Удмуртиысь 10 сюрс пала адямиос ульчаетӥ скандинав амалэн ветло

Удмурт Дунне
By Удмурт Дунне Декабрь 28, 2017 14:06

Шаерысьтымы спортъя федерациос пӧлысь тужгес егитэз луэ скандинав амалэн ветлон. Та вакытлы Удмуртиысь 10 сюрс пала адямиос ваньмон дыръязы ульчаетӥ бодыосын вамышъяло.

Бодыен вамышъясьёсты тужгес трос пумитаны луэ Ижевск но Воткинск городъёсын. Соос борды итӥськизы ни Сарапул, Глазов городъёсын, Эгра, Алнаш но мукет ёросъёсын улӥсьёс.

Кемалась ик ӧвӧл Удмуртиысь скандинав амалэн ветлонъя федерация пусъемын вал Удмурт Республикалэн Тӧроезлэн «Данъян» («Признание») премиеныз. Федерациен кивалтӥсь Григорий Ушаков но солэн юрттӥсьёсыз шаерысьтымы калыкез скандинав амалэн ветлонлы синмаськытыны быгатӥзы.

— Федерацимылы ар но ӝыны гинэ ай, нош ужаны быгатэмез син азьын, — шуэ солэн кивалтӥсез Григорий Ушаков. — Мугорез кыдатон понна нимысьтыз спорт инвентарь, бызьылон сюресъёс кулэ ӧвӧл. Тросгес калык люкаське паркъёсы. Шаерысьтымы кивалтӥсьёсын кенешыса, сюресъёсты азьланяз югдытыны малпаськомы. Соосты Европаын выллем ӧжытак пызьнасалзы на ке луоен, бодыен вамышъясьёс вераны луонтэм шумпотысалзы.

Та вие нуналлы быдэ дэмен мугорзэс кыдатыны — бодыосын вамышъяны — 10 сюрс пала адямиос потало. Гуртъёсын улӥсьёсты но лыдъяно ке, лыдпусэз 3-4 поллы уноятыны луоз на, дыр. Бодыен вамышъясьёсты тужгес трос пумитаны луэ Ижевск но Воткинск городъёсын. Соос борды итӥськизы ни Сарапул, Глазов городъёсын, Эгра, Алнаш но мукет ёросъёсын улӥсьёс. Вакчи дыр куспын скандинав амалэн вамышъянъя калыккуспо фестивальёс ортчытэмын, дышетскон вылысь 5 семинар радъямын, 50-лэсь ятыр мастер классъёс возьматэмын.

— Нырысьсэ трос  калык азе потӥмы туэ гужем Сюмси черкогуртын, — веранзэ азьланьтэ Григорий Евгеньевич. — Соку гурт спортсменъёслэн шудонъёссы дыръя калыклы мастер-класс возьматӥмы, нош собере мылкыд карисьёс понна нимысьтыз эстафета ортчиз. Вожвылъяськонэ пыриськизы дасо пала ёрос командаос. Шонер вамышъян понна нимысьтыз бодыос кулэ, соос кузь ик луыны кулэ ӧвӧл. Вамышъяны потано нуналлы быдэ ичизэ ог 3 иськем ке но.

Гурт шудонъёс ортчем бере бодыен вамышъясьёслэн лыдзы эшшо но йылӥз. Табере шаерамы ужало ни та амалъя нимысьтыз дышетскем 6 тренеръёс, 100 мында инструкторъёс. Кылем шутэтскон нуналъёсы бадӟым фестиваль-вожвылъяськон ортчиз Глазов городын. Азьланяз таӵе ужрадъёс ортчозы на Уваын, Можгаын, Камбаркаын. Бодыен ветлӥсьёс дасясько вуоно арын 25-тӥ августэ ортчоно 3-тӥ калыккуспо фестивальлы. Калыкез шонер вамышъяны дышетон сяна, нимаз адямиос но командаос куспын ӵошатсконъёс, эстафетаос луозы.

Арлыдоос сяна, спортысь та амалэ егитъёс но мыло-кыдо кыстӥсько. Кызьы ивортӥз Григорий Ушаков, азьланезлы бадӟым ужпум пуктэмын: 2-3 ар куспын бодыен вамышъясьёслэсь лыдзэс йылэтоно, вань калык пӧлысь ог 10 процентэз соин мед вырозы. Та амал туж иназ луэ травма басьтэм спортсменъёслы но. Кырын пыдын ветлыса, сюлэм умойгес ужаны кутске, улон гумыр кузьгес луэ.

Валентина ЕМЕЛЬЯНОВА

Туспуктэм: myudm.ru

 

 

Удмурт Дунне
By Удмурт Дунне Декабрь 28, 2017 14:06