Уксё сярысь: Кредит басьтоно яке ӧвӧл?

Удмурт Дунне
By Удмурт Дунне Декабрь 7, 2017 09:52

Удмуртстатлэн ивортэмезъя, шаерамы улӥсьёс 100 миллиард манет пала кредитъёс басьтэмын, оглом учкыса, адями поттэм табышезлэсь 41 процентсэ куштэ кредитсэ берыктонлы. Соин валче уксёез лыдъяса-чотаса улонлэн кулэлыкез нуналысь нуналэ будэ. Та пумысен лыдӟисьёсмылы визь-кенеш сёто Ижысь огаз банкын ужасьёс.

Толэзьлы быдэ барыштылэсь 10 процентсэ ке но пуйыады ватэ, соку бадӟым арбериос басьяны трослы капчигес луоз.

Кызьы чаклано

Татьяна Суханова:

— Семьялэн кисыез предприятилэн яке элькунлэн бюджетэзлы укша. Котькуд адями тыриськонъёсыныз но поттэм уксёеныз кивалтыны кулэ: патер басьтоно, пиналъёсты дышетоно, пенсилы коньдон люкано…

Нырысь ик вань тыриськонъёсты чакласа возёно, блокнотэ гожтыса яке смартфонэ пыртыса. Одӥг толэзь ӵоже тазьы лыдъяса, быдтэм уксёды син азяды пуксёз, соку куд-огез дэймоз но, дыр. Уго марлы уксё быдтэмзэс тросэз адямиос уг ик чаклало, соин ик кисыоссылэсь бушамзэс уг шӧдо. Юалэ асьтэлэсь: созэ яке тазэ одно ик-а басьтоно? Марлы ке, оло, ичигес коньдон быдтыны луэ? Мултэс тыриськонъёслэсь мозмытскыны тырше. Син шоры йӧтӥсьтэм «коньдон сиисьёс» уно. Кылсярысь, ульча кузя мыныкуды, кофе басьтон. Нуналлы быдэ 100 манетэн 2 кружка кофе басьтылӥды ке, толэзяз 4000 манет быдтоды, нош арлы быдэ со 50 сюрс манет пала луэ — курортын шутэтсконлэн дуныз!

Тыриськонъёсты ичиятыса но уксёез шыръяса гинэ шудо уд луы. Табыш поттон сярысь но вунэтоно ӧвӧл. Уждунды арысь аре  уг буды ке, ужан интыез воштон сярысь малпаське, хоббиеныды, кылсярысь, киужен вырыса, ватсаса коньдон поттыны тыршелэ яке выль удысэ дышетскыны мынэлэ.

Кызьы люкано

Инна Князева:

— Тросэз семьяос шутэтскыны мынон яке патерзэс тупатон понна банкысь пунэмаськыса коньдон басьто, та вамыш семьяез шымыртэ. Таӵе югдурез эскером: Ижысь семья, 1 пиналзы вань, ужаса толэзьлы быдэ оглом 50 сюрс манет поттэ, ипотека тыре. Кызьы со семьялы пунэмаськытэк отпуске коньдон люкано?

Нырысь ик тодоно шутэтскыны мынон нуналэз. Собере валано, толэзяз кӧня коньдон тыриськонъёслы кошке, нош кӧняез кыле. Табере уксёез люканы кутсконо. Шуом, путёвка 100 000 манет сылэ, сое люкано ар куспын, иське, котькуд толэзе 7-8 сюрс манет кельтоно луоз. Та уксёез семья пунэмаськыса басьтысалыз ке, банклы толэзяз 7-8 сюрс манет ик тырысалыз.

Люкам коньдондэс утёно банкын, депозит яке вклад усьтыса — озьы уксёды тӥледыз уз гочаты ни, со сяна, барышты банкын нуналысь нуналэ будоз.

Вуз каронние мыныкуды, асьтэдыз кияды возе. Кредит тырисьёс дышо, коньдонзэс шыръяны, но тыриськонъёссы бырем бере гань-гань карисько, уксёзэс лыдъямысь дугдо. Но сое выль макелы люканы луэ ук.

Ас азямы ужпум пуктӥм ке, патер, автомобиль басьтыны, шутэтскыны ветлыны пунэмаськытэк но луэ.

Кулэ но туж кулэ

Наталья Шумилова:

— Вань вузъёсты 2-лы люкыны луэ: соос тӥледлы кулэ яке туж ик кулэ ӧвӧл. Кулэосыз эшшо 2-лы люкисько на: одӥгъёсызлэн дунзы будэ, мукетъёсызлэн — синэ.

Пунэмаськыса басьтоно йылӥсь дунын вузъёсты гинэ. Кылсярысь, улон интыез, уго тӥ коньдон люкатозяды, солэн дуныз арысь аре йылоз. Векчи техника но мукет арбериосты, коньдон люкаса, басьтыны тыршоно. Автомобильёслэн, ноутбукъёслэн, смартфонъёслэн дунзы пумен усе. Та вие тӥ кредит басьтыны быгатӥськоды, но умойгес луысал, дунзылэсь ӝынызэ ке но люканы быгатысалды ке.

Чаклалэ, пӧртэм тыриськонъёслы ӝыны уждундылэсь тросгес уксё медаз кошкы. Соин ик выль пунэмаськемъёслэсь палэнске. Мыл потэмъя гинэ улыны уг луы.

Кредиттэс ӝоггес ворсаны тырше. Ӵектӥсько кредиттэс нырысетӥ аръёсаз ик пытсаны, озьы процентъёсты ичигес тыроды. Шуом, тӥ автомобиль басьтон понна 500 сюрс манет пунэмаськиды, тыроно 5 ар. Толэзьлы быдэ 13 сюрс 500 манет. Та борды 1 сюрс манетлы уногес тыриды ке, кредиттэс 6 толэзьлы вазьгес ворсалоды, процентъёссэ 40 сюрс манетлы ичигес тыроды.

Бадӟым малпанъёстэс зэматон понна таӵе амал но дэмласьком. Кылсярысь, тӥ таяз аре машина басьтыны медӥськоды. Банке ветлыса, тӥледлы лыдъязы толэзьлы быдэ ма мында тыроно луоды. Валаськоды, со тыронъёсты тӥ вормоды, туж ик секыт уз йӧты. Но машина таяз аре ик эн басьтэ, одӥг ар уксёдэс люкалэ на. Озьы кредит ӧжытгес тыроды — бадӟым люкетэз люкамын ни ук!

Сяме пыртэлэ: толэзьлы быдэ барыштылэсь 10 процентсэ ке но пуйыады ватэ, соку бадӟым арбериос басьяны трослы капчигес луоз, нош коньдонды, тӥлесьтыд юатэк, палэнэ уз кошкы.

Артём Малых

Туспуктӥз А. Горбунов

Удмурт Дунне
By Удмурт Дунне Декабрь 7, 2017 09:52