«Кенеш» журналлэн конкурсэзлы луыса кылдӥз 100 выль произведение

Удмурт Дунне
By Удмурт Дунне Январь 19, 2018 16:07

Кылем арын «Кенеш» журнал литературной конкурс ортчытӥз, солы луыса удмурт литература унолы узырмиз. Туннэ, 19-тӥ толшоре, вормисьёс данъямын вал.

19-тӥ толшоре вормисьёс данъямын вал.

Осконтэм кадь, но конкурсэ 100 пала ужъёс вуизы, уноез гожтэмын егитъёсын.

— Адӟиськиз: егитъёс мӧйы писательёслэсь пыдберзэс лёгало ни. Ужъёс туж трос вал — 2 роман, 5 повесть, 4 бадӟым веросъёс, 4 поэмаос, уно кылбур сузьетъёс. Жаль, ваньзэ авторъёсты пусйыны уг луы. Соин ик, вормисьёсты сяна, ми эшшо 20 авторъёсты таукаронъёсын но кузьымъёсын данъямы, — вера «Кенеш» журналлэн валтӥсь редакторез Ольга Бородина.

Озьы тросаз номинациосын 2 вормисьёс быръемын вал. Кызьы вераз литературовед Виктор Шибанов, учкемын вал, макем вольыт но чебер кылын гожтэмын вал произведение, макем со быдэсмемын, конечно, лэчыт синъёсын котыръямын егитъёслэн ужъёссы. Озьы бадӟым проза гожтӥсьёс пӧлын вормизы егит гожъяськисьёс Мария Векшина но Дарали Лели, кылбуретын — Анастасия Шумилова но Елена Виноградова, нылпиослы сӥзем произведениос тужгес усто гожтӥллям Лия Малых но Владимир Котков, драматургиын вормизы Ульфат Бадретдинов но Василий Ушаков. Тужгес усто верос гожтэм Николай Павлов, нош критика — Вера Пантелеева. Матысь дыре вормисьёслэн ужъёссы потозы «Кенеш» журналлэн бамъёсаз, кылсярысь, романъёслэн оглюкетъёссы. Нош куд-огъёсыз кылем арын ик печатламын вал ини.

Печатья но ивор вӧлмытонъя агентстволэн кивалтӥсез Алексей Воронцов ӟечкыла конкурсын вормисьёсты.

— Конкурслэн валтӥсез емышез — со выль шӧмо произведениослэн кылдэмзы, — вера «Кенеш» журналысь проза ёзэн кивалтӥсь Олег Четкарёв. — Журналын тросгес адӟиське вал «крестьянский реализм». Со лыдӟисьлы акыльтӥз но ни. Конкурслы луыса пельтӥз выль тӧл. Озьы ке но ми ум шуиське, вормисьёслы милям нокыӵе юанъёсмы уг кылдо шуыса. Соос вань!

Олег Геннадьевич вера стилистика, кылэз шӧдон пумысен. Уго «Кенеш» журнал та ласянь писательёс азе котьку но чурыт куронъёс пуктэ. Вераны кулэ, чалмыт ӧз улэ асьсэос но гожъяськисьёс. Тау кылъёс вӧзы дэмланъёссэс но шараязы.

— Конкурсын 7-тӥ номинацие ватсано — берыктон уж, — шуиз Дарали Лели.

Соин соглаш луизы тросэз писательёс.

— Та номинация конкурслы выль кужым сётоз, — вераз тодосчи Вера Пантелева. — Соку удмурт литература сярысь тодозы ӟуч лыдӟисьёс но. Асьсэос авторъёс но, произведенизэс ӟуч кылэ берыктыса, выль сямен учкозы литературалэн азинскемез шоры. Туж умой та пумысен ужа Комиысь Писательёслэн огазеяськонзы, соос арлы быдэ коми произведениосын ӟуч кылэ берыктыса, альманах потто. Талэсь адӟем кароно асьмелы но. Со туж кулэ, мон вузын дышетӥсько бере, тодӥсько: удмурт литератураен тунсыкъяськись ӟуч студентлы туала произведениос пӧлысь номыре дэмланы.

Таӵе литературной конкурсъёслэн кужымзы бадӟым. Удмурт литератураез, удмурт кылэз азинтэм сяна, со писательёслы но выль кужым сётэ.

 

Таӵе литературной конкурсъёслэн кужымзы бадӟым. Удмурт литератураез, удмурт кылэз азинтэм сяна, со писательёслы но выль кужым сётэ. Нош егитъёс понна со сюрестӥ азьлане нуись тыл интыын. Конкурс литератураын выль нимъёсты усьтэ, оло, соос кема шыпыт пукыслазы на. Кызьы вера Ольга Бородина, та вожвылъяськонлы луыса «Кенеш» журналлэн пуштросэзс трослы выльмиз но кужмогес луиз, уго «мар вуиз, сое ик печатлалом» амаллэсь куштӥськыса, быръён кылдӥз.

Соин ик конкурсэз арлы быдэ ортчытъяно. Кызьы оскытӥзы Печатья но ивор вӧлмытонъя агентстволэн кивалтӥсез Алексей Воронцов но «Кенеш» журналлэн валтӥсь редакторез Ольга Бородина, туэ но конкурс луоз! Соин ик, вӧлэ пероостэс.

Мария Векшина

Туспуктэмъёс: «Удмуртия» агентство

Удмурт Дунне
By Удмурт Дунне Январь 19, 2018 16:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*