Йӧскалык библиотекаын Кузебай Герлэсь кылбуръёссэ шара лыдӟизы

Удмурт Дунне
By Удмурт Дунне Январь 18, 2018 14:12
Йӧскалык библиотека

Ужрад азьын ялэмын вал: мылкыд карисьёс, кылбур дасяса, мед лыктозы.

Арлы быдэ Кузебай Гердлэн вордскем нуналаз Ижысь синпелетэз дорын кылбуръёссэ лыдӟо. Но уг тырмы кадь кылбурчилэн аслаз куараез, тросгес кылзэм потэ кылбуръёссэ.

Соин Гердлэсь куаразэ «чузъяськытон» понна Йӧскалык библиотекаын 15-тӥ толшоре радъяськиз поэтлэсь кылбуръёссэ шара лыдӟон ӝыт. Ужрад азьын ялэмын вал: мылкыд карисьёс, кылбур дасяса, мед лыктозы. Туала арын удмурт кылбурез вольыт лыдӟонлы сӥзем ӝытъёс уг ортчыло, соин таӵе вунэм амал асьме улонамы выль шӧм пыртӥз.

 

Йӧскалык библиотека

Та ӝытын котькуд мылкыд карись Кузебай Герлэсь кылбуръёссэ шара лыдӟиз.

Тунсыко вал соиз: одӥг кылбурез кӧня ке мурт лыдӟыны малпаса лыктэм. Литературоведъёс Василий Ванюшев но Александр Шкляев бырйиллям «Ми кизиськом» кылбурез. Та кылбурлэн литератураын улон сюресэз туж тунсыко. Нимысьтыз сое эскеризы Василий Ванюшев, Анна Зуева-Измайлова, Алексей Ермолаев но мукет тодосчиос. В.  Ванюшев пусйиз: со кылбурлэсь 3 вариантсэ ик эскериз. Солэн малпамезъя, кылбурысь кизисьлэн образэз Евангелиысь тодмо притчаез тодэ вайытэ. Кузебай Гердлэн кизисез — югдытӥсь, азьветлӥсь, кылбурчи-пророк, кудӥз зарни кылъёссэ-кидыссэ калыклэн сюлмаз кизе.

Та ӝытэ А. Шкляев но В. Ванюшев быдэстӥзы Гердлэн асэныз ӟуч кылэ берыктэм «Ветру уйшора» но «Я ни разу не видел море…» кылбуръёссэ но. Озьы соос возьматӥзы Гердлэсь усто берыктӥсь луэмзэ, ӟуч кылын быгатыса гожъяськемзэ. Вераны кулэ, К. Гердлэн ӟуч кылэ берыктэм кылбуръёсыныз нимысьтыз «Лирика» (1965) бичет но поттэмын.

Йӧскалык библиотека

Та ӝытын гань-гань учкисьёс ӧй вал — ваньзы пыриськизы поэзилэсь праздниксэ кылдытонэ, соин ужрад туж шуныт пӧрмиз, калыкез огъяз.

Со сяна, ӝыт куспын 2 пол чузъяськиз удмурт литератураысь яратонлы сӥзем тужгес но чеберез кылбур — «Чагыр кышет». Сое лыдӟизы Александр Шкляев но «Мынам Удмуртие» ТРК-ысь журналист Светлана Кибардина. Котькудӥз кылбуре аслэсьтыз мылкыдзэ пыртӥз — озьыен, выль сямен валэктӥз текстэз. Огез лыдӟись интонация пыр возьматӥз яратонлэсь — чагыр кышетлэсь ышемзэ-бездэмзэ улонысь огшоры югдурез выллем, кудӥзлы ӧвӧл пумитъяськоно, сое каньылэн пумитаны но пушкад пыӵатыны кулэ. Мукетыз суредаз кылбурысь лирической геройлэсь яратон понна асэныз ачиз нюръяськемзэ но гажан мылкыдзэ ыштэмез понна зол куректэмзэ. Макем пӧртэм пуштросо луыны быгатэ шара лыдӟем текст!

Ӝыт ӵоже пӧртэм кылбуръёс чузъяськизы — гражданской но философской лирика, басня, «Гондыръёс» нылпи поэма. Кузебай Гердлэсь зарни чуръёссэ кылзыса, соослэсь кужымзэс эшшо огпол дунъямы. Та ӝытын гань-гань учкисьёс ӧй вал — ваньзы пыриськизы поэзилэсь праздниксэ кылдытонэ, соин ужрад туж шуныт пӧрмиз, калыкез огъяз.

Лариса Дмитриева

Туспуктэмъёс: Йӧскалык библиотека

Удмурт Дунне
By Удмурт Дунне Январь 18, 2018 14:12