтӥськизы театральной техникум, педучилищеос, пединститут, мединститут, Удмурт театр.

Трокай агай ноку власть доры ӧз кыстӥськы ке но, сое котьку тӧрое бырйылӥзы. Партилэн Калмыкиысь обкомаз но нырысетӥ секретаре пуктӥзы. Нош элькунамы со ас интыяз И. Наговицынэз дэмлалляз, ачиз солы воштӥсь кариськылӥз. Но тыршемзэ дунъям интые, сое 3 пол партиысь куштылӥзы, 4 пол судэ сётъязы. Укыр йыро луэменыз, судлэсь мозмытскыны быгатылӥз, адвокатэз медъятэк.

Трокай агай улонзэ сӥзиз ас калыкезлы, удмуртъёсты кивалтӥсе пуктылыны турттӥз. Удмурт школаос усьяз, отын вордскем кылын дышетӥзы котькуд предметэз: географиез но, биологиез но, математикаез но… Со тыршемен валче собранилэсь протоколъёссэ но, налог квитанциосыз но — вань документъёсыз удмурт кылын гожъязы.

Асьмелы туннэ Трокай агайлэсь адӟем карыса ужаны кулэ. Со вал чылкыт сюлэмо но ӟырдыт мылкыдо. Котькуд удысын тыршиз керӟегъяськытэк, удмурт сямъя. Допросъёсын, националист шуыса янгыше уськытыкузы, нокинэ ӧз вуза, «сьӧлыксэ» мурт вылэ ӧз погыльты. Удмуртъёслэсь удмуртлык понна нюръяськемзэс ас вылаз басьтӥз, мон косӥ, шуиз.

Трокай агай выллем ик — юн мылкыдо, удмуртлыкез утён понна нюръяськись — В. Савельев профессор. Шумпотымон, Тодосчиослэн юртазы шулдыръяськон дыръя Владимир Никифоровичез данъязы культурая но туризмъя министр В. Соловьёв, Алнаш землячестволэн тӧроез Н. Михайлов, Удмурт Элькунысь Тодосчиослэн огазеяськонзылэн вице-президентэз И. Рысин профессор но мукетъёс. Алнашын солы «Алнаш ёросысь дано адями» ним сётэмын. Т. Борисовез но В. Савельевез сӥ-дан карыса, ужрадэз шулдыртӥзы усточиослэн элькун школа-интернатысьтызы «Шудон», Алнаш ёросысь «Ӧркагурт кенакъёс», Пичи Пурга ёросысь Куреггуртысь «Азвесь нюжа», Ижкарысь «Чильтэр» но «Задор мылкыд» ансамбльёс.

Альберт РАЗИН

Туспуктэм: snioo.ru

 

Удмурт Дунне
By Удмурт Дунне Январь 16, 2018 13:02