Россилэн Президентэз луон понна кандидатъёссэ дэмлаз 24 партия

Удмурт Дунне
By Удмурт Дунне Январь 19, 2018 17:50

Россилэн Президентэз луон понна кандидатъёссэ дэмлаз 24 партия, регистрация пыр потӥз 14-ез гинэ. Али ваньзы соос кинюртэмъёс бичало.Ку тодомы, кӧня нимтулъёс луозы бюллетеньын 18-тӥ мартэ? 

Быръёнъёсъя правоосты тодыны кулэ егитысен ик. Эграысь 1 номеро школаын та пумысен пумиськон ортчиз.

Дэмлан — со пусъён ӧвӧл на

Россилэн Президентэз луон понна кандидатъёсты дэмла яке партия, яке адямиос асьсэос ӵектӥсько. Россиысь Быръёнъёсъя валтӥсь комиссиын (ЦИК-ын) асьсэды асьсэос дэмласьёслэсь уведомлениоссэс кутон 7-тӥ январёзь мынӥз. Куриськон сётӥз 46 адями. Нош партиос быгатӥзы на кандидатъёссэс 12-тӥ январёзь дэмланы. Озьы 13-тӥ январе тодмо ни вал: ЦИК-е вуэм уведомлениос пӧлысь 24-ез — пӧртэм партиослэсь. Но партиосын дэмлам кандидатъёс пӧлысь регистрациез ортчиз 14 адями гинэ. Уноезлэсь бумагаосысьтызы кыӵе ке тырмымтэзэ, шексэ шараязы. Россиысь ЦИК-ын пусйизы: 3-ез партия съездъёссэ, кабъёсты тӥяса, ортчытӥз, соин ик кандидатъёссы регистрация пыр ӧз потэ. Сыӵе «шудтэмъёс» пӧлы шедизы «Женский диалог», «Народ против коррупции» но «Партия малого бизнеса России».

Озьыен, туннэ нуналлы партиослэн нимынызы быръёнъёсы мыно: Владимир Жириновский (ЛДПР), Павел Грудинин (КПРФ), Ксения Собчак («Гражданская инициатива»), Григорий Явлинский («Яблоко»), Борис Титов («Партия Роста») но мукетъёс. ВЦИОМ-лэн юалляськонэзъя, туннэ быръёнъёс луысалзы ке, 54,3 процентэз калык Владимир Путин понна куаразэ сётысал, 5,1 процентэз Павел Грудинин понна дурбасьтысал, 2,8 процентэз — Владимир Жириновский понна, Борис Титов, Ксения Собчак, Григорий Явлинский быдэн 0,3-0,4 процент котырын люкасалзы.

Нялтас вераса, вань пусйиськем кандидатъёс быръёнъёсъя фондзэс кылдытон понна счётъёс усьтӥзы ни. Уноез али сюлмасько кинюртэмъёс бичан сярысь. Кинюртэмъёсын бумагаоссэс соос ЦИК-е 31-тӥ январе 18.00 часлы (Москва дыръя) вайыны кулэ.

Парламентэ пырись 4 партиос гинэ — «Единая Россия», КПРФ, ЛДПР но «Справедливая Россия» — кинюртэмъёс бичатэк но, асьсэ кандидатъёссэс дэмланы быгато. Но таос пӧлысь КПРФ но ЛДПР гинэ асьсэ кандидатъёссэс дэмлазы, «Единая Россия» но «Справедливая Россия» Владимир Путин понна дурбасьтэмзэс веразы. Парламентэ пырисьтэм партиос быдэн 100 сюрс кинюртэм бичано луозы, Россилэн котькуд субъектысьтыз тужгес троссэ — 2,5 сюрсэн. Нош асьсэос асьсэды дэмласьёс бичано луозы тужгес ӧжытсэ 300 сюрс кинюртэм, субъектлы быдэ 7 сюрс 500-лэсь трос медаз луы.

Кинюртэмъёсты бичан йылпумъяськем бере 10 нунал ӵоже соосты ЦИК-ын эскерозы на. Озьыен, Россилэн Президентэз луон понна пусйиськем кандидатъёслэсь огъя списоксэс асьмеос 10-тӥ феврале гинэ тодом ай. Та бӧрсьы ог арня ортчыса, кутскоз иворъёсты вӧлмытон ёзъёсын агитация.

Дурбасьтэмед потэ? Лыкты?

Элькунамы тужгес но син азе йӧто В. Путин понна кинюртэмъёс бичанъя пунктъёс. Соос республикаысьтымы городъёсын интыяськемын: Ижысь «Эльгрин», «Петровский», «Сигма» бизнес-центръёсын но Сарапул, Глазов, Воткинск городъёсысь гипермаркетъёсын. Кинюртэмзэс пуктыны мылкыд карисьёс мукет городъёсысь, ёросъёсысь, гуртъёсысь но вуыны быгато, но сьӧразы одно мед луоз паспортсы.

«Единая Россия» партиысь активистъёс куремъя Россиысь 84 субъектын В. Путин понна кинюртэмъёс бичанъя нимысьтыз нунал тупатэмын вал. Озьы одӥг нунал ӵоже гинэ та партилэн активистъёсыз В. Путин понна 200 сюрс пала кинюртэм бичазы, ачиз Владимир Владимирович быръёнъёсы нокыӵе партилэн нимыныз уг мыны ке но.

Верамы ни: партилэн нимыныз кандидатэ мынӥсь адями 100 сюрс кинюртэм бичаны кулэ луоз, ачиз ассэ дэмлась — 300 сюрс. Но Россиысь ЦИК-е ваёно талэсь 10 процентлы тросгес кинюртэмъёс. Угось эскеронъёс дыръя 5 процентэзлэсь тросэз кинюртэмъёс умойтэмен лыдъямын луизы ке, кандидат быръёнъёслэсь палэнтэмын луоз.

Владимир Путин понна 1 миллионлэсь трос кинюртэм люкамын ни. Та сярысь ивортӥзы кандидатлэн быръёнъёсъя штабаз. Валамон, та кулэезлэсь трос ини. Озьы ке но Владимир Владимировичлэн штабаз огкылэ вуизы: кинюртэмъёсты бичамысь уз дугдэ, котькуд мылкыд карись дурбасьтэмзэ вераны мед быгатоз на.

— Кинюртэмъёс бичан бордын ужазы Россиысь Калык фронтлэн (ОНФ) радаз пырисьёс но, «Молодёжка ОНФ» команда но. 1 миллионлэсь трос кинюртэмъёс бичаны луиз вакчи дыр куспын. Озьыен, калык оске Путинлы. Талы паймонэз ӧвӧл, угось Путин кивалтон вакытэ кунмы выльысь улӟиз кадь. 1990-тӥ аръёсы асьмеос ӧм но малпаське ни, экономикамы куке-соку азинскоз, выль предприятиос усьтӥськозы, дуннеын Россилэсь мылкыдзэ лыдэ басьтозы шуыса, — пусйиз ОНФ-лэн штабезлэн одӥгез тӧроез Ольга Тимофеева.

Калык фронт кылдэм дырысен туэ 7 ар тырмоз ни. Сыӵе движение кылдытыны дэмлаз вал ачиз Владимир Путин. Движение огазея мыло-кыдо, кунмылэн ӵуказе нуналыз сярысь сюлмаськись адямиосты. ОНФ азьын сылӥсь ужпумъёс — Президентлэн указъёсызлэсь быдэсъяськемзэс чаклан, коррупциен нюръяськон, калыклэсь улонзэ ӟечгес каронъя ужпумъёсты ӝутон.

Елена Миннигараева

Удмурт Дунне
By Удмурт Дунне Январь 19, 2018 17:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*