Шӧкыч: Ӵыжы-выжы, пе…

Удмурт Дунне
By Удмурт Дунне Январь 11, 2018 17:10

Шӧкыч: Ӵыжы-выжы, пе…

Ӧс куспытӥ потыкум, йыгмыт, таза мугоро воргорон кизэ мычиз, юэмез вань:

— Кылбурчи ук тон?

— Ӧвӧл, кинэн ке сураськоды, — мыньпотӥ.

— Соку — писатель. Кызьы вал ай нимды?

— Писатель но мон ӧвӧл. Микол нимы.

— Зэм но, нимдыя писатель ӧвӧл. Мон соосты киысьтым вань чиньыосме кадь ӟеч тодӥсько: книгаоссэс суредасько. Тонэ адӟылэме вань кадь потӥсько. Кызьы нимыд?

— Лазыр Микол.

— Тон суредась вал. Озьы-а?

— Суредась но ӧвӧл, — шуисько, киме мозмытыны вырыса.

— Нимдэ вера ай, — нош ик юа тодмое.

— Кӧня пол верай ини…

— Йырдэ кур эн кары, эше, мынам йыры сыӵе программаен ужа. Мон одно тодо, кин тон…

— Микол, — куараме золгес карыса, шуисько.

— А! Кырӟась, дыр, тон. Сцена вылысь адӟемме тодӥсько, луоз.

— Уг кырӟаськы.

— Нош кыӵе гуртысь тон?

— Изошур гуртын вордӥськи. Кылэмед вань-а?

— Вань, вань. Нош тодӥськод-а тон, асьмеос ӵыжы-выжыос шуыса? Мынам мемие Ожмос гуртысь, нош солэн сузэрезлэн пиез Юбер Толя — тодмо кылбурчи, тулыспалэ 60 арес тырмоз. Тодӥськод ук сое?

— Ӧй вала,  — паймемме ватытэк, шуисько, — кызьы асьмеос ӵыжы-выжы луиськом?

— Ойдо ужан дорам, — кӧня ке малпаськыса, шуиз выль эше, — валэкто.

Тодмое кудӟытӥсьсэ тырмыт бекыръям, шӧдске. Кабинетсэ мырдэм шедьтӥз. Чашкаосы чай лэзьяз но нош ик юанзэ сётӥз:

— Нимыд кызьы вал ай?

Пумен ватса:

— Эн кепыра, чайдэ ю.

Сӥям чаез ымдурам вуттӥ — курытэз но пӧлаз вань вылэм.

— Асьмеос анайёсмыя  ӵыжы-выжыос луиськом. Мын ай, ӟенеликлы бызьылы.

— Бызьылы вылэм но, руль сьӧрын ук мон.

— Нош мон ӧвӧл. Таӵе пумиськонлы коньдондэ эн жаля, вай, ачим бызьыло.

Выль ӵыжы-выжые коньдонме куриз но лавкае кошкиз. Мон возьмаса кема пуки, малпаськи, кызьы родня луиськом? Таки ӧй вала…

Алексей Трубачев

Удмурт Дунне
By Удмурт Дунне Январь 11, 2018 17:10