Можга ёросысь Кибъяын ворсаськиз аптека

Удмурт Дунне
By Удмурт Дунне Декабрь 28, 2017 10:30

В. Путин пресс-конференция сётон нуналэ редакциямы Можга ёросысь Кибъя гуртысь жингыртӥзы. Куризы: Президентэн герӟаське, пе,  милесьтым телефонмес уг куты — тӥлесьтыд кутоз.

Можга ёросысь Кибъяын ужа участковой больница.

 

Кибъя гуртысь 78 аресъем чырткем песянай Антонина Постникова вылэм со. Нылкышно лад-лад валэктӥз:

— Гужем аптекамес пытсазы, тӥляд, пе, гуртады участковой больницады вань, соин тырмоз. Но отын эмъюмен вуз карыны уг лэзё, лицензиез ӧвӧл, шуо. Быдэс гуртэн 2 пол бичамы ни кинюртэмъёс, аптека усьтыны курыса. Кылӥсь ӧвӧл. Нылы Дэри ёросын улэ, фармацевт луыса ужа, со мыным куддыр посылкаен эмъюм келя. Но тазалык шуак куашкалля ук. Кытчы мон, пересь мурт, эмъюм утчаса, потом гуртлэсь палэнэ? Егитъёслы но аптекалэн ворсаськемез бадӟым йыр висён луиз ай.

Кибъяын туннэ 700 пала улӥсез. Таос пӧлысь быдэ вуымтэос 230 кузя, пенсие потэмъёс 150 лыдъясько. Ӵапак таос ик шуге-леке сюремын. Ужась калык уго городэ ветлон сяменыз но эмъюм басьтоз. Зэм, Кибъялась нуналлы быдэ 8 часын ӵукна Можгае автобус потэ, берен гуртэ городысь со вырӟе 14 часын. Вуоно арысен 11 часын но рейс усьтыны медо. Но одӥг пала билет дун 70 манет сылэ ке, кинлэн озьы ворттылэмез потоз? Куддыр эмъюмед билетлэсь дунтэмгес луэ.

— Аптекамы пайда уг вайы, пе, — вера Кибъя гурт поселениен кивалтӥсь Михаил Александров. — Зэм ик, эмъюмъёсты ватсаса дунэн вузаллязы сюрес дунэз берыктон вылысь. Соин ик, дунтэмзэгес эмъюм утчаса, ӵемысь я Можгае ветлылӥзы, я мукетъёсты басьтыны курылӥзы. Аптекаез ворсалозы шуыса, куд-огез нырысь-валысь шумпотылӥз но. Ӵукнаысен уго «фунфурик» басьтыны мылкыд карисьёс аптека котыре люкаськылӥзы. Собере, гуртамы ёрос участковой больница интыяськемын бере, аптекаез пытсакузы, оскытӥзы: фельдшер эмъюм вузалоз. Бӧрысь гинэ тодӥмы: ФАП-ёсын эмъюмен вуз карыны лэземын ке, участковой  больницаын озьы ужаны законэн алэмын. Табере, мугор шуак ӟырдэктыку но, вирзӥбет шудыку но, эмъюм басьтыны нокытысь луиз.

Таин валче Кибъяын шудтэм учыр но кемдӥз. Огез нылаш йырсазьзэ ыштӥз. Быдэс гуртэн эмъюм утчамы, шуэ Михаил Александров. Югдур секытэн ик кибъяос быдэс гуртэн куриськон гожъязы. Соин ёросысь больницаысь валтӥсь врач Надежда Вдовина Тазалыкез утёнъя министерствое вазиськиз. Министерствоысь валэктон  шум ӧз потты.

— Участковой больницаысь фельдшерлы эмъюмен вуз карыны лицензия уз сётэ, шуизы, — веранзэ азьланьтэ Михаил Александров. — Тӥ палан Тутайгурт, Пуйкагурт (Пойкино), Вылын Юри гуртъёсын 3 ФАП интыяськемын, отысь мед басьяськозы,  валэктӥзы министерствоын. Шуге-леке вуэмъёслы доразы эмъюм вуттон сярысь сюлмаськыны косэмын. Но кин таин выроз?

Ярано коть, участковой больницамы ужа на, шуо кибъяос. Солэн но кыко ар талэсь азьло югдурез капчи ӧй вал. Ас вакытаз татын нылпи ваён юрт но,  хирургия но ужаллязы. 25 койкалы чаклам стационарзы вал. Калык ичи кылемен, больницаез ворсан сярысь ужпум ӝутъязы. Но гуртоосты кылӥзы, больницаез кельтӥзы, ремонт лэсьтӥзы. Туннэ калык но спонсоръёс юрттэмъя укнооссэ пластиклы вошъяло. Участковой больница борды 7 гурт юнматэмын. Со сяна, куддыр Алнаш но Пичи Пурга палась эмъяськыны вуыло. 5 койкалы дневной стационарзы вань на уго. Татын ик ужа секыт висисьёслы чаклам отделенизы. Лек пыктослэсь курадӟисьёсты, секыт операциос бере вуэмъёсты но мукетъёссэ татын уен-нуналэн чаклало-утялто. Тае тодыса но, кибъяос, шуге-леке вуыкузы, куддыр уйин но больницалэн ӧсаз йыгасько. Котькуд вазиськисьлы татын юрттыны выро, асьсэлэн но эмъюмъёссы куддыр уг тырмо ке но.

— Калыкез улляса уд лэзьы ук, — шуэ участковой больницаен кивалтӥсь  Нина Николаева. — Котьма ке но, аптекаез выльысь усьтысалзы ке, быдэс гуртэн шумпотысалмы. Быдтыны каньыл. Нош висисьтэм адями гуртын ӧвӧл. Арняяз 3 пол ке но аптека нуназеозь коть ужасал ке, со бадӟым юрттэт луысал.

Надежда Вдовина югдурысь потон одӥг амал гинэ адӟе: больницае аптека усьтоно. Сэрегез вань. Фармацевт Кибъя гуртын вань, ужаны сертификатэз басьтэмын. Та пумысен «Аптеки Удмуртии» огазеяськонлы но вазиськемын. Но туж кема чалмыт уло ни… Соин калык Президентлы вазиськыны малпаз вал. Оскон солы гинэ на.

Елена Сараматова

 

Удмурт Дунне
By Удмурт Дунне Декабрь 28, 2017 10:30