Кызьы уло 862 нганасанъёс?

Удмурт Дунне
By Удмурт Дунне Январь 17, 2018 16:39

Кызьы уло 862 нганасанъёс?

http://www.ethnomuseum.ru

Тросаз школаосын нганасан кылэз уг но дышето ни — уго ӧвӧл учебникъёссы, нганасан кылын книгаоссы.

Таймыр музъем вылын уло 5 Урал кыл семьяысь калыкъёс: долганъёс, нганасанъёс, ненецъёс, эвенкъёс, энцъёс. 2-ез калыкъёс пыртэмын Россилэн Горд книгаяз — нганасанъёс но энцъёс.

2010-тӥ аре ортчытэм переписья фин-угоръёслы матын луись самодийской выжыысь энцъёс 300 кузя гинэ кылемын на, нганасанъёс — 862 адями, соос пӧлысь 125-ез гинэ анай кылынызы верасько на. Та 2 выжыосысь потэмын Дудинки карысь азьветлӥсь Валерия Болгова. Со лулысь-сюлмысь, вань кужымзэ сётыса, утьыны тырше нганасанъёслэсь лулчеберетсэс, юрттӥське Таймырын улӥсь мукет калыкъёслы но.

— Таймырын 125 семейной общинаос лыдъясько, соос пӧлысь лулчеберетэз зэмзэ но утисьёс, калыклэсь улонзэ умоятон понна ужасьёс чиньыен лыдъямон — со милям, нганасанъёслэн, общинамы, долганъёслэн огазеяськонзы но выжы калыкъёслэн «Мукустур» общиназы. Нош мукетъёсыз сям-йылолъёсты гинэ утё на: чорыгало, пӧйшурало. Туала кылын вераса, улыны йӧндыро, — вера Валерия Болгова.

Таймырын тросэз калыкъёс уло гуртъёсын, курадӟо уж ӧвӧлэн, басьто социальной пособиос но пенсиос. Куд-огъёсыз уксё поттыны выро кутэм чорыгзэс но будэтэм пужейзэс вузаса.

http://www.ethnomuseum.ru

Нганасанъёс. 1958-тӥ ар.

— Выжы калыкъёсты утёнъя уно катъёс вань, но уж вылын соос уг быдэстӥсько. Ми жадим ини: общинаослы нокин уг юрттӥськы, — шуэ Валерия Болгова. —  Асьме кужыменымы Норильскын 114 квадрат метр быдӟа висъетэз арендае басьтыны быгатӥм. Татын кылдытомы пужей кулэсь пыдкук вуронъя мастерской, усьтэмын ни нганасан выжыысь суредасьлэн Мотюмяку Турдагинлэн адӟытонэз.

Арысь аре нганасанъёслэн лыдзы ичиёме. Тросаз школаосын нганасан кылэз уг но дышето ни — уго ӧвӧл учебникъёссы, нганасан кылын книгаоссы. Азьвыл поттэмъёссэ но шедьтыны шуг — соос ӧжыт.

— Милям 2 класслы гинэ учебникъёсмы поттэмын. 1990-тӥ аръёсы Светлана Жовницкая гожтӥз нырысетӥ букварь, ужан тетрадьёс но методической книга, берлогес со ик 2-тӥ класслы учебник но поттӥз, — вера Валерия Болгова. —  Мон уксё шедьтӥ вал 1-тӥ класслы букварез, туала амалъёсты кутыса, выльысен поттыны. Нылпиос, наушник поныса, нганасан куараосты но мед кылозы шуыса, уго соос вуно ни. Но кивалтӥсьёс монэ ӧз кылэ, букварь выльысен вуж сямен ик потӥз.

Мария Векшина

Туспуктэмъёс: www.ethnomuseum.ru

Удмурт Дунне
By Удмурт Дунне Январь 17, 2018 16:39