Кизилиос верало: Мар луоз 2018-тӥ арын?

Удмурт Дунне
By Удмурт Дунне Январь 10, 2018 13:23

Кизилиос верало: Мар луоз 2018-тӥ арын?

Така.

Арды капчи уз луы, но удалтонды асьтэ бордысь потоз. Улонын пумиськись шуг-секытъёсты вормыны луонлыкъёсты трос, эшъёсты но юрттыны мылкыд карозы. Тужгес чакласьконо огнын улӥсьёслы: куддыр пӧсь яратон пӧяськонлы пӧрме. Кузпалъёслы ог-огзэс гажано, кинлэн ке семьяез йылоз. Гужем шорын шуныт палъёсы мынонлэсь возиське, дорады но тачак ужъёсты луозы. Кин ке выль интые улыны выжоз. Мурт веранъёсты пеляды эн понэ, сакгес кариськоно руль сьӧрын ворттылӥсьёслы.

 

 

Ош.

Нырысетӥ юрттӥсьёсты — семьяды но ӵош ужась эшъёсты. Огкылысь улӥды ке, бадӟым гурезез но берыктыны вормоды. Кемалы вунонтэм кылёзы командировкаосы потамды. Узыр эшъёс шедьтоды. Азьвыл тодмодэс пумиталоды. Секыт югдуре шедем адямиослы юрттэмды кык полэс шумпотонэн берытскоз. Ар пумын удалтон тӥ палан луоз, бадӟым уждун сяна, трос ӟечез вите. Яратӥсь сюлэмъёс семья кылдытозы.

 

 

кыктоос

Кыктоос.

Эшъёсты уногес луозы. Арлэн нырысетӥ ӝыныяз бадӟым воштӥськонъёс витё: кин ке ужзэ воштоз яке вылӥегес ӝутскоз, нош кин ке нылпиосызлэн сюлмаськонъёсыныз бызьылоз. Кияды шедем уждундэс соку ик быдтыны эн тырше. Улонды укыр бусьтыр яке чылкак колтыр луыны быгатоз. Но эн кышкатске, ыштонъёсты луизы ке но, соос соку ик бадӟым пайдаен берытскозы. Ар пумын коньдон ужъёсты радъяськозы. Эн вунэтэ тазалыкты сярысь но сюлмаськыны.

 

Кисло-кусло.

Семьяды нырысетӥ интыын луыны кулэ. Нылпиостылэн сюлмаськонъёссылы саклык висъялэ. Ужады выль вормонъёс басьтоды. Кизилияськон дырды вуэмын: асьтэлэсь ужъёстэс возьматоды, калык пӧлын трос вераськоно луоз. Эшъёсты пӧлын тросгес луозы тодмо адямиос но ужбергатӥсьёс. Ар кутсконын ужады выль воштӥськонъёс витё. Удыс бырйыкуды, чаклалэ, кузь коньдон-а яке юн семья-а тӥледлы дуногес. Юрттыны мылкыд карисьёс трос луозы, ваньмызлы эн оскиське. Мылкыдэз поромытӥсь шудонъёсы эн пыриське, коньдондэс гинэ ыштоды.

 

Лев.

Куд-ог Левъёслэн улонзы чутрак воштӥськоз. Выль уж ӵектозы, вамыштэмдылэсь азьло ӟеч малпаське. Котькыӵе удысын азьветлӥсь луоды, тыршемдылэсь емышсэ арлэн кыкетӥ ӝыныяз шӧдыны кутскоды. Кинэ ке сюлмаськытозы юрт котырын берган-лэсьтӥськон, выль интые улыны выжон. Кылем арын сюлмо тыршемды понна ӟеч кузьым басьтоды. Семья кусыпъёсты синмаськымонэсь.

 

Нылмурт.

Малпамтэ шорысь улон интыдэс но уждэс воштоды. Эн кышкалэ, ваньмыз умой радъяськоз. Ужады выль вормонъёс басьтоды, тунсыко эшъёс шедьтоды. Тодон-валандэс будэтон сярысь сюлмаське. Семьяды — нырысетӥ юрттӥсьты, тросгес саклык висъялэ кузпалдылы но нылпиостылы. Уногес шулдыръяське, тӥляд мылкыдды капчи ке, вӧзысь эшъёсты но шудогес луозы.

 

Весъёс.

Матэктӥсь ар трос шумпотон кузьмалоз, быдэс арды вольыт но капчиен ортчоз. Кужымды дурыныз пӧзёз тулыс, кин ке сюлэмызъя кельшымон уж шедьтоз яке огдырлы дораз ужано кариськоз. Гужем пумын но сӥзьыл бадӟымесь воштӥськонъёс витё. Коньдонэн герӟаськем ужъёсты ас эрказ радъяськозы, семья кусыпъёсты но юнмалозы. Тазалыктэс кыдатэ, спортэн эшъяське. Огкылын вераса, ар ӵоже тазалыко шутэтскон вите, ӵемгес командировкаосы поталоды, походъёсы ветлоды, калыкен ужанэ пыриськоды.

 

Скорпион.

Дӥсьтыса басьтӥське бадӟым ужъёс борды. Ар куспын вылӥе ӝутскоды. Вӧзады вожъяськись эшъёсты луозы, куд-ог дыръя, оло, вань вормонъёсты сярысь калыклы веранэз но ӧвӧл. Вамыштоно азьлань гинэ, мышкады учкылытэк. Ар кутсконын кузь сюрес вите. Отысь бурдъяськем мылкыдын берытскоды но быдэс ардэс огшокчемен ортчытоды. Гужемзэ вулэсь кыдёкын шутэтске. Ӟеч тыршемдылэн емышез ар пумын быгыльскоз.

Ыбылӥськись.

Дась луэ шӧдтэк шорысь воштӥсь-конъёслы. Вуоно арлэн нырысетӥ ӝыныяз коньдон ужпумъёсын шуг-секытъёс кылдозы, нош кыкетӥяз югдурды тупатскоз. Коньдон быдтыны яратӥськоды ке но, оглюкетсэ ватыса возе. Семья кусыпъёстэс юнматэ, куддыр юнме шорысь вӧсь кариськоды матысь адямиостэс. Ар пумын выль эшъёс шедьтоды, лэсьтоды сое, мае ӧд быдэстэ арлэн кутсконаз. Азьвыл висёнъёсты котыртӥды гожеръялозы, тазалыктэс эмъян борды басьтӥське.

Сюро кеч.

Лыктӥсь ар, туэен ӵошатыса, трослы капчигес луоз. Эшъёсыныды, ӵыжы-выжыосыны-ды огкылысь улэмды вань шуг-секытъёсты вормыны юрттоз. Тулыс пумиталоды азьвыл эшъёстэс, туганъёстэс, быдэстытэк кельтэм малпанъёсты зэмалозы. Вожъяськисьёсты трос. Супыльтӥсьёслы луыса семья кусыпъёсты куашкан калэ вуыны быгатозы. Мылкыдъёстылы эн сётске. Утелэ тазалыктэс, сюрес вамен чакласькыса выжылэ.

Ву кисьтась.

Ужъёсты умой радъяськозы, ватсаса барыш поттыны юрттоз ваньмон дыръяды киужен выремды. Мукетъёсыныз ӵошатыса, тӥ уд шӧдэ бадӟым воштӥськонъёсты, шуг-секытъёсты. Вунэтэ вылтӥяськон сямдэс. Кивалтэмды укыр потэ, кузпалдылы куд-ог дыръя кыл но вераны уд сётӥське. Ар ӵоже тыршемдылэсь емышсэ сӥзьыл бичалоды: кин ке выль уже выжоз яке улон инты басьтоз, кин ке кунгож сьӧры вуылоз, нош кин ке нылпи ваёно луоз.

Чорыгъёс.

Улонды огсыр но гань-гань вал, вуоно арын ваньмыз йырин-чукин берытскоз: кылымтэ-адӟылымтэ интыосы вуылоды, трос адямиосын пумиськылоды, оло, юмоке но шедьылоды. Дан сьӧры эн уйиське, ӟеч ужамдэс эшъёсты сотэк но синйылтозы. Ар кутсконын ик коньдонэн юрттӥсьёс шедёзы, сое берыктон понна быдэс ар тыршоно луоды. Семья куспады валамтэос кылдозы, улон интылы луыса. Юрт котырын берганы юрттӥсьты кылдоз. Оскиське удалтонлыктылы, ваньмыз радъяськоз.

Суредаз Дина Седова

Удмурт Дунне
By Удмурт Дунне Январь 10, 2018 13:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*