Гурт адями-2017: Алнаш ёросысь «Писеевское» хозяйствоен кивалтӥсь Николай Михайлов

Удмурт Дунне
By Удмурт Дунне Январь 11, 2018 16:54

Алнаш ёросысь «Писеевское» хозяйствоен 12 ар пала быгатыса кивалтэ ини Николай Иванович Михайлов. Ваньмыз гуртоос, гурт удысын тыршисьёс огымысь шуо: Николай Иванович йӧно, сётэм кылзэ быдэстыны быгатӥсь, ӟеч сюлэмо адями.

Удмурт кун университетысь технологиен дышетӥсь луыса потэмез бере Николай Михайлов Улын Сыръезь гуртаз фермер хозяйство кылдытӥз. Быгатыса ужамзэ гурт калык синйылтӥз но куашкан калэ вуэм «Путь Ильича» колхоззылы кивалтӥсе бырйиз. Николай Иванович кылдытэ «Писеевское» хозяйство.

Кивалтӥсьмы бадӟым саклык висъя пудоез йылэтонлы. Та вакытлы эштосын 1 сюрс 850 сюро таза пудоос, пӧлазы 764 скалъёс. Арысь аре ӟеч пудо сиёнлы луыса  тросгес йӧл кыскиськом. Туэ ар куспын одӥг скаллэсь 6 сюрс 938 килограмм  басьтӥмы. Николай Иванович сюлмаськемъя та нуналлы быдэсак техникамы выльдэмын. Гаражъёсамы 5 арлэсь вуж машинаос, тракторъёс ӧвӧл шуыны луоз. Берло 3 ар куспын  ог 40 миллион манет тыр 36 выль машина басьтэмын. Гуртын ужасьлэсь улонзэ туала машинаос зол капчиятӥзы, тау со понна кивалтӥсьмылы.

Ёросын милям хозяйствоын кадь нокытын сыӵе бадӟым лэсьтӥськон уж мытэмын ӧвӧл — ялан пуктӥсько выль гидъёс, мукет объектъёс. Берло гинэ 2 скал гид ӝутэмын, 400 кунянлы гид, ю-нянь куасьтон-возён интыос  лэсьтэмын, ву кыскон башня пуктэмын, кунян гидъёс выльдэмын, амбаръёслэн липетъёссы кышъямын, колхоз объектъёс доры сюресъёс но трос мукетыз тупатъямын. Али кунянано скалъёсты нимаз возьыны сэрег пуктӥське.

Николай Ивановичлэн уждунэз ӝегатъяллямез ӧвӧл. Котькуд ар уждунмы йылэ, али солэн шоро-куспо быдӟалаез 20 сюрс манет котыр. Солы луыса ик егитъёс гурт удысэ кылё. Хозяйствоын 122 мурт тырше, 22 специалистъёс пӧлысь 11-ез егитъёс, уно егит механизаторъёсмы. Кивалтћсьмы егит семьяослы юртъер пуктыны коньдонэн юрттћськыны тырше на.

Паймиськомы кивалтӥсь-мылэн тодон-валанъёсызлы: со огкадь ӟеч вала туала технологиосты, бухгалтериез, законъёсты. Та юрттэ солы 2 вамышлы азьлапал малпаськыны. Соин но гуртъёсысьтымы калык ӟеч улэ.

Николай Иванович гурт калык понна но сюлмаськыны вуттэ. Со ялан юрттӥське Улын Сыръезьысь школалы, лулчеберетъя юртлы, ветеранъёслы, медпунктлы.  Та вакытэ Улын Сыръезьын кафе ӝутӥське.

Николай Ивановичлэн семьяез но адӟем карымон: кузпалыз Надежда Михайлова школаын завуч луыса ужа. Михайловъёслэн 2 нылпизы. Бадӟымез школазэ зарни медален йылпумъяз, колхозын экономист луыса тырше, покчиез дышетске на.

Николай Иванович Алнаш ёросысь Депутатъёслэн кенешазы быръемын, Удмурт Элькунысь гурт удысысь дано ужась луэ. Быгатыса ужамез пусъемын Удмурт Правительстволэн Таукаронэныз, ёрослэн Данъян пул вылаз пыртэмын.

Алнаш ёросысь «Писеевское» хозяйствоын ужасьёс,
Писэйгуртын, Улын
Сыръезьын улӥсьёс

Удмурт Дунне
By Удмурт Дунне Январь 11, 2018 16:54