Шаерамы 10 сюрс 59 ВИЧ-инфекциен черламъёс

Удмурт Дунне
By Удмурт Дунне Декабрь 21, 2017 10:04

Удмуртиын туэ ар ӵоже гинэ 1 сюрс 49 мурт ВИЧ-инфекциен черлаз. 52 процент учыръёсы — наркотикъёсын сэрен.

Яр, Глазов, Камбарка

1-тӥ декабре быдэс дуннеын арлы быдэ пусъё СПИД-эн нюръяськон нуналэз. Асьме шаерын но та висён зол вӧлмемын — СПИД-эз алонъя но паласькись висёнъёсын нюръяськонъя элькун центрын учётын 10 сюрс 59 адями.

— Удмуртиын 100 сюрс мурт пӧлысь 470-эз ВИЧ-инфекциен черламын, — вера СПИД-эз алонъя но паласькись висёнъёсын нюръяськонъя центрлэн валтӥсь врачез Олег Горбунов. — Быдэс Россиын но Приволжск федерал округын сярысь, асьме дорын висисьёс ӧжытгес ке но (отын 621 но 618), югдур лэчыт. Куд-ог ёросъёсын черламъёслэн лыдзы, Россиын сярысь но, уногес, кылсярысь, Яр, Глазов, Камбарка палъёсын. Тодӥськоды на, дыр, 2002-тӥ-2003-тӥ аръёсы наркотикъёсты асьме уйпал ёросъёс пыр зол вӧлмытъязы, уката ик героинэз. Соин сэрен ВИЧ-инфекциен черламъёс но трос луизы. Та дырозь со вакытлэсь бервылзэ шӧдӥськомы на. Таӵегес ик югдур Камбаркаын но. Татчы наркотикъёсты вутто бускель Башкортостанысь. Кышкыт висёнлэсь вӧлмемзэ герӟаськомы на химия тӥрлыкез быдтонъя заводлэн ужаменыз. Угось Камбаркае ужаны быдэс Россиысь адямиос лыктылӥзы, сьӧразы наркотикъёс, висёнъёс но вуизы.

Удмуртиын ВИЧ-инфекция зол вӧлмиз 2013-тӥ-2014-тӥ аръёсы но. Солэсь азьвыл 30-40 процентлы ичигес висисьёсты шараяллямы. Черламъёслэн лыдзы тросгес луиз, синтетической наркотикъёс вӧлмыны кутскемен. Соин но туэ, азьвыл аръёсы сярысь, тросгес, 1 сюрс 49, выль висисьёс шараямын. Эшшо туэ 20 процентлы тросгес адямиос ВИЧ-лы эскеремын.

Черламъёс пӧлын 70 процентэз — 25-40 аресъемъёс, озьы ке но пумиськыло учыръёс, куке 50, 60 аресъемъёс котыре кышкыт висён кырмиське. Арлыдоослы ӵемгес та висёнэз кузьмало усыкмытӥсь суретъёсын кушласькисьёс ик, соосын матысь кусып воземзы бере. ВИЧ-инфекция тросгес вӧлмемын пиосмуртъёс пӧлын — 63 процент учыре, нылкышноос пӧлын — 37 процент учыре.

Улонзы кузёме

ВИЧ-ен черлам муртъёсты туссыя уд тодма, соос сыӵе ик адямиос, озьы ик нуналмысь ужаны ветло. Угось врачъёс быгато ни висись адямилэсь улонзэ кузёмытыны, улонзэ капчиятыны.

— ВИЧ-инфекциез эмъяны уг луы, но кулонэ со уг вутты ни, — азьланьтэ О. Горбунов. — Кылсярысь, куд-огез 10-15 арлэсь кема та висёнэн уло ни, тазалыксылы ӝожтӥськытэк. Зэм, со понна врачен дэмлам эмъюмъёсты, куронъёсты туж сак чаклано, ялан эмчиос дорын эскериськоно. ВИЧ-инфекциен черлам мурт быдэс улонзэ эмъюм вылын улэ.

Туала медициналы луыса ВИЧ-ен черлам кузпалъёс таза пинал вайыны быгато. Кылсярысь, центрын учётын сылӥсь адямиос 1 сюрс 705 нылпи вордӥзы, тросэз тазаесь. Но 58 нылпилы — со вань вордӥськемъёс пӧлысь 3 процентэз — кышкыт висён паласькиз ик. Со потэ адямилэн врачлэсь куронъёссэ сак чакламтэысьтыз.

ВИЧ-инфекция — со пыэд ӧвӧл, соин огшоры кизьнэмлэсь черланы уг луы. Та висён палаське матысь кусыпъёс, вир пыр но выжыны быгатэ анайлэсь нунылы.

Эмъяськон дуно

СПИД центре учётэ султэм ваньмыз адямиос дунтэк йӧнатӥсько. Кӧня ке ар талэсь азьло 1 адямиез эмъян понна араз 100-120 сюрс манет котыр кошке вал. Али асьме дорын поттэм эмъюмъёсты кутыны тыршо ни, соин эмъяськонлэн дуныз кулэсмиз. Та вакытэ 1 висисез йӧнатон ог 70-80 сюрс манет сылэ.

Но врачъёслэн эскеронъёссыя 20-25 процентэз адямиос висемзы сярысь уг тодо. Соин туж кулэ нуналмысь адямилы вераны ВИЧ-инфекция, СПИД висён сярысь. Центрысь специалистъёс, волонтёръёс бадӟым ужрадъёс дыръя ВИЧ-лы эскериськыны луонлыкъёс кылдыто.

Угось кышкыт висёнэз алэм одӥг учыр кун бюджетэз 2 миллион 500 сюрс манет тыр шыръяны юрттэ.

ВИЧ-инфекцилы эскеронъёсты дунтэк ортчытыны луэ котькуд больницаын. Озьы ик вазиськыны луэ Ижысь СПИД-эз алонъя но паласькись висёнъёсын нюръяськонъя элькун центре но солэн ёзъёсаз. Соос вань Уваын, Эгралан, Глазовын, Можгаын, Сарапулын, Воткинскын.

Ангелина Снигирёва

Туспуктӥз А. Горбунов

 

Удмурт Дунне
By Удмурт Дунне Декабрь 21, 2017 10:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*