Ижысь удмурт азьветлӥсьёс Выль ар ортчытӥзы

Удмурт Дунне
By Удмурт Дунне Январь 22, 2018 15:27

Таӵе шулдыръяськон ортчылэ арлы быдэ.

Кылем арняе Ижысь Эшъяськон юртэ Ижысь 80 пала дышетскисьёс люкаськылӥзы. Соос удмурт сямен Выль арез пумитазы. Ужрадэз радъязы «Удмурт Кенеш» но «Шунды» огазеяськонъёс. 

Таӵе шулдыръяськон ӟеч сямлы пӧрмиз ини, со ортчылэ арлы быдэ. Но азьвыл кыз котыртӥ покчи классъёсын дышетскисьёс бергазы ке, туэ, дышетӥсьёс куремъя, ӧтемын вал 8-тӥ-11-тӥ классъёс. Ваньзы соос — азьветлӥсьёс, пӧртэм вожвылъяськонъёсын но олимпиадаосын вормемъёс.

— Таӵе ужрадэ мон нырысьсэ вуи. Ма, Ижын но нырысетӥ арзэ улӥсько ай, отчыозь дышетски Алнаш ёросын. Дорам сярысь, татын дышетскыны секытгес, — шуэ Кузебай Герд нимо гимназиысь Нина Семёнова. — Ужрадэ ӧтизы удмурт кылъя олимпиадаын вормисьёс пӧлы шедеме понна.
Люкаськемъёс азьын вераськыкуз, Кун Кенешысь депутат, «Удмурт Кенешлэн» тӧроез Татьяна Ишматова тау кариз вань дышетӥсьёслы кужымзэс но сюлэмзэс поныса тыршемзы, котькыӵе ужын юрттӥськемзы понна. Озьы ик пусйиз пиналъёслэсь котькытчы вуттӥськыны тыршемзэс.

«Удмурт Кенешлэн» тӧроез Татьяна Ишматова тау кариз вань дышетӥсьёслы кужымзэс но сюлэмзэс поныса тыршемзы, котькыӵе ужын юрттӥськемзы понна.

— Таӵе ужрадэз ортчытӥськом, удмурт кылын вераськыны мылкыдды эшшо но мед пуромоз шуыса. Тӥ — милям «зарни егитъёсмы», азинсконъёс но выль вормонъёс тӥледлы, — сӥзиз Татьяна Витальевна.

— Удмурт кылмы тӥледыз азьлане мед нуоз, улонады мед юрттоз, — ватсаз «Удмурт нылкышно кенешлэн» тӧроез, Эшъяськон юртын ужась Надежда Степанова.

Та ӝытэ вань люкаськемъёс портэм вожвылъяськонъёсы, удмурт шудонъёсы пыриськизы, тунаськизы.

Та ӝытэ вань люкаськемъёс портэм вожвылъяськонъёсы, удмурт шудонъёсы пыриськизы, тунаськизы. Ӵошатсконъёс вискын егитъёсты шулдыр кырӟанъёсын шумпоттӥзы «Куарагур» проектлэн финалистъёсыз. Ужрад пумын Тол бабаен Лымы ныл саламъёс люкылӥзы. Ужрадэз йылпумъяз удмурт дискотека.

Елена Рябина

Удмурт Дунне
By Удмурт Дунне Январь 22, 2018 15:27