«Гурт адями-2017» — Кияса ёросысь Вуж Сальялась ужбергатӥсь Пётр Петров

Удмурт Дунне
By Удмурт Дунне Январь 11, 2018 16:00

Пётр Григорьевич Петров.

Кияса ёросысь Вуж Сальялась ужбергатӥсь Пётр Петров гуртмес азинтон, калыкмылы юрттон понна сюлмаське. Луэ Россиысь но Удмуртиысь гурт удысысь дано ужась.

Пётр Григорьевич Петров вордӥськиз но будӥз милям гуртамы. Анай-атайёсыз вань нылпиоссэс ӟеч будэтыны тыршизы, куспазы тупаса, ог-огзылы юрттыса улыны дышетӥзы.

Пётр, Сальялан 8-тӥ классэз йылпумъяса, тодон-валан люказ Сарапулысь совхоз-техникумын. Гуртамы агроном луыса берыктӥськиз. Армие ветлэмез бере Ижкарысь гурт удысъя академиын дышетсконзэ азинтӥз. «Рассвет» колхозамы ӟеч специалистэз шумпотыса пумитазы. Ӝоген татын ик шудзэ шедьтӥз: кузпалъяськизы гуртысьтымы ик Тамараен. Ӟеч тыршемзэ адӟыса, Пётр Григорьевичез пуктӥзы валтӥсь агрономе. Хозяйствоен соку кивалтӥз Семён Куликов. Со вакытэ «Рассветэ» 6 гуртъёсысь калык ужаны ветлэ вал. Колхозын ӝутӥськыны кутскизы выль гидъёс, быгатӥзы пудозэс йылэтыны. Пётр Григорьевич ас удысаз быгатыса тыршиз. Соин но сое кивалтӥсе юнматӥзы. Озьы мыло-кыдо воргорон колхозэн 20 ар кивалтӥз. Та ныпъет капчиен ӧз сётӥськы, угось 1990-тӥ аръёсы быдэс шаерамы эштосъёсты банкротэн ялылӥзы. Милесьтым колхозмес но секыт адӟон палэнтӥ ӧз ортчы.

2005-тӥ арын Пётр Петров Сальялан фермер хозяйство кылдытӥз. Грант утыса, куашкан калэ вуэм гидъёсты гуртоосын валче тупатъяны ӧдъяз. Скалъёс вӧзы быгатӥз ыжъёс, ошъёс басьтыны. Гурт котырысь куштӥськем музъемъёс выльысь ю тысен шепаськыны кутскизы. Озьы фермерлэн ужъёсыз азинскизы. Пётр Григорьевич быгатӥз гуртамы кунокуа пуктыны. «Салья Дор» агроусадьбаяз табере шаерысьтымы гинэ ӧвӧл, палэнысь но туристъёс сюрес лёгизы ини.

Пётр Григорьевич пенсиын ини ке но, тэк пукыны уг чида. 47 ар гурт удысын ужа. Со ёросысь Депутатъёслэн Кенешазы быръемын. Солэн сюлмаськемезъя муниципал кылдытэтысьтымы Кумырса гуртэ сюрес выльдӥськиз. Вуж Сальялан со тымет ӵыпиз, отчы карпъёс лэземын. Табере пичиос но, бадӟымъёс но отын шутэтскон дырзэс ӵемысь ортчытъяло. Озьы ик Пётр Григорьевичлэн сюлмаськемезъя Тайвади шур вамен выжмы тупатэмын. Одӥгез гинэ ӝожомытэ Пётр Григорьевичез: ас вакытаз со быгатӥз колхоз котырысь вань гуртъёсы кирпичлэсь клубъёс ӝутыны, нош Сальяла ӧз вуттӥськы. Та дырозь лулчеберетъя юртмы пулэсь.

Та сяна, воргорон Быдӟым ож мышкын тыршем кышномуртъёслы пуэн юрттӥське. Ачим мон гуртысьтымы ветеран огазеяськонлэн кивалтӥсез луисько. Пётр Григорьевич гуртоосын пӧртэм ужрадъёсты ортчытъяны кузьымъёсын юрттӥське. Ас вакытаз гуртысьтымы «Бӧляк» ансамбльлы дӥсь вурыны коньдон висъяз. Школа вӧзамы йӧ каток лэсьтыны пулъёс сётӥз. Тани туэ, Арлыдоослэсь нуналзэс пусйыку, ог 30 пенсионеръёслы быдэн 1 центнер ю тысь дунтэк висъяз. Мукет гуртъёсысь адямиос сярысь но уг вунэты: вазенгес ини Юрмалайысь «Раздолье» коллектив солэн сюлмаськемезъя выль дэремъёс вурыны быгатӥз, Первомайск гуртын хоккеен шудонъя коробка кылдӥз. Туэ со пыриськытэк ӧз кыльы Уддяди гуртын ортчем «Удмурт дуннелэн» призэзлы куасэн бызьылонъя ӵошатсконэ но — коньдон висъяз.

Пётр Григорьевичлэн кузпалыз но адӟем карымон — Тамара Никитична дышетон удысысь дано ужась луэ. Петров кузпалъёс будэтӥзы 3 нылпиоссэс. Алёна нылзы атаезлэсь сюрессэ мытэ — ужбергатӥсь. Сергей пизы Ижкарын улэ, ваньмон дыръяз атаезлы удыссэ азинтыны юрттӥське. Покчиез Катя нылзы Ижкарын экономист луыса тырше.

Вуж Сальялась но мукет гуртъёсысь адямиос понна сюлмаськемзэ, ӟеч лэсьтэмзэ адӟыса, ӵектэммы потэ Пётр Григорьевичез «Удмурт дуннелэн» «Гурт адями» конкурсэзлэн «Устоез кивалтӥсь» номинацияз.

Марина Морякова

Кияса ёрос, Вуж Салья гурт

Тодады вайытом:

«Гурт адями-2017» конкурсын 3 номинация:

«устоез кивалтӥсь» — колхоз кузё, ужбергатӥсь, кун яке муниципал службаысь ужась, предприятиысь-учреждениысь кивалтӥсь;

«выжыоссэ утись» — удмуртлыкез утён но азинтон понна сюлмаськись;

«ӟеч сюлэм» — калык понна маке пайдаё уж лэсьтӥсь, гуртоосызлы юрттӥсь.

Адӟем карымон муртсэс одно ик дэмланы кулэ асьсэос гуртоос. Ӟеч адями сярысь пыр-поч гожтэм борды одно ик возьмаськомы туспуктэмъёссэ но. Текстъёстэс ар пумозь лэзьыны куриськом. Ӵектэм муртъёсын быдэсак список поттэм бере яломы куара сётон. Лыдэ басьтӥськозы ӵектэм муртъёс понна бумага вылын кинюртэмъёсын списокъёс но «Удмурт дуннелэн» сайтаз, соцвотэсъёсысь группаосаз куара сётон.

Кинюртэмъёсын гожтэтъёстэс лэзьыны луоз udmdunne@yandex.ru электрон почтаямы, озьы ик луэ гожтэтъёсты келяны факс пыр яке конвертэн редакцилэн адресаз: Ижкар, Карл Маркс ульча, 274 номеро юрт. Конкурслэн ортчемез сярысь быгатӥськоды юалляськыны 43-33-42 яке 8-951-195-37-65 телефон номеръёсъя.

Удмурт Дунне
By Удмурт Дунне Январь 11, 2018 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*