Туннэ  тӥляд кияды — турлы буёло номермы.

Удмурт Дунне
By Удмурт Дунне Декабрь 28, 2017 12:02

Зинаида Рябинина, валтӥсь редактор

Гажано лыдӟисьёсмы, туннэ  тӥляд кияды — турлы буёло номермы. Тӥ малпады, со  выль ар кузьым, праздник понна синпӧет, отӥяз азьло сямен ик потоз. Уз — табере газетмы  чебер луоз котьку!

Вуоно арысен 8 бамъем номерамы 4 бамез турлы буёло луоз, нош 24 бамъемаз — 8-эз. Мукет изданиос шоры кемалась вожъяськыса учкылӥм, но асьмелэн луонлыкмы ӧй вал, угось кӧня ке бамез  буян понна гинэ но ӝыны миллион манет кулэ! Вылаз ик, туала бюджетэз тодӥськод ке… Но осконъёс куддыр быдэсмыло. Туэ гужем удалтӥз газетэнымы матысьгес тодматыны Удмуртилэсь выль Тӧрозэ Александр Бречаловез. Ужаммес ушъяз, но вылтусмы  солы… ӧз кельшы. Чеберсконо шуиз но, ми чеберским тани! Валамон ини, Кивалтэт, Печатья но иворъёсъя агентство юрттытэк, номыр ӧй пӧрмысал. Озьыен, дунъялэ «дӥсьмес»!

Но ми тодӥськом: калыкын дӥсья пумитало ке, келяло визья. Соин ик азьло сямен вань сюлмысь тыршом пуштросмес узырмытон но калыкен ужан бордын. Кайтаысен ӧдъяськом вал вуж рубрикаослэсь куштӥськыны, но лыдӟисьёс котькуд пумиськонын куризы: эн исалэ «Тӧр шорез» но «Сю сюресэз» — со бамъёстэк газет мӧзмыт луоз. Кылзӥськиськом тӥлесьтыд. Нялтас вераса, вазиськем потэ: жингыръялэ-гожъялэ милемлы ӵемгес, ушъялэ яке курлалэ — журналистъёслэн ужазы со туж юрттэ.

Туэ вань калыкез паймытӥзы «Дарт» номермес лэсьтӥсь егитъёсмы — табере, смартфонэз газет шоры пуктыса, сьӧдо-тӧдьыё туспуктэмъёс улӟо — улэпкын сямен адями вераськыны яке кырӟаны, туп ӵыжаны кутске. Выжыкыл но тӥни! Азьланяз озьы ик улӟытыны тыршом «Удмурт дуннелэсь»  номеръёссэ. Соин ик эн куштӥське гожтӥськонлэсь, ми тӥле-дыз  паймытъялом на!

Нош али — Выль арен! Котькуд лыдӟисьмылэн улоназ кайта пичи ке но чебер выжыкыл мед быдэсмоз. Армы шудо мед луоз!

 

 

Удмурт Дунне
By Удмурт Дунне Декабрь 28, 2017 12:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*