Кузебай Герд быгатӥз, лэсьтӥз… Мар верало удмурт югдытӥсь сярысь тодосчиоос?

Удмурт Дунне
By Удмурт Дунне Январь 14, 2018 13:54
музей красильникова

Литературовед Александр Шкляев: Шаерамы Кузебай Гердлэн но Трокай Борисовлэн тыршемзыя 1926-тӥ арын Писательёслэн огазеяськонзы кылдытэмын вал.

12-тӥ толшоре Ижысь Г. Красильниковлэн музей-квартираяз Кузебай Гердлы сӥзем пумиськон ортчиз. Тодосчиос, дышетӥсьёс, дышетскисьёс но вань мылкыд карисьёс вераськизы удмурт азьветлӥсьлэн, тодосчилэн, гожъяськисьлэн творчествоез но ужъёсыз сярысь.

Кузебай Гердлэн улонэз туж вакчи но секыт вал, но лэсьтэм ужъёссэ тодыса, паймоно: со кельтӥз ӟеч пытьы уно удысъёсын, улытозяз аслэсьтыз калыксэ вырӟытыны-сайкатыны тыршиз.

— Огласянь, Кузебай Герд ачиз азе котьку но «быгато-а мон?», «лэсьто-а мон?» юанъёсты пуктылӥз, — шуэ тодосчи, литературовед Вера Пантелеева. — Мукет ласянь, со котьку шуылӥз: мон быгато! Мон лэсьто! Мон ке ӧй — кин?

Кыӵе гинэ уж борды ӧз басьтӥськылы Герд — унояз удысъёсын со вал нырысетӥосыз пӧлын, уго соку гинэ пичиен-пичиен азинскыны кутскизы дышетон, наука. Паймоно солэн дӥсьтэмезлы, ӟырдыт мылкыдызлы, ас кужымезлы оскемезлы.

— Шаерамы солэн но Трокай Борисовлэн тыршемзыя 1926-тӥ арын Писательёслэн огазеяськонзы кылдытэмын вал, — вераз тодосчи, литературовед Александр Шкляев. — Совето Союзысез кылдӥз ай 1936-тӥ арын гинэ. Макем азьлань мынӥллям вылэм удмуртъёс! Но, жаляса верано, бӧрысь кылдытӥсьёс ик огазеяськонысь поттэмын вал. Улон сюрессы но макем вазь уриськиз. Азьвыл шуо вал, Гердэз, пе, ыбизы 1941-тӥ арын. Озьы кыл кутонэз Быдӟым ож вылэ куштыны выризы. Но бӧрысь тодмо луиз, К. Чайниковез 1937-тӥ арын быдтӥллям ни вылэм…

Урокъёсын, Кузебай Гердлэн улон но ужан сюресэныз тодматскиськом ке но, со сярысь огъя тодон-валан гинэ басьтӥськом. Та дано удмурт югдытӥсь, гожъяськись но тодосчи сярысь трос гожъямын-верамын ни ке но, вань ужъёсыз татчыозь калыкозь вуттэмын  ӧвӧл на.

музей красильникова

— Туннэ но Гердлэн вань ужъёсыныз рос-прос бичет поттэмын ӧвӧл, — ӧпкелиз тодосчи Валей Кельмаков. — Солэн ужъёсыз книгаысь книгае тупатъяса пыро, соос пыр авторлэсь кылзэ адӟыны-эскерыны уг луы ни. Син азяды пуктэ ай Брангуртысь песянайёслэсь но балеринаослэсь дӥськутсэс. Мынам малпамея, Герд та вакытлы ӵапак балериналы пӧрмытэмын. Жаляса верано, одӥг гинэ зарни букваосын гожтымон писательмес но ум быгатӥське данэ поттыны.

— Редактировать карон культурамы ӧвӧл. Соин одӥг бичетысь мукетаз вань ужъёс уг вуо яке воштӥськыса пыро, — валэктэ Александр Шкляев.

Валантэм, адӟомы на-а аслэсьтыз Гердлэсь гожъямъёссэ, малы ке шуоно рукописьёссэ ӵыжы-выжыосыз калыклы возьматыны лэзиллямтэ.

— Студентъёслы занятиосын мон тыршисько возьматыны Гердлэн почеркезлэсь воштӥськемзэ, — шуиз литературовед, Удмурт кун университетысь дышетӥсь Светлана Арекеева. — Чаклано ке 1-тӥ «Крезьчи» но 3-тӥ «Лёгетъёс» сборникысьтыз кылбуръёссэ, соку ик синйылтыны луэ кылызлэсь воштӥськемзэ. Кылсярысь, 1-тӥ книгаын бадӟым инты басьтэ фольклор. «Лёгетъёсысь» фольклорной образъёсты ум ни шедьтэ.

Пумиськонлэн кутсконаз ик В. Кельмаков Кузебай Гердлэсь образзэ парадной шуиз. Ужрадысен мукетъёсыз но соин соглаш луизы — мед югдытӥсьмылэн нимыз ӵемгес чузъяськысал но пумиськылысал, мед со сярысь тросгес адямиос тодысалзы. Бен, Гердлэсь нимзэ элькунысьтымы урамъёс, музей, гимназия нулло, солы сӥзем синпелет вань. Но зэмзэ но ассэ Гердэз но солэсь ужъёссэ асьмеос нуналлы быдэ тодамы ум вайиське, ӵемысь — вордскем яке кулэм нуналъёсаз гинэ. Удмуртъёс пӧлын сыӵе азьветлӥсьёс трос ӧй вал бере, соослэсь нимъёссэс золгес вӧлмытоно вылэм.

Елена Рябина

Туспуктэмъёс: vk.com (Г. Красильниковлэн музеез)

 

Удмурт Дунне
By Удмурт Дунне Январь 14, 2018 13:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*