Пичи Пурга ёросысь Аксакшур школаын вуоно арысен дышетскыны уз яра

Удмурт Дунне
By Удмурт Дунне Январь 24, 2018 12:17

Аксакшур школалэн директорез Александр Павлович Ушаков: Ӟеч малпанэн улӥськом!

Пичи Пурга ёросысь Аксакшур школа секыт югдуре шедемын: солэн юртэз вужмемын. Вуоно арысен отын урокъёс нуыны уз яра ни. Кытын но кызьы азьланяз дышетскозы пиналъёс?

Аксакшур школа пуктэмын 1952-тӥ арын. Пулэсь лэсьтэм юрт понна 66 ар — бадӟым арлыд. Борддоръёсыз юнматэмын, мумыкоръёсыз пыкъямын ни. Сисьмем коръёс шунытэз возьыны уг быгато, укноос пыр тӧл пыре.

— Туала куронъёслы школамы уг тупа: спортзалмы ӧвӧл, туалетмы кырын, юртмы кыӵе, асьтэос адӟиськоды… —  вера школалэн кивалтӥсез Александр Павлович Ушаков. — 2016-тӥ арын эскерон ортчытэмын вал, соя школаын 2 ар дышетскыны лэземын на,  шуэмын: юртэз пыр-поч тупатъяса, толыкез уз луы ни, школа 60 процентлы вужмемын.

Озьыен, вуоно арын та юртын дышетскыны уз луы ни. Соин ик  югдурез гужем куспын сэрттоно-пертчоно луоз. Нош школа гуртын туж кулэ!  Та пумысен гуртоос но туж сюлворо. Гурт бадӟым — ог 700 пала улӥсез, уж вань. Пиналъёслэн лыдзы уг кулэсмы, 70-100 возиське, али 69 дышетскисьсы. Туэ нырысетӥ классэ 8 кузя пиналъёсты возьмало.

— Марысь мар ке, малпамы вал администрациын яке нылпи садын буш кабинетъёсты тупатыны. Но администрация вӧзын магазинъёс сыло, законъя школалы матын курытэныз вуз карыны уг яра. Частной ужбергатӥсьёс ӝажыоссы вылысь виназэс утялтыны пумит луозы, дыр. Малпаськомы, оло, администрациысь, нылпи садысь кабинетъёсты тупатъям интые, умойгес луоз выльысен эскеронъёс ортчытыны. 2 ар куспын школалэн юртэз урод пала  ӧз воштӥськы ке, оло, дышетсконэз та юртын ик азьланьтыны лэзёзы на. Ӟеч малпанэн улӥськомы, — вера Александр Павлович.

Та югдурысь потыны эшшо одӥг амал вань на — нуллыны пиналъёсты мукет гуртъёсы. Кылсярысь, Кечолэ. Аксакысен со 12 иськемын. Но татын бадӟым кышкытлык кылдэ. Нырысь ик, нылпиосты нуллыны 3-4 автобус кулэ луоз, эшшо дышетӥсьёс вань на. Собере, Кечол школае вуон понна чугун сюрес вамен выжыны кулэ. Нош со ворсаське ке, куддыр час, час но ӝыны усьтӥськемзэ возьмано луэ — поездъёс ялан солань-талань ветло. Кышкыт но, дырыз дыръя дышетскыны но уд вуы. Куинетӥез шуг-секыт: Кечолын сотэк но уно дышетскисьёс. Мукет гуртысь пиналъёс отын дышетскизы ке но, 2-тӥ сменаын гинэ. Соин ик таиз амал понна кивалтӥсьёс дур басьтыны уг дырто.

Вуоно арын та юртын дышетскыны уз луы ни. Соин ик  югдурез гужем куспын сэрттоно-пертчоно луоз.

Зэмзэ ке, гуртын выль школа пуктон пумысен пичи вамышъёс кемалась лэсьтӥськыны кутскизы ни. Нырысетӥ проект гожтэмын вал ай 1994-тӥ арын, инты но чакламын вал ни. Но соку школа пуктыны ӧз кылды. Берло аръёссэ Аксакшуре огпол гинэ ӧз ветлэ Удмуртилэн азьвыл Тӧроосыз Александр Волков, Александр Соловьев. Кылем арын школалэн кивалтӥсез вань кулэ кагазъёсты туала Тӧро Александр Бречалов дорозь вуттӥз.  Но та дырлы элькунлэн ас уксёеныз выль школа пуктыны луонлыкез ӧвӧл.

— Кӧня ар гырлые кокаськомы ни, — вера Пичи Пурга ёросысь дышетонъя управленилэн кивалтӥсез Ольга Полканова. — Тодӥмы вал, Аксакшурын школа пуктон ужъёсты 2023-тӥ арын кутскыны ӧдъяло шуыса. Отчыозь кӧня улоно на! Нош школа куашкан калэ вуэмын ни. Гожтэтъёс гожъяса, ужпумез вырӟытӥмы, табере шуо, ужъёс 2019-тӥ арын кутскозы. Но кызьы зэмзэ но радъяськоз югдур, ум тодӥське. Аксакшурез вератэк, ёросысьтымы Шоринь Юриын но школа йылаз-пумаз вуттымтэ, лэсьтӥськонэз 2015-тӥ арын дугдытӥзы. Озьы ик Пичи Пургалась школаосмы тырмемын. Министерствое 500 интылы школа пуктон пумысен вазиськемын.

Оскон федерал программалы гинэ. 2025-тӥ арозь кыстӥське улосвылъёсын выль дышетскон интыос кылдытонъя программа. Отчы элькунмы мылысь-кыдысь пыриське, кылем арын, кылсярысь, софинансирование амалэн ӝутэмын но усьтэмын Можгалан но Ижын  школаос. Осконо, азьланяз гуртъёсын но выль юртъёс пуктӥськозы шуыса. Уго Аксакшурын кадь вуж школаос, нылпи садъёс элькунамы уно на, Пичи Пурга ёросын гинэ соос 10.

Мария Векшина

 

Удмурт Дунне
By Удмурт Дунне Январь 24, 2018 12:17