Шахматэн шудыны дышетоно школаысен

Удмурт Дунне
By Удмурт Дунне Декабрь 18, 2017 13:44

Кылем шутэтскон нуналъёсы Дэбесысь политехникумын шаерысьтымы шахматлэн азинскемез сярысь вераськизы. Гуртъёсысь покчи но арлыдо спортсменъёс шахматэн ӝог шудыны быгатэмзэс эскеризы. Ужрадэ люкаськылӥзы 9 ёросъёсысь 109 спортсменъёс.

Дэбесэ 9 ёросъёсысь 109 шахматистъёс люкаськылӥзы.

Бадӟым ужрадэз усьтонэ пыриськиз но ӵошатсконъёслэн валтӥсь судьязы вал шаерысьтымы Шахматъя федерациен кивалтӥсь Александр Ватлин. Ёрос командаосын кивалтӥсьёс котырес ӝӧк сьӧрын кенешизы шахматэз азинтон сярысь, нош гурт спортсменъёс кечато пул сьӧрын шудӥзы.

Шахматъя федерация Удмуртиын кылдытэмын 2007-тӥ арын. Со дырысен шаерамы трос пӧртэм ужрадъёс, ӵошатсконъёс ортчытэмын, отчы пыриськыны вуылӥзы 14 странаосысь но 33 улосъёсысь адямиос, нимо-дано спортсменъёс.

Кылем арня пумын Удмуртилэн Тӧроез Александр Бречалов Москваын пумиськылӥз Россиысь Шахматъя федерациен кивалтӥсен Андрей Филатовен. Отын но шахматлэн азинскемез сярысь вераськизы. Удмуртиысь Шахматъя федерация туэ шедиз Россиысь устоосыз пӧлы. Устоен лыдъямын солэн школаын шахматэн шудонлы дышетон сярысь проектэз. Кечато пул сьӧры покчи классъёсысен ик пуктоно. Туннэ нуналлы шаерысьтымы ог 10 ёросын гинэ шахматъя кружокъёс ужало. Азьланяз, оло, со кружокъёсты воштозы урокъёс. Россиысь Дышетонъя но наукая министерствоын ӵапак та сярысь вераськон ӝутэмын. Ӵектонэз умоен лыдъязы ке, Дэбесысь политехникумен кивалтӥсьёс азьлань вамыштыны дась. Соос соглаш дышетӥсьёслэсь тодон-валанъёссэс будэтонъя нимысьтыз курсъёс радъяны.

— 2010-тӥ арын гужем Гурт шудонъёс Дэбес черкогуртын ортчем бере спортэз азинтонлы эшшо но бадӟым саклык висъяны кутскимы, — шуэ ёрос администрациысь егитъёсын ужан политикая, мугорез кыдатон культурая но спортъя ёзэн кивалтӥсь Андрей Князев. — Нош 2012-тӥ арысен спортъя нылпи школаын шахматэн шудонъя клуб усьтӥмы. Пиналъёсты шахматэн шудыны дышетэ спорт удысын ужасьтэм мурт Сергей Васильев. Вакчи дыр куспын азинсконъёсмы шӧдӥськыны кутскизы, нош берло 2 арзэ пинал шахматистъёсмы шаерамы кужмоосыз луо.

Та нуналъёсы Дэбесын ортчем ӵошатсконэ пыриськемъёс пӧлысь тужгес покчиезлы шахматистлы — Александр Агеевлы — 7 арес вал, нош тужгес арлыдоезлы — Геннадий Пономарёвлы 76 арес. Пиналъёс пӧлын котькинлэсь ӝог но сэзь шудыны быгатэмзэс возьматӥзы Якшур-Бӧдья ёросысь Татьяна но Павел Широбоковъёс, арлыдоос пӧлын висъяськизы Дэбес ёросысь Ольга Прохорова но Эгра ёросысь Владимир Бабинцев.

Валентина Емельянова

 

 

Удмурт Дунне
By Удмурт Дунне Декабрь 18, 2017 13:44