Ижын но Вавож ёросын Кузебай Гердлы сӥзьыса уно ужрадъёс ортчизы

Удмурт Дунне
By Удмурт Дунне Январь 24, 2018 14:20

Лыктэмъёс буре ваё гожъяськисез но тодосчиез, верало солэсь лэсьтэм ужъёссэ, лыдӟо кылбуръёссэ.

14-тӥ толшоре 120 ар тырмиз удмурт югдытӥсь Кузебай Герд вордскем дырысен. Юбилеезлы сӥзьыса, Ижын но Вавож ёросын уно ужрадъёс ортчизы.

Трос аръёс ӵоже ини Кузебай Гердлэн вордӥськем нуналаз Ижысь синпелетэз доры уно калык люкаське. Лыктэмъёс буре ваё гожъяськисез но тодосчиез, верало солэсь лэсьтэм ужъёссэ, лыдӟо кылбуръёссэ. Туэ но, вордскем нуналыз шутэтскон нуналлы ке но тупаз, синпелет трос адямиез огазеяз. Шумпотымон, та ужрадэ мӧйыос гинэ уг вуыло — арысь аре тросгес но тросгес егитъёс лыкто.

Люкаськемъёс азьын вераськиз «Удмурт Кенеш» огазеяськонлэн тӧроез Татьяна Ишматова. Со эшшо огпол вераз: Кузебай Герд уно удысъёсын бадӟым пытьы кельтӥз, солэсь кутскем ужъёссэ ми азинтыны но дунъяны кулэ. Историмес утён но будӥсь поколениослы кельтон, азьветлӥсьёсмес данъян — асьмелэн одӥгез валтӥсез ужпуммы.

Та нуналэ ик Вавожын — Кузебай Гердлэн вордӥськем палъёсаз — «Гердлы — 120» флешмоб радъяськиз. Вавожысь парке потӥзы ёрос администрациын, культура удысын ужасьёс, пенсионеръёс, дышетскисьёс но вань мылкыд карисьёс. Азьвыл ик рос-прос дасям сценарийя нырысь соос султӥзы одӥг бадӟым круге, нош собере, кузьылиос сямен, кылдытӥзы «Гердлы 120» букваос. Быдэсыз флешмоб вылӥысен камерае гожтэмын вал. Бадӟым экранысен видеоез адӟыны луоз 15-тӥ тулыспалэ Элькун Герд лыдӟонъёсысен.

Герд лыдӟонъёс арлы быдэ ортчыло. Кылем арын конференция радъяськиз Пичи Пургалан, нош туэ, югдытӥсьлэн юбилеезлы сӥзьыса, ужрадэз кенешемын Вавожын лэсьтыны. Таяз радэ конференцилэн темаез — «Кузебай Герд улэ асьмемын ӵош». Валтӥсь докладэз лыдӟоз тодосчи Василий Ванюшев. Ужрад огазе люкалоз шаерысьтымы 400 пала адямиез: тодосчиосты, кивалтӥсьёсты, дышетӥсьёсты но пиналъёсты.

Кылсярысь, Ижысь Г. Красильниковлэн музей-квартираяз удмурт тодосчиос, литературоведъёс вераськизы К. Гердлэн ужъёсыз пумысен — кӧняез но кыӵе ӟечлыкен вуттэмын лыдӟись дорозь, кыӵе вакытэ но кыӵе критикъёсын дунъямын, макем трос но зол эскеремын. Элькунысьтымы Йӧскалык библиотекаын ужасьёс ортчытӥзы кылбуръёссэ лыдӟон ужрад. К. Гердлэсь чуръёссэ тодэ вайытӥзы шаерысьтымы тодмо артистъёс, журналистъёс, гожъяськисьёс, кивалтӥсьёс. Вавож ёросысь Гурезь-Пудга музее 2 нунал ӵоже вань мылкыд карисьёс дунтэк пыраны быгатӥзы. Табере гурезь-пудгаос рос-прос дасясько ини ёрос Герд лыдӟонъёслы, ужрад ортчоз 26-тӥ толшоре.

Елена Рябина

Удмурт Дунне
By Удмурт Дунне Январь 24, 2018 14:20