Гурт адями-2017: Пичи Пурга ёросысь Аксакшурысь шаерчи Валерий Баймурзин

Удмурт Дунне
By Удмурт Дунне Январь 12, 2018 08:26

Пичиысен ик Валерий Дмитриевич котьма борды туж сюлмысь басьтӥське.

Пичи Пурга ёросысь Аксакшурысь Валерий Дмитриевич Баймурзинэз тросэз лыдӟисьёс тодо  шаерчиез сямен.

Пичи мугорыз шоры учкыса, Валерий Дмитриевичез востэм но дӥсьтӥсьтэм гинэ кадь малпано. Нош кыӵе бадӟым ужъёс со лэсьтэ! Ассэ уг, гуртооссэ данъяса гожъя, солы луыса кӧня адямиос тодо ини аксакшуръёс сярысь. Быдэс гуртэн туж гажаськомы сое.

Пичиысен ик Валерий Дмитриевич котьма борды туж сюлмысь басьтӥське. Школаын ӟеч дышетскиз, со понна шутэтскыны шуд усиз «Артек» пионер лагерьын. Аксакшур школаез йылпумъяса, дышетсконзэ азинтӥз Ижысь монтажной техникумын. Но ар ортчыса, сое армие басьтӥзы, службазэ нуиз пограничникъёслэн войскоосазы, утиз Россия но Китай вискысь кунгожъёсты. Отысь бертыса, дышетсконзэ йылпумъяз но Аксакшурын соку гинэ кылдэм «Дружба» хозяйствое вамыштӥз. 10 ар тыршиз лэсьтӥськон удысын. Нялтас заочно амалэн дышетскиз Удмурт кун университетысь географияя факультетын.

Дышетскемез бере Аксакысь школаын черченилы, природоведенилы, суредаськонлы, географилы дышетыны кутскиз. Татчы лыктэмез бере ик нылпиослы усьтӥз туризмъя но шаертодонъя кружок, соин 17 ар пала кивалтэ ни. Пиналъёсын валче со инкуазе пота. Валерий Дмитриевич нылпиосты дормылэсь чеберзэ валаны дышетэ. Соос пӧртэм гуртъёсы вуыло, тодматско отысь адямиосын, историен. Со туж ӝог синмаське вӧзысьтыз адямиослы, выль тодмоосызлы — со ик куке соку гожъяськон мылкыдызлы пуромон муг но луиз.

Валерий Дмитриевич кема аръёс ӵоже ӟеч кусып возе ини ёросысь но элькунысь газетъёсын. Пичи Пургаын солэн одӥг сюресэз — «Маяк» газетлэн редакциез — музей — архив. Иже вуэ ке, одно ик кожалля «Удмурт дуннелэн» редакцияз. Материалъёссэ  сюлэм пыр поттыса гожтэ. Со трос саклык висъя Быдӟым оже ветлэмъёслы, ож мышкын тыршемъёслы, вашкала сям-йылолъёслы. Кылем арын, 60 аресэзлы со аслыз кузьым лэсьтӥз — югыт дуннеез адӟиз «Победу приближали, как могли» книгаез. Отчы пыртэмын Аксакысь Быдӟым оже пыриськемъёс, ож мышкын ужамъёс сярысь материалъёс. Та книгаез дасян бордын Валерий Дмитриевич 24 ар ужам. Озьы ик солэн гожъямъёсыз пыризы «Ӟеч-а, бур-а, Аксакшур» книгае. Гуртмы сярысь сомында гожъяз ни кадь. Озьы ке но тэк пуконэз валасьтэм Валерий Дмитриевич ялан мар ке выльзэ шедьтэ. В. Баймурзин арлыдызъя пенсиын ини ке но, нылпиослы дышетэмысь уг дугды ай. Пуксеттэм мылкыдыз сое олокытчы но вуттэ. Туэ гуртамы усьтӥмы туризмъя маршрут: Аксак котырысь аспӧртэм интыос — Нӧднюк, Перепеч, Садо, Керемет — сярысь куноослы вера Валерий Дмитриевич. Куноосын валче вашкала сямъёсъя ӝук но вӧся.

Кылем арын Валерий Дмитриевичез пусйизы Самсонов нимо ёрос премиен. Адӟем карымон воргорон Россиысь Журналистъёслэн огазеяськонзылэн ёзчиез луэ.

Вашкалазэ, историез утемез понна ӵектӥськомы Валерий Баймурзинэз «Удмурт дуннелэн» «Гурт адями» конкурсаз «Выжыоссэ утись» номинацие.

Ольга Буранова,
Пичи Пурга ёросысь  Аксакшур гурт

Удмурт Дунне
By Удмурт Дунне Январь 12, 2018 08:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*