Кыӵе законъёс улонэ пыӵало 2018-тӥ арысен?

Удмурт Дунне
By Удмурт Дунне Январь 12, 2018 10:00

Котькуд выль ар мар ке выльзэ вае. Туэ но 1-тӥ январьысен улонэ пыӵало кӧня ке пӧртэм федерал законъёс но Правительстволэн постановлениосыз.

Корнилов

Адями котьку оске ӟечезлы.

Ёрмись семьяос 1-тӥ но 2-тӥ пиналзы понна пособиос басьтозы.

Та пособиос тыриськыны кутско ни 1-тӥ январьысен. Сое басьтыны быгатозы сыӵе семьяос, кытын адямилы быдэ доход улосын улыны тупатэм минимумлэсь 1,5 поллы бадӟымгес уг луы.

1-тӥ пинал понна пособие тыронлы коньдон висъяськоз федерал бюджетысь. Нош 2-тӥ пиналлы пособие тыриськоз ни анай капитал чотын. Пособиослэн быдӟалазы — улосын пинал понна улыны тупатэм минимум мында. Озьыен, котькуд улосын со пичияк висъяськыны быгатоз.

Со сяна, анай капиталэз сётъян дыр эшшо 3 арлы нуйтэмын. Табере анай капиталэз кутыны луоз на пиналэз школае мынэмезлэсь азьвыл ясельной группаосын возёнлы но.

 МРОТ будоз.

Пичиез уждун (МРОТ) улыны тупатэм минимумлэн 85 процентэз быдӟа луоз — 9 сюрс 489 манет.  Нош 2019-тӥ арын МРОТ но улыны тупатэм минимум огкадесь луыны кулэ ни.

Бензин акцизъёс 50 копейкалы йылӥзы.

Россиысь Коньдон ужпумъёсъя министерстволэн верамезъя, озьы кунмылэн бюджетаз ватсаса 55 миллиард манет вуоз. Со сяна, будӥзы тамаклы, никотинэн электрон системаослы акцизъёс. Воштӥськизы автомобильёс понна акцизъёс но. 200-ысен 300-озь вал кужымен ужась двигательёс понна ставка 714 манет (1 вал кужым понна) луиз, 300-ысен кутскыса 400 вал кужымозь — 1 сюрс 218 манет (1 вал кужым понна), 400-500 вал кужымен — 1 сюрс 260, 500-лэсь трос вал кужымен — 1 сюрс 302 манет. Правительствоын оскыто, та юрттоз Россилэн бюджетаз ватсаса 14 миллиард манет бичаны.

Валамон ини, бензин акцизъёс будэмен, йылоз бензин дун но. Шорлыдын 60 копейкалы.

Пенсие потэмъёслы пенсизэс вазьгес индексировать карозы.

Пенсие потэмъёслэсь пенсизэс вуоно толэзяз ик индексировать карозы. Кылсярысь, адями ужысьтыз 1-тӥ августэ кошкиз ке, солэн пенсиез индексировать каремын луыны кулэ ни 1-тӥ сентябрьысен. шуом, со ужысьтыз кошкиз  ке 30-тӥ августэ, пенсиез индексировать каремын луыны кулэ озьы ик 1-тӥ сентябрьысен. Но та уг вера на, тӥ коньдондэс соку ик басьтоды шуыса. Пенсионной фондлы кӧня ке толэзь кулэ ваньзэ эскерыны, лыдъяны-чотаны. Но пенсионерлэн коньдонэз нокытчы уз ышы, вань кулэ луись индексациез со, ог 3-4 толэзь ортчыса, суменак басьтоз.

 Пенсиос но уждунъёс йылозы.

Ужасьтэм пенсионеръёслэн пенсизы будоз 3,7 процентлы. Индексацилэн быдӟалаез инфляцилэсь бадӟымгес луоз. Со сяна, 1-тӥ январьысен будозы кун службаын, юстиция удысын ужасьёслэн, дипломатъёслэн окладъёссы.

4 процентлы будозы ожгарчиослэн, югдурез утисьёслэн окладъёссы, уголовно-исполнительной системаын ужасьёслэн, тылпулэсь утисьёслэн, национальной гвардиын службазэс ортчисьёслэн окладъёссы но мукет. Будыны кулэ бюджет удысын ужасьёслэн уждунъёссы но.

 Эмъянэ вуоз телемедицина.

Россиын табере законъя луэ ни уже кутыны телемедицинаез. Сое врачъёс азьвыл но кутылӥзы (почта но мессенджеръёс пыр анализъёсты, заключениосты келяллязы), но туж кышкаса.  Нош табере, тазалыкез утён удысэ информатизация вуэмен, врач быгатоз рецептэз электрон амалэн но гожтыса сётыны, висисьёслэсь картаоссэс электрон системае пыртыны кутскозы, озьы адями котькыӵе врач доры мед вазиськоз, эмъясь быгатоз картазэ электрон амалъя но учкыны. Законын бадӟым саклык висъямын пациентъёслэсь персональной даннойёссэс, больницаысь картаоссэс утёнлы.

 Куштэм нылпиослы социальной пенсия тыриськоз.

Куштэм нылпиос, анай-атайёссы тодмо ӧвӧл ке, социальной пенсия басьтыны кутскозы — толэзьлы быдэ 10 сюрс 68 манет 53 копейка.

1956-тӥ арысен улонэ пыӵа закон, кудӥзъя сирота кылем нылпиослы социальной пенсия тыриське (по потере кормильца). Но пиналъёс, кинлэн анай-атаез тодмо ӧвӧл, сыӵе пособиос ӧз басьялэ. Табере куштыса кельтэм пинал, солэн анай-атаез тодмо ӧвӧл ке но, пособие басьтоз.

 Кун услугаос басьтыны капчигес луоз.

Госуслугаос басьтон понна куриськон, документъёс, информация сётыны луоз котькуд многофункциональной центре, улон интыдэс лыдэ басьтытэк. Кылсярысь, тӥ улӥськоды Удмурт шаерын, но огдырлы кошкиды мукет улосысь кыӵе ке городэ. Госуслугаос пумысен тӥ отчы но вазиськыны быгатӥськоды.

Ваньмыз та юрттоз адямиослэсь дырзэс но коньдондэс шыръяны.

 Кибератакаос понна пытсэт сьӧры пуктыны быгатозы.

Кун органъёслэн, обороная предприятиослэн, больницаослэн, транспортлэн, связьлэн, коньдонэн герӟаськем удыслэн, энергетикалэн, атомной, ракетно-космической промышленностьлэн, химпромлэн, металлургилэн автоматизированной системаосазы кибератакаос сярысь. Сыӵе йыруж понна табере уголовной кыл кутон юнматэмын.

Кун Думаын пусйизы: экономика кибератакаосын сэрен уно ыштонъёс адӟыны быгатэ. Соин ик кышкытлыклэсь утиськон понна сыӵе закон кутыны кемалась кулэ ни вал. Хакеръёсты троссэ 10 арлы пытсэт сьӧры келяны быгатозы.

 Мессенджеръёс «ватскем» адямиосын ужаны уз ни быгатэ.

Таиз закон озьы ик герӟаськемын йыружъёсты дыраз алонэн. Мессенджер — ог-огедлы ивор туж ӝог келяны юрттӥсь программа. Туала вакытэ тужгес паськыт кутӥсько смартфонъёслы, планшетъёслы чаклам мессенджеръёс. Но табере соосты ватскыса кутыны уз ни луы. Идентификация лэсьтӥськоз абонентлэн телефон номерезъя но мессенджер но связья оператор вискын гожтэм огкылъя. Асьсэды ватыса улӥсьёсын ужамзы понна мессенджеръёслэсь операторъёссэс штраф тырытозы. Гражданъёс понна штрафлэн быдӟалаез  3-5 сюрс манет, кивалтӥсьёс понна — 30-50 сюрс манет, нош огазеяськонъёс понна —  800 сюрсысен 1 миллион манетозь.

Закон уг кутӥськы калыкез эскерыса возён понна, но со туж кулэ, йыружъёсты сэрттыку. Кун Думаын пусъё: таӵе утиськон амалъёс Европаын вазенгес кутӥсько ни, соос йыружъёсты дыраз шараяны, нош кытӥяз алыны но юртто.

 Тамак пум куштэм понна — штраф.

Воштонъёс пыртэмын тылпулэсь утиськонъя куронъёсы. Кылсярысь, чугун сюресъёс но машинаен ветлон сюресъёс кузя уг яра куяны пӧсь шлакез, эгырез, суэз, со сяна, мынӥсь поездысь но машинаысь уг яра куяны ӵындӥсь тамак пумъёсты, спичкаосты.

Гуртын ю тысез утялтон, турын дасян вакытэ тамак кысконо нимысьтыз чаклам интыын гинэ. Огнетушительтэк техникаен ужаны уг яра. Куроез, куасьмем турынэз но пуэз связья езъёс дорысь ӧжытсэ 15 метр кеме гинэ люканы яра.

Сад-бакча возисьёс, нимаз коркан улӥсьёс одно ик хозяйство котырзэс утялтыса возёно луозы: жуг-жагез бичано, турынэз турнано.

 Россиысь 4 улосъёсын шутэтскем понна выт тыроно луоз.

Туэ 1-тӥ майысен Россиын улонэ пыӵалоз эксперимент: Крымын, Алтай, Краснодар но Ставрополь улосъёсын шутэтскисьёс тыроно луозы аспӧртэм выт — курорт сбор.  Курортын котькуд нунал улэмзы понна — 50 манет. Зэм, та лыдпус пӧртэм вакытъёсы но пӧртэм интыосын висъяськыны быгатоз, шуом, Крымын — 25-30 манет, Алтайын — 30 манет, Ставропольеын — 30-50. Но туэ со 50 манетлэсь трос луыны кулэ ӧвӧл. Та эксперимент кыстӥськоз 2022-тӥ арозь.

Елена Миннигараева

 

Удмурт Дунне
By Удмурт Дунне Январь 12, 2018 10:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*