Гурт адями-2017: Вавож ёросысь Чудӟалудысь механизатор Василий Морозов

Удмурт Дунне
By Удмурт Дунне Январь 11, 2018 15:00

Вавож ёросысь Чудӟалуд гуртын улӥсьёс «Колос» хозяйствоысь механизаторез Василий Морозовез юн гажало шуыса, шӧдӥське.

Вавож ёросысь Чудӟалуд гурты Василий Морозовлэсь чупрес ужамзэ Путин но пусйиз.

— Сое «Вася» но, «Морозов» но уг шуо, «Василий Иванович» шуыса пересез но, егитэз но вазиське, — вера хозяйствоысь валтӥсь механик Василий Протопопов. — Котькытчы ысты, ваньзэ рос-прос лэсьтэ. Юэмез но ноку ӧвӧл. Техника но солэсь кылзӥське, ачиз но сое чакласа гинэ возе. Соин но, арлыдыз вань ни ке но, выль погрузчик солы сётӥмы. Кунгож сьӧрысь вуттэмын — куд-ог хозяйствоос понна сыӵе техника — льӧль малпан гинэ. Нош Василий Иванович погрузчиклэсь котькуд секретсэ тодэ. Кызьы соин ужаны кулэ шуыса, артысь хозяйствоысь но визь-кенешлы дораз вуылӥзы ни. Со доры лыктэмед потытэк но лыктод — лякыт, визьмо, котыр ласянь чупрес адями со, вераськемъя вераськем потэ.

Василий Морозов пуэн но, кортэн но вырыны кибашлы. Соин но, лэся, гуртаз тэк пукыны уг чида — ялан маке лэсьтӥське. Ваньзэ ас киыным лэсьтӥ — казённой улонэз ноку ӧй адӟылы, колхоз квартира дасяк ӧй куры, шуэ.

— Офицер луэме потэ вал, — вера Василий Иванович. — Пограничной войскоосын службаме нуэме бере дышетскыны но ыстылӥзы. Но семьяямы мон огнам пиосмурт вал бере, атай юртэ берытскытэк, колхозэ куриськытэк ӧйлась. Пиосмурт азьло гуртын туж данын вал. Комбайн, трактор сьӧры дӥсьтыса пукси. Асме та улонын шедьтӥ кадь потӥсько. Зэм, али пиосмуртлэн данэз усегес ни — та понна кӧт ӝож.

Василий Морозов, вань кужымзэ сётыса, ужа. Шахматэн, шашкиен ортчылӥсь ӵошатсконъёсы ялан пыриськылэ. Нылпиосы но соослэн нылпиоссы понна вормонъёс басьтэм потэ, шуэ. Нош солэн 2 нылыз, 1 пиез, 3 внукъёсыз. Соосын ӵош чорыганы, пӧйшураны вуылэ.

Россилэн Президентэз Владимир Путин 24-тӥ октябре Василий Морозовез «За заслуги перед Отечеством» 2-тӥ степенё орденэн пусйиз. Колхозысь кивалтӥсьёс верамъя, Василий Иванович кадь адямиослы ик сое сётоно, Морозов та данъетлы туж тупа.

Со сяна, гуртоос но, колхозын ужасьёс но Василий Ивановичез дэмлало «Удмурт дунне» газетын ялэм «Гурт адями-2017» конкурсысь «Ӟеч сюлэм» номинацие. Со кадь ӟеч но лякыт адямиез югыт тылын но утчаса уд шедьты, шуо.

Елена Сараматова

Удмурт Дунне
By Удмурт Дунне Январь 11, 2018 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*