Ува ёросысь Жужгес клубын ялан зоре

Удмурт Дунне
By Удмурт Дунне Декабрь 25, 2017 13:44

Ува ёросысь 30 культурая юртъёс пӧлысь ог ӝыныез куашкан калэ вуэмын. Жужгес клуб 28 ар ӵоже огпол но тупатъямтэ. Туннэ со адямилы кышкыт луэ ни.

Ува ёросысь Жужгесысь клуб лэсьтэмын 1989-тӥ арын.

Борддор пырдэ

Жужгес гуртысь клубез 1989-тӥ арын ас коньдонэныз пуктӥз вал татысь хозяйство, сое возьыны но юрттӥськылӥз. Бӧрысь юртэз ёрослэн ваньбураз выжтӥзы. Со дырысен клуб шоры учкылӥсь ик быриз кадь: одӥг пол но рос-прос выльдымтэ. Кытӥзэ ке буяло, выжзэ юнмато ке, ваньмыз со клубын ужасьёс сюлмаськемен гинэ. Нош ёрос администрация тупатъян ужъёсты рос-прос быдэстыны ӧз ик тыршылы. Туннэ но ёрос бюджетын лэсьтӥськонлы уксё ӧвӧл, шуо.

Юртэ пырыса ик, сюлэм кышка. Кыӵе ке складэ я куштӥськем интые сюриськод кадь. Укно янакъёс вылэ, выж кузя радэн-радэн пуктылэмын ведраос, тазъёс. Озьы клубын ужасьёс липетысь виясь зор-котлэсь утиськыны выро.

— ярано коть, дасо аръёсын люкаськем ведраосмы вань. Сӥзьыл зорыку, тулыс лымы шунаку, бадӟым ваннаос но пуктоно луиськомы, — ӝожтӥське выж миськись Людмила Ермичёва.

2017-тӥ арез ваннаосын пумитазы. Культурая юртлэн липетэз сисьмыса, котькуд пасьтӥз лымы пырыса, вӧлдэт кузя ву вияны кутскиз. Ялан котын улыса, пу янакъёс сисьмемын ни. Соос борды йӧтскылыны ик кышкыт — укномы копак ульча пала усёз, шуо жужгесъёс.

Борддоръёс но ярантэмесь луэмын: кирпич пырдыны кутскемын. Совето вакытэ ӝутэм борддоръёс но вӧлдэтъёс гипслэсь лэсьтэм плиткаосын чеберъямын. Ву сюрыса, соос усьылыны ӧдъязы.

— Плиткаос цементэн уг возисько ни, соосты борддоръёсы саморезъёсын яке дюбельёсын юнматӥськомы, адямиос вылэ усёзы шуыса кышкаськомы, — вера клубын ужась вячеслав моськин.

Нош клубысь калык уг бырылы — пиналъёслы но мӧйыослы даслэсь уно турлы кружокъёс ужало, арнялы быдэ пӧртэм ужрадъёс ортчыло.

— ёрос администрациын кылдэм ужпум сярысь тодо. Но бюджетын коньдон ӧвӧлэн югдурмы уг воштӥськы. Тупатъян ужъёсты ортчытэмды потэ ке, грантъёс утон понна пӧртэм проектъёсы пыриське, шуо. Но ми туннэ выль сямен ужаны дасесь ӧвӧлгес ай — дышетскыны гинэ выриськом, — шуэ клубен кивалтӥсь Алевтина Макарова.

Утчано грант

Клублэн бурд улаз спортзал интыяськемын. Татын но югдур пӧртэм ӧвӧл: вӧлдэтэз но борддоръёсыз пурысьтамын, штукатуркаез палдылэмын.

 — Спортзалэ но туж кышкыт пырыны, — вераськон борды итӥське Жужгес гурт поселениен кивалтӥсь Зинаида Глушкова. — Со туннэ куашканы уз куашка, но рос-прос тупатъямез кулэ каре. 2012-тӥ арын, шаерысьтымы вылӥ кивалтӥсьёс татчы вуылыку, эскерисьёс шуизы: ремонтлы 10 миллион манет кулэ. Оскимы: воштӥськонъёс луозы. Дыр ортчиз — ужпум кылиз. Липетсэ лэсьтысалзы ке, пушласянь тупатъяны асьме кужмын вырысалмы.

Югдурез валэктыны курыса, вазиським Ува ёрос администрациысь спортъя ёзэн кивалтӥсьлы Иван Эшмаковлы.

— Вождэс эн вае, но та ужпум сярысь кылэм но уг поты ни. Валэктыны но номыре. Спортъя объектъёсты быдэсак тупатъян ужъёс элькунэз азинтонъя программае пыртэмын вал. Лэсьтӥськонъёсты мытыны чакламын вал 2014-тӥ арын. Но туннэ та уж Удмуртиын аналтэмын, нош ёрос бюджетын коньдон ӧвӧл, — ивортӥз со.

Паймоно кадь: Жужгес спортзалын ёрос ӵошатсконъёс ортчыло. Арняяз 3 пол татчы гуртысь калык люкаськылэ волейболэн шудыны. Пусъёно созэ но: Жужгес гуртысь нылкышноослэн волейболъя командазы ёросазы одӥгез кужмоез луэ. Ужпум пумысен вазиськимы на ёрос администрациысь лулчеберетъя управление. Отын ивортӥзы: культурая юртъёсты возьыны, соосты сӥзьыллы-толалтэлы дасяны туэ ёрос бюджетысь 900 сюрс манет висъямын вал. Жужгес гуртысь юртлэсь липетсэ пичильтык выльдонлы ватсаса эшшо 60 сюрс висъяськиз. Со сяна, учкисьёслэн залысьтызы аварийной лыдъяськись потон ӧссэ воштӥзы.

 — Быдэс юртэз тупатъяны ёрослэн бюджетаз уксё ӧвӧл. «Односкатной» яке «двускатной» нимаськись липет лэсьтон понна, азьвыл лыдъямъёсъя, кулэ 6-7 миллион манет. Сомында уксё милемлы элькун бюджетысь но уз висъялэ. Нош мукет лэсьтӥськон амалъёс уг тупало: юрт туж вуж, — валэктӥз культурая управлениысь специалист Алексей Росомахин.

 Культурая но туризмъя министр Владимир Соловьёв верамъя, гуртъёсысь клубъёсты выльдыны юрттэт чакламын. Кылсярысь, туэ «Гуртысь клубъёс» проектсэ улонэ пыӵатӥз «Огъя Россия» партия. Соя клубъёсын чыры-пыры ремонт ужъёс быдэстыны, соослэсь инъетсэс выльдыны Удмуртилы 36 миллион манет висъямын вал. Вуоно арын программа азьланьтӥськоз. Элькунмылы чакламын ог 30 миллион манет. Со сяна, Удмуртиысь 9 культурая учреждениосын капитальной ремонтлы коньдон курыса, федерал центре вазиськемын. Гуртоос асьсэос но чырмытгес, туала амалъёсын ужаны быгатыны кулэ. Со понна бадӟымесь луонлыкъёс кылдытэмын Россиысь но шаерысьтымы проектъёсы пыриськыны но грантъёс утыны, пусйиз Владимир Соловьёв.

Татьяна Яковлева

Удмурт Дунне
By Удмурт Дунне Декабрь 25, 2017 13:44