Гурт адями 2017: Балезино ёросысь Дядьпи черкогуртысь лулчеберетъя юртэн кивалтӥсь Лариса Шиляева

Удмурт Дунне
By Удмурт Дунне Январь 11, 2018 16:20

Балезино ёросысь Дядьпи черкогуртысь лулчеберетъя юртын, вань сюлэм шунытсэ сётыса, тырше Лариса Владимировна Шиляева.

Лариса Владимировна вордскемын Дядьпиын. Люкысь школаез быдэстыса, нылмурт тодон-валан люказ  Ижысь культурая училищеын. Методист, кивалтӥсь луыса тыршиз ёросысьтымы Турецкое черкогуртын. Но Лариса Владимировнаез дор палъёсыз, Дядьпи гуртэз, бордазы кыскизы. Сое юнматӥзы черкогуртысьтымы лулчеберетъя юртэн кивалтӥсе. Шумпотӥськомы, асьме адями асьме калыкмы понна сокем сюлмаське шуыса. Со ужаны кутскем дырысен милям кырӟась-верась коллективмы ёросын одӥгез адӟем карымонэз луиз. Лариса Владимировналэн сюлмаськемезъя гуртын удмуртлык но азинске: ортчыло удмурт позыръяськонъёс, удмурт Выль ар шулдыръяськонъёс. Лариса Владимировналэн быгатонлыкъёсызлы паймыса ум дугдӥське: со усто режиссёр но, артист но. Ужрадъёслы кыӵе тунсыко сценарийёос малпа, синмаськыса учкиськомы Тол бабаез, пересь кышномуртэз, маскарчиез шудэмзэ.

Трос шуныт кылъёс вераммы потэ гурт калыкез огинэ бичаны быгатэмез сярысь. Со ялан выльзэ утча, котьмаин тунсыкъяське, трос лыдӟиське. Кинлы соин пумиськыны кылдэ, ваньзы гань-гань, качпи мылкыдо луэмзэ пусъё.

Лариса Владимировнаез дядьпиос 2 пол бырйылӥзы ини Депутатъёслэн ёрос Кенешазы. Со ёросысь «Удмурт Кенешлэн» ёзчиез луэ. Солы шуд усиз Удмуртилэн делегациеныз валче Москваын ортчем Гербере вуылыны. Юн кусып возе ёрос газетэнымы. Отчы улон сярысь гожъялля, но тужгес яратэ инкуазез утёнэн герӟаськем малпанъёссэ кисьтыны. Ӵемысь пыриськылэ газетэн ялэм вожвылъяськонъёсы. Россиысь «Бабьи хлопоты» журналэн ялэм «Мынам яратоно книгае» конкурсэ ужзэ келяса, вормисьёс радэ пыриз.

Корка котырзэ инбам улын музей шуыны луоз: азбараз пуктэмын чебер карета, сяськаослэсь альпийской гурезь пӧрмытэмын, муспотон адӟисько фонтан но пичигес тымет. Корка котырзэ тазьы чеберъямез понна со пусъемын Дядьпи муниципал кылдытэтлэн таукаронэныз. Лариса Владимировналэсь адӟем карыса, мукет гуртоос но чеберлык борды кыстӥськыны кутско.

Дядьпиысь мыло-кыдо кышномуртлэн быгатонлыкъёсыз трос данъетъёсын пусъемын. Удмуртлыкез азинтэмез понна солы сётэмын Национальной политикая министерстволэн Таукаронэз. Депутат сямен калыкен ужаны быгатэмез дунъямын Кун Кенешлэн Таукаронэныз.

 

Анна Наговицына

Удмурт Дунне
By Удмурт Дунне Январь 11, 2018 16:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*