Тылкӧльы но Жильырик. Лия Малых. Кык ёзэн сценка

Удмурт Дунне
By Удмурт Дунне Декабрь 15, 2017 17:30

Вавожысь «Берёзка» нылпи садысь Ульяна Сергеевалэн суредэз.

Шудӥсьёс:

Жильырик — ошмес

Тылкӧльы — инмысь усем кӧльы

Лулпу — писпу

Коӵо — тылобурдо

Нырысетӥ суред

Возь вылын огназ сылэ Лулпу. Кылӥське гудыртэм куара, собере чиляк тыл ӝуатске но кысэ. Потэ горд дӥськутэн пӧрмытскем пияш — Тылкӧльы.

Тылкӧльы (инме учкыса). Ӟеч луэ, анай, атай, вын-сузэръёсы! (Котырак эскериськыса, кӧня ке пол пыд вылаз тэтча.) Зэмен но, мон музъем вылын. Вот зол! Табере мон татын кузё луо! (Шораз паймыса учкись Лулпу доры матэктэ.) Кылӥськод-а, пуклёк?

Лулпу. Мон — Лулпу, та возьлэн лулыз. Нош тынад пиньёсыд будымтэ на татын кузёяськыны!

Тылкӧльы. Хе-хе-хе, мон пиньёстэк но быгатӥсько ваньзэ киж-куаж сутыны-куасьтыны. Нокыӵе лул уз уть тонэ!

Лулпу. Мынам лулы сизьымдон сизьым полэс. Жадёд, котькудзэ утчаса. Адӟиськод-а, кӧня куаръёсы, вайёсы?

Тылкӧльы. Зэм ик-а? Нош мон лыдъяськыны уг быгатӥськы! Озьыен, тонэ, Пулул, озьы гинэ уд вормы!

Лулпу. Эшшо огпол верасько: мон — Лулпу. Нош лыдъяськыны уд ке быгатӥськы, кытысь тодод вормемдэ?

Тылкӧльы. Йырме поромытӥд ни, Пеньлул! Малы кулэ лулъёстэ лыдъяны? Мынам пеллян гумые вань. (Кисыысьтыз чилясь гумы поттэ.) Пельтӥ ке тани таин зол-зол, пеньлы пӧрмыса, лулъёсыд оген-оген омыре тӧлӟозы!

Ватскемысь потэ Коӵо.

Коӵо. Ӵок, ӵок! Мон ӵапак таӵе чачаме ыштӥ вал, пеллян гумыме, шуисько. Нош чачае тӥни кин киын вылэм.

Тылкӧльы (пеллян гумызэ мышказ ватыса). Ымдэ эн усья, кыӵыртӥсь Мучоло, мыным сое атае кузьмаз!

Коӵо. Кытысь адӟиськод мучолоез? Учкы, кыӵе шоголь дӥськутэ — тӧдьыен сьӧдэн суро.

Тылкӧльы (гумызэ ым дораз карыса). Вал куӵо, каром сьӧд эгыр кадь!

Коӵо. Ӵок, ӵок! Ӧвӧл кулэ! Тон, нодтэм пи, монэ гинэ ӧвӧл, вань улосэз пеньӟытод!

Тылкӧльы. Мынам нимы Нодтэм ӧвӧл, мон — Тылкӧльы, атае — Интыл, нош анае — Инкӧльы.

Коӵо (выллане учкыса). Ӵок, ӵок! Иське, тон инмысь усем мар ке! Визьмыд ӧз пазьгиськы-а, музъем борды шуккиськыкуд?

Лулпу. Йыркобыез буш ке, мар отысь пазьгиськоз? Визьманы ӧз пӧрмытэ но, анай-атаез юри асьме доры куштыса кельтӥзы, луоз.

Тылкӧльы. Чилекъянэз но Гудыръянэз сайкатыса, соос монэ асьсэос Музъем вылэ келязы. Атай шуиз: пеллян гумыен, пе, тон быдэс улосын кузё луод. Нош гумые огшоры ӧвӧл: пельтӥ ке, котырак гольык музъем кылёз, тӥледыз но нокин уз шедьты ни.

Коӵо. Ой, ӵок, ӵок! Иське, тон милям кузёмы? Тыныд пыдозяд йыбырттыны кулэ?

Тылкӧльы. Шонер кыӵыртӥськод, Ӟустари. Улэп кылемед потэ ке, тон мынам юрттӥсе луод.

Лулпу (серемпыр). Котырысьтыд ваньзэ сутӥд-быдтӥд ке, кинэн-о кузёяськыны малпаськод?

Тылкӧльы. Таиз сярысь мон ӧй малпаськы.

Коӵо. Эн ик малпаськы, визькӧльыосыд сураськыса, кин луэмдэ но вунэтод. Нош мон котькытӥ лобасько, котьмае адӟисько-тодӥсько. Ӵок, ӵок! Инмысь усемдэ адӟыса но, соку ик татчы лобӟи, оло, пӧй, кинлы ке юрттэт кулэ.

Лулпу. Пересьмон вакытад инмысь усем шузи-мазилэн ляльчиезлы пӧрмид, иське, Коӵо?

Тылкӧльы. Возьмато мон тыныд шузи-мази, Улпу! (Тылкӧльы гумызэ ым дораз вуттӥз.)

Коӵо. Сыл ай, сыл, Тылкӧльы! Юнме дырдэ эн быдты, ачид кылӥд, кӧня лулыз Лулпулэн. Нош мон тодӥсько, кызьы соосты ваньзэс огазеяны но кыре поттыны.

Лулпу (сялӟиськыса). Адӟод ай, пыд ӵушетлы но тон уд яра, Коӵо, кузё шуонэдлы!

Коӵо. Шып ул, Лулпу! Уд адӟиськы-а, Тылкӧльы жадемын. (Тылкӧльылы вазиське.) Кужымзы трос мед луоз шуыса, кыдёкысь вуэм куноосты Музъем вылын кылдэм сямъёсъя нырысь изьтыны выдто. Выд тани татчы, Лулпулэн пыд азяз, Тылкӧльы. Нош мон пеллян гумыдэ лушкамлэсь возьмало.

Тылкӧльы. Ха-ха, кин гумы борды йӧтскоз, соку ик инкӧльылы пӧрмоз! Нош кузь сюресэз ортчыса, мон зэмзэ но жади. (Лулпу улэ выдэ но умме усе.)

Коӵо. Ӵок, ӵок, изь ойдо! Нош ми Лулпуэн малпаськомы, кызьы тонэ визьманы.

Лулпу. Амалы ке луысал, та инсьӧр кӧльыен ваче думыса, кыктэс но кыдёке-кыдёке ӵыжыса келясал!

Коӵо. Уд быгаты угось, выжыосыд музъем борды дэмӟемын. Кылэме вань, пыд улысьтыд куке но Кезьыт ошмес пызьыра вал. Котырысьтыз куакъёсты, писпуосты кораса, адямиос сое жуг-жаген пачкатӥзы. Ошмес син пыдло музъем улэ ватӥськиз. Сайкаты сое, оло, Тылкӧльыез вормыны юрттоз.

Лулпу. Визьмо ик вылэмед тон, Коӵо! Марлы аслым сыӵе малпан ӧз лыкты?

Коӵо. Ӵок, ӵок! Адямиос котырын улӥд ке, оломае но тодод. Бен тон но, Лулпу, кескич вылэмед. Сизьымдон сизьым лулы, пе, мугорам, нош ачиз мырдэм гинэ возиське пыд йылаз.

Лулпу. Тырмоз супыльтыны, ошмесэз сайкатоно!

Лулпу мугорыныз выретэ. Кылӥське ву жильыртэм, собере — ошмес куара.

Куара. Лулпу, та дырозь мон тонэ куасьмемлэсь ути, малы дӥсьтӥд кӧлэмысь сайкатыны?

Лулпу. Вождэ эн потты, Кезьыт ошмес! Тон гинэ быгатод музъеммес такыр кылемлэсь утьыны.

Куара. Адямиос монэ одӥг пол сантэмазы ни, выльысь уродэ усеме уг поты. Эн ик куры, Лулпу.

Лулпу. Вутэк сутскозы, куасьмозы котырысь возьёс, нюлэсъёс, улэп макеос. Инмысь усем кӧльы ваньзэ сутыны малпа, нырысь ик — монэ.

Куара. Ярам, Лулпу. Мон келяло аслэсьтым пиме, Жильырикез, со йӧ кадь ик кезьыт.

Куара чалме. Потэ азвесь дӥськутэн пӧрмытскем пияш — Жильырик.

Коӵо. Ӵок, ӵок! Кызьы та пинал мар ке вормоз Тылкӧльыез? Инсьќр куно гумыеныз пельтӥз ке, пӧзись ошмеслы пӧрмод!

Жильырик. Кезьыт мугорме ӧжытак ӟырдатэм мултэс уз луы.

Лулпу. Мон тыныд оскисько, пие! Тани та сюлэмтэм кӧльыез вормыны кулэ тыныд! (Возьматэ Тылкӧльы шоры.)

Шораз учкемысь, Тыл-кӧльы сайка но чоркак султэ, Жильырик котыртӥ ортче.

Тылкӧльы. Тӥни кыӵе тон, Лулопулэн лулыз. Шорад одӥг пол пельтӥ ке, вупульылы пӧрмод!

Жильырик. Пелляны котьку вуод. Ойдо нырысь кужыммес мерталом. Яке кышкаськод?

Тылкӧльы. Шедьтэм маин кышкатыны!

Жильырик. Ойдо соку Бадӟым из доры бызём.

Жильырик но Тылкӧльы бызьыса кошко.

Коӵо. Пиос, монэ но басьтэ сьӧрады! Ӵок, ӵок! Мон туж яратӥсько мыжгаськисьёсты учкыны! (Сьӧразы кошке.)

Лулпу. Коӵо, визьмо нырдэ висказы чуртнаны эн шедьты-мар!

Кыкетӥ суред

Сцена вылын лӥял сылэ, со котыре кык шуям сяська мертчытэмын, палэнынгес — Бадӟым из. Бызьыса пото Жильырик но Тылкӧльы. Бӧрсязы ик вуэ Коӵо, лӥял вылэ пуксе.

Жильырик. Быгатод-а та изэз вырӟытыны яке пильыны?

Тылкӧльы. Али ик! (Гумыеныз пелля, донганы выре, номыр уг пӧрмы.) Адӟом, тырмоз-а аслад кужымед вырӟытыны та гурезез.

Жильырик. Вырӟыты-тэк но мон из ултӥ потыны быгато. (Кылӥське ву жильыртэм куара. Из котыртӥ Жильырик азвесь нюжаос кыске.)

Тылкӧльы. Нош из улын вуэз вань-а?

Жильырик. Ӝут но адӟод, вань-а, ӧвӧл-а.

Коӵо. Ӵок, ӵок! Одӥг : ноль — вормиз Жильырик!

Тылкӧльы. Табере мынэсьтым кылзы, Пызьырик! (Котырак утчаське но лӥял пала мынэ.) Быгатод-а сутыны та лӥялэз?

Жильырик. Сутыны визь кулэ ӧвӧл. Шырпу куштӥд но — ӝуатскоз!

Тылкӧльы. Возьматы, кытын шырпуэд?

Коӵо. Сылэ, дугдэ! Уд адӟиське-а, татын мон пукисько. Тӥ тазьы олокытчыозь но вуоды! Ӵок, ӵок! Нош быгатоды меда улӟытыны та шуяны кутскем сяськаосты?

Тылкӧльы. Мар отын секытэз — куаръёссэ, йырзэ выллань ӝут но, ужез быриз. (Огез сяська борды йӧтске но, соиз погра.)

Жильырик. Вуэн сектало но, сяська улӟоз. (Вуэн кисьтэм каре но, сяська погра.) Ӧй вала!

Коӵо. Мар отын валантэмез? Тылкӧльы сяськаез пӧсь лулыныз куасьтӥз, нош тон кезьытэныд кынтӥд. Кыкты но туж кужмоесь, тӥледлы эшъяськыны кулэ!

Тылкӧльы. Нош мар со сыӵе эшъяськон? Мыж-гаськон-а, мар-а? (Мыжыкъёсыныз сэзъя.)

Коӵо. Эшъяськон — со… Кызьы валэктод меда тыныд, кӧльы йырлы? Со ваче ки кутскыса вамышъян.

Тылкӧльы. Бен, таӵе кужмо эш мыным кулэ. Асьмеос тонэныд, Жильырик, вань улосэз киултомы!

Жильырик. Нош мыным кулэ ӧвӧл ассэ гинэ тодӥсь эш. Кытысь палдӥд, отчы ик лобӟы! Музъем вылын тон кадь эш нокинлы кулэ ӧвӧл.

Тылкӧльы. Инсьӧр монэ дораз уз басьты ни, анай-атай понна но мон палдэм пи. Одӥг пеллян гумые сяна, мынам нокинэ но, номыри но ӧвӧл. (Викышъя.)

Жильырик. Ярам, мон тонэныд соглаш эшъяськыны. Но асьмеос номыре ум куасьтэ, ум сутэ, ум кынтэ. Гумыед вуосме шунытгес но небытгес карыны юрттоз. Сое юыса, адямиос но, пӧртэм лулосъёс но таза луозы. Нош котырысь возьёс сяськаосын шобырскозы.

Коӵо (синвуаськыса). Ӵок, ӵок! Вудэс юыса, оло, мон но пиналгес луо.

Тылкӧльы. Зол, мон но ӟеч уж лэсьтыны быга-тӥсько вылэм! Сыл ай, нош мар шуоз Лулпу? Кызьы гинэ ӧй ултӥя мон сое. Табере адӟемез но уз поты тонэныд, лулыныз, артэ.

Жильырик. Таиз понна эн сюлмаськы. Лулпу кыкнамес лулъёссэ сямен ӟыгыртоз, выжыосыныз шобыртоз. Ойдо бызём со доры ӝоггес!

Тылкӧльы. Ойдо!

Бызьыса кошко.

Коӵо. Монэ, монэ ву-нэтӥды! Ӵок, ӵок! (Сьӧразы калъяське.)

Удмурт Дунне
By Удмурт Дунне Декабрь 15, 2017 17:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*