Президентлэн грантъёсызъя фондысьтыз уксё 2 удмурт проект утӥз

Удмурт Дунне
By Удмурт Дунне Декабрь 7, 2017 10:15

Туэ «Удмурт Кенешлэн» «Билингва» но «Шундылэн» «Шудком: дышетӥськом шудыса» проектъёссы Президентлэн грантъёсызъя фондысьтыз коньдон утӥзы.

Проект утӥз 1 миллион 727 сюрс 91 манет.

Кыкез ик проектъёс сӥземын нылпиослы. «Билингва» сярысь трос гинэ гожъямы ни. 2015-тӥ арын кылдэм проект анай-атайёслы но, нылпиослы но сюлмазы лякиськиз ни. Нылпиоссы удмурт кылэз, культураез шудон сямен пыӵатыкузы, анай-атайёс психологъёсын, логопедъёсын кенешо. Проект утӥз 1 миллион 727 сюрс 91 манет. Озьыен, со азинскоз!

— Шумпотӥм, грант утӥмы шуыса. «Билингва» проектмы туэ ар пумозь гинэ чакламын вал, йырмы висе вал ни, кызьы азинтомы ужмес,  — вера «Билингва» проектлэн кивалтӥсез Татьяна Волкова. —  Грантэз басьтон понна вожвылъяськонэ пыриськон азьын ӵектосмес паськытатӥмы. Нырысь ик огазеямы 2 проектъёсты: 2 кылэз тодӥсь нылпиослы чаклам «Нуныкай» пумиськонъёсты — соос ортчозы арнялы быдэ, толэзяз 3 пол, но «Билингва» семинарез — ортчытыны чакламын 7 семинар. Собере проектамы мукет выжы калыкъёсысь адямиосты но кыскыны малпамы. Шуом, бигеръёслэн мылкыдзы луиз ке, ми соосты бурд уламы басьтомы. Соос но нылпиоссылы бигер кылын пӧртэм занятиос ортчытъяны быгатозы, нош ми соослы юрттӥськомы.  «Билингва» семинаръёсы но бигер, азербайджан но мукет калыкъёсты ӧтёмы табере. Та проектмы туж кулэ луись. Мукет улосвылъёсысь но выжы калыкъёс милемыз доразы ӧтё ни.  9-тӥ толсуре, кылсярысь, пӧрмиз ке, ветломы Сыктывкаре, комиос доры. Ми соосты проектэнымы тодматомы но та ӧрын ужзэс кутскыны юрттомы.

«Шунды» огазеяськонлэн проектэз озьы ик нылпиосты удмурт кыл борды кыске. Проект утӥз 2 миллион 874 сюрс 755 манет.

— Милям проектмы 3 люкетлэсь: соя лэсьтыны чакламын ӝӧк выл шудонъёс, телефонэ удмурт ватсэтъёс но 2 мультфильмъёс, — вера «Шунды» огазеяськонлэн тӧроез Алина Чернова. —  Грант утэммылы шумпотӥськом, сюлмаськиськом но. Табере милемлы оскон бадӟым. Ужез быдэстоно.

Президентлэн грантъёсызъя фондысь уксё басьтон вылысь конкурс туэ 2-тӥзэ радъяськиз ни. Тулыс шаермы 49 проектсэ лэзиз вал, нош сӥзьыл — 98-сэ! Уксё утӥзы 25 огазеяськонъёс, оглом 44 миллион 677 сюрс манет тыр. Таӵе емыш юнме шорысь ӧз быгыльскы. Мерлыко огазеяськонъёслы проект гожъяны, малпанъёссэс чебер бинялтыны юрттӥзы «Сообщество» фондысь но «Фаст» огазеяськонысь адямиос.

Мария Векшина

Туспуктӥз Татьяна Волкова

«Билингва», «Нуныкай» но «Анай клуб». Мар бордын пӧртэмлыксы?

Удмурт Дунне
By Удмурт Дунне Декабрь 7, 2017 10:15