Мира Самарова: Ним — быдэс дунне

Удмурт Дунне
By Удмурт Дунне Декабрь 25, 2017 16:08

Мира Анатольевна Самарова.

Мира Анатольевна Самарова — кылосбур наукаосъя кандидат, УдГУ-ысь Удмурт кылосбуръя, финно-угроведениея но журналистикая институтысь огъя но фин-угор кылтодонъя кафедралэн кивалтӥсез. Инты нимъёсты эскере, учебной пособиос лэсьтэ, кылосбур наукае компьютерной технологиосты пыртэ. 50 арессэ пусъёнэз азьын вераськиськом удмурт наука но вормонъёсыз сярысь.

Кыл доры сюрес

— Кызьы филологие сюресты кутскиз?

— Мынам атае покчи классъёсын дышетӥсь вал. Но улонам бадӟым пытьы кельтӥз англи кылъя дышетӥсьмы. Жаляса верано, 6-тӥ классын гинэ сыӵе тунсыко урокъёс вал, собере дышетӥсьмы кошкиз, урокъёсмы но мукетэсь луизы, но соку басьтэм материал татчыозь тодам улэ на. Та дышетӥсьлы синмаськыса ик, иностранной кылэз дышетэм потыны кутскиз.

Будӥ мон Таклё гуртын. Атае отчы интернатэ ужаны интыяськиз. Но берло школаез но, интернатэз но пытсазы. Соин ик школаме Кыкваын йылпумъяй ни.

Дышетсконме азьланьтэме потэ вал, но гурт удысын мон асме ноку ӧй адӟылы, соин ик сюрес одӥг вал — дышетӥсе мыныны. Гуртын улӥсьёс шуылӥзы: малы тон удмурт кылэз бырйид, удмурт кыл быроз ни. Соку ик озьы малпало ни вал. Шуи: удмурт кылэз яратӥсько бере, малы мон мукетсэ бырйыны кулэ.

— Университетэз йылпумъямды бере школаын кема ик ужаса ӧд вуттэ. Тӥледыз берен университетэ ӧтизы. Озьыен, студент вакытъёсады ик чырмыт луэмдэс синйылтӥзы?

— Татын, мынам малпамея, тодосчилэн Валей Кельмаковлэн туж бадӟым интыез. Дышетскыны пырем бере ик дышетӥсьёслэсь кыӵе луэмзэс ымысь ыме бадӟым курсъёсысь студентъёслэсь тодыны луэ ук. Кельмаков, пе, студентъёс азе чурыт куронъёс пуктэ, соин ик куд-огез нылъёсмы-пиосмы кышкатскизы, курсовой гожтыны со доры ум мынэ, шуизы. Нош мон йырам понӥ: научной ужме  Валей Кельмакович дорын гожто.  Со ик мыным дэмлаз инты нимъёсын вырыны, аслым но та тема тунсыко потӥз. Дипломной ужме дасякум ик, гуртъёстӥ ветлӥ, материал люкай.

Школаын ужакум ни (дышетӥз Ижысь 10 номеро школаын — авт.), Валей Кельмакович гуртам гожтэт ыстэм, монэ Историяя, кылъя но литературая Удмурт институтэ ужаны ӧтьыса, отын ӵапак топонимикаен вырисьёс, пе, кулэ. Мон пумит ӧй кариськы. 4 ар ортчыса, пыри Валей Кельмаков доры аспирантурае, вуоно араз фин кылэз дышетыны кутски. Соку университетэ кунгож сьӧрысь дышетӥсьёс Сара Хянникяйнен но Иштван Козмач лыктӥзы. Соос нуизы фин но венгер кылъёсты. Кудзэ быръёно: фин кылэз яке мадьярзэ? Малпай, сояз но таяз ветло, кудӥз кельшоз. Нырысь  лыктӥ Сара доры фин кылэз утчаны, мукет нуналаз — Иштван доры. Иштван юа: тон  Сара доры ветлӥд-а ни? Ветлӥ, шуисько, но мынам венгер кылэз но тодэме потэ. Озьы уз пӧрмы, шуэ, кутскид ке, дышеты фин кылэз. Озьы монэ вуттӥзы фин кылэ.

Октябрёнок.

Котькуд кыл ас сяменыз тунсыко. Но фин кыл, Финляндие ветлон дунне шоры учконме воштӥзы. Нырысь Финляндия льӧль очкиос пыр адӟиськиз. Кыкетӥзэ мыныкум, ваньзэ визь пыр поттӥ ни. Соку мон валай, шӧдӥ, 3 кылэз тодӥсько шуыса. Япониысь эшъёсы шуизы: тыныд умой, тон 3 кылэз тодӥськод. Паймыса юасько: кӧнязэ? Удмуртсэ, финзэ, ӟучсэ, пе. Зэм но, удмурт кыл мон азьын соку выль сямен усьтӥськиз.

— Иське, иностранной кылын дышетӥсь луыны малпанды быдэсмиз? Али тӥ университетын фин кыллы дышетӥськоды, азьвыл комизэ но сётӥськоды вал.

— Озьы, лэся. 1996-тӥ арысен УдГУ-ын фин кылэз нуыны сётӥзы. Нырысь, конечно, туж секыт вал, малы ке шуоно ачим но со кылэз туж ӟеч уг тодӥськы. Студентъёслы валэктӥсько-валэктӥсько но собере ачим но валасько. Таӵеез но вал. Огдыре ик ужаса, диссертация гожъяны секытгес потӥз. Тае шӧдыса, монэ 1999-тӥ арын келязы Финляндие. Вань материалэ люкамын вал ни, ӝыны ар куспын диссертациме научной ужъёслэн куронъёссыя радъяй. Со сяна,  фин кылме но волятӥ на.

— Инты нимъёсын выриськоды но, асьтэлэн но нимды туж тунсыко — Мира.

— Мама вера вал: атайме сельсоветэ ыстэм, Марина гожты шуыса. Папалы мынонъяз та ним кельшымтэ но, Мира гожтэм. Оло, со «мир» кылэн герӟаськемын, уг тодӥськы, но ми палан таӵе нимъёс ӧй вал. Та ним туж ик ӵем уг пумиськылы, соин ик пӧртэм учыръёс луыло. 1-тӥ курсын дышетскыкум, паспортэ ышиз, мынӥ милицие, документъёсты лэсьтыкузы, юало: нош малы нимды «Война Анатольевна» ӧвӧл?

Удмурт ужрадлы дасяськон. Тодосчиен Галина Шушаковаен ӵош.

Кылосбур но туала амалъёс

— Тӥ 3 пӧртэм удысэн выриськоды: инты нимъёсты эскериськоды, дышетон пособиос лэсьтылӥськоды, озьы ик филологиын компьютерной амалъёсты азинтӥськоды. Кудӥз матынгес?

— Одӥг ласянь, мон сыӵе адями: пазяськыны уг быгатӥськы. Та пумысен адӟем карымон Удмурт кылосбуръя, финно-угроведениея но журналистикая институтлэн директорез Наталья Владимировна Кондратьева, со одӥг дыре вань ӧръёсты басьтыны быгатэ. Мынам сямы сыӵе ӧвӧл: эскерисько ке инты нимъёсты, соя гинэ ужасько, кыӵе ке книга, учебникъёс поттыны малпай ке, ваньзэ вунэто но та бордын гинэ пуко.

Огъя но фин-угор кылтодонъя кафедралы кивалтӥсе юнматэмзы бере эшшо но тросгес бумага уж лэсьтоно луэ. Мон понна со чик но кулэ ӧвӧл: та уж студентъёс понна уг, эскерисьёс понна лэсьтӥське. Эскерисьёс, оло, соосты уз но учке, но соос луыны кулэ. Бумагаослы туж трос дыр быре. Университетын ваньзэ милесьтым куро: студентъёсты визьманы, элькун вылэ но ужаны, наукаен но вырыны. Но куиньлы люкиськыны уг луы. Кафедрамы сярысь верано ке, мынам тау кареме потэ ӵош ужась юлтошъёсылы. Кафедра — со милям огъя командамы. Котькудӥз ик дышетӥсь аслэсьтыз ӧрзэ туж оскымон нуэ. Котькыӵе но ужъёсты ми огъя лэсьтыны сюлмаськиськомы. Я университетын кыӵе ке ужрад ортче, я факультетын ӝыт радъяське — котькудаз тыршиськом пыриськыны.

Берло дыре топонимикалэсь но, удмурт кыллэсь но кӧня ке палэнски ни, малы ке шуоно валасько, студентъёслы кулэгес кадь компьютерной технологиос. Мыным тунсыко ужаны соку, куке шӧдӥсько, кинлы ке мар ке мынэсьтым кулэ, куке мон студентлы мае ке выльзэ сётыны быгатӥсько.

— Улон азинске бере, удмурт филология но компьютерной технологиос, валамон, одӥг сюрестӥ вамышъяны кулэ.

— Та удысын трос ужано на. Туж потэ вал, студентъёс та борды мед кыстӥськозы, асьсэос выль материалъёс  мед лэсьтозы, мытэм ужме мед азинтозы шуыса.  Но бордам кыскыны уггес быгатӥськы на.

Кунгож сьӧрысь куноосын но семьяеныз.

 

Факультетын компьютерной технологиослы сӥзем ӧрез кылдытыны дэмлаз тодосчи Любовь Петровна Фёдорова. Нырысь-валысь трос пуконо луиз, пӧртэм компьютерной программаосын но ресурсъёсын тодматскыса, дышетон одӥг направлениея гинэ медаз луы шуыса.

Мон вань материалъёсме вотэсэ тырыны тыршисько, куддыр талы дыры уг тырмы, программаос ялан выльдӥсько. Шугъяськытэ со но: тросаз гуртъёсын Интернет уг ужа. Соин ик студентъёслэн мылкыдзы быре асьсэлы кулэ луись интернет ресурсъёс лэсьтылыны. Шуом, удмурт кылъя но литературая урокъёслы. Нош вотэсын кӧня луонлыкъёс тунсыкозэ пӧрмытыны. Шумпотӥсько, али удмурт кылын мультфильмъёс вань, но таӵе туала материалъёс эшшо но тросгес мед луысалзы вылэм.

— Нош оглом филология сярысь верано ке?

— Татын но трос тӧдьы виштыосыз. Мон инты нимъёс бордынгес ужасько бере, вераны быгатӥсько: быдэс шаерысьтымы тросэз нимъёс бичаса вуттэмын ӧвӧл. Нош соос пумен ышо ини, 1990-тӥ аръёсы,  куке мон нырысетӥ экспедициосы потаны кутски, котькуд гуртысь 50 пала нюкъёслэсь, возьёслэсь, ошмесъёслэсь нимъёссэс шедьтыны луэ вал, но Валей Кельмакович  соку ик вера ни вал, со ӧжыт шуыса, азьло, пе, 100 пала микротопоним бичаны луэ вал. Нош али потӥськом ке, 10-15-ез гинэ сюре. Гуртъёсысь дышетӥсьёс, библиотекарьёс инты нимъёсты уг бичало ке, нылпиосын уг ужало ке, со пыраклы вунэ. Али уката ик пичи гуртъёсын улӥсьёс бадӟым гуртэ улыны выжо, огазе люкасько, шуыны луоз. Одӥг ласянь, та умой кадь, одӥг гуртэ потыса, одӥг информантлэсь троссэ тодыны луэ, но мукет гуртысь лыктэмъёс асьсэ гуртсылэсь историзэ вунэто, нош выль гуртысьтызы инты нимъёсты тодыны уг тыршо ни.

«Микротопонимия Верхней Чепцы» диссертациям — собере со монографиен потӥз — пыризы Шаркан ёрослэн уйпалыз, Эгра (шундыпуксён палзэ басьтытэк), Дэбес ёросъёс, Кезлэн оглюкетэз. Трос ортчемын, нырысь ветлэмысьтым вань информантъёсме тодӥсько вал, туж тунсыко учыръёсы но шедьылӥмы, но тросэз вунэ ни: арлыд аслэсьтыззэ басьтэ. Шаркан ёросэ Ӟузя (Зюзино)  пала Дырдашур гуртэ вуим но одӥг пересь кышномурт доры пырим, солэн йырсиез быдэс тугаськемын. Мар луиз, юаськом. Ведӥнъёс, пе, тугаса кельтӥзы. Соку, егит адямиос, кышкатским. Тунсыко потӥз Кер-Нюра гуртлэн нимыз, со Балезино ёросын ни. Малы Кер-Нюра? Нюра нылкышно нимын герӟаськемын-а? Гуртэ вуим но, адӟиськиз: со вырйылын интыяськемын, бамалаз нюр интыез вань. Нюра — со нюр кыллэн вашкала формаез, нош кер — со вырйыл, бамал.

Ми студентъёсын экспедициосы арысь аре потаськом, но туж пичи интыез гинэ эскерыса вуттӥськом. Шаер бадӟым, Балезиноетӥ котырскыса ӧй вутты на, Глазове вуылоно на. Яр ёросын туж тунсыко нимъёс шуыса малпасько. Ку вуо?

Корка пуктӥ!

— Та огыр-бугыр улонын асьтэлы дыр шеде на-а?

— Куд-ог дыръя уг но кыльы, дыр. Чиданы кулэ, дыр, монэ. Мон быдэс нунал ужын — вазь ӵукна гуртысь потӥсько, вуисько 9 часын ӝыт, сиён пӧрась ӧвӧл. Андрей картэ гуртын луэ ке, пӧраське, пие но солэсь адӟем каре ни, пельнянен ке но пумитаны быгатэ. Картэ ӧй юрттысал ке, мон ужаны, диссертация гожтыны ӧй быгатысал. Финляндие быдэс арлы кошкылыкум, пие туж пичи кылиз — 2 арес. Нылпиосмес Андрей учкиз, мамаез но туж юрттӥз.

Егит семья.

Али пиналъёсмы бад-ӟымесь ни. Тырши, нырысетӥ классъёсысен ик ас понназы ужаны мед дышозы, улонзы понна асьсэос кыл мед кутозы шуыса. Куддыръя бӧрдытозь но вуттӥсько вал, лыдӟиськыны косыса. Валера пие, ачим кадь ик, гуманитарий, точной наукаос секытэнгес сётӥсько. Но мынэмез потэ компьютерной технологиос удысэ, дышетске 10-тӥ классын. Кати нылы пыд вылаз йыг-йыг сылэ ни. Ӟуч филология факультетэз быдтӥз, кошкиз Москвае, аспирантураын дышетске, дышетэ Россилэн Правительствоез бордысь финансовой университетын.

Валера но Кати вискын 10 ар ке но, соос огъя кыл шедьто. Нош мон понна,  маин тунсыкъяське Валера, воксё но мукет, валантэм луэ ни. Егитъёслэн улон шоры учконзы ик пӧртэм ни: милемды школаын косо ке, лэсьтӥськод вал, нош  пие али юа: малы со мыным кулэ?

 — Ваньмон дыръяды мар кариськоды?

— Киужен вырисько: керт-тӥськисько, пужыятӥськись-ко, вуриськисько. 1990-тӥ аръёсы туж секыт улон вал… дӥськут пумысен но. Пичи нылме чебер дӥсяме потэ вал. Соку нимысьтыз вуриськыны дышетски. Садике ветлыкуз, мукетъёсыныз ӵошатыса, Катилэн котьку аспӧртэм дӥсез вал, аслам вуреме. Али аслым сумкаос гинэ пӧрмытъясько на. Куке пие пичи вал, куасэн нискыланы, бызьылыны поталляй, пие но спортэ мед кыстӥськоз шуыса. Малпасько, котькуд пияш спортивной луыны кулэ. Озьы ӵошатсконэ но пыриськылэммы вал. Нылы бордам дыръя вожвылъяськыса лыдӟиськиськом вал.

— Кыӵе вормонъёстэс зарни шыкысады пыртыны быгатӥськоды? Азьланяз малпанъёсты бугыртонтэм на, вылды?

— «Удмуртская онимия I. Онимы реальной действительности» берпуметӥ книгаысь та темаез азьланьтыса, мынам потэ на эскереме, кызьы но кыӵе нимъёсты удмурт  писательёс произведениосазы куто, тае нимысьтыз книгаен поттэме потэ. Удмурт кылъя электронной курсъёсы мед ужалозы. Удмурт кун университетлэн электронной системаяз вань «Ономастика» электронной курсэ, соин ми студентъёсын ужаськом, вань на «Удмурт кыл» курс но. Таиз пумозяз вуттымтэ на. Со лэсьтэмын, «Лабыр-лабыр лабыртом!» книга вылэ пыкиськыса, мукет интыосысь материал ватсаса.  сӥземын удмурт кылэз дышетыны кутскисьёслы, чакламын 10 уроклы, лач-лач, пыр-поч лэсьтэмын 5-ез. Тае пумозяз лэсьтон борды ик студентъёсты кыскеме потэ.

Вормонъёсы сярысь ке… Нырысь ик, мон иностранной кылъёсъя дышетӥсь луи. Собере — дышетски вуриськыны, со но мынам льӧль малпанэ вал. Кандидатской диссертациме гожтӥ, нылпиосме будэтӥ. Корка пуктӥ, ми сое быдэсак асьмеос лэсьтӥм: дизайнзэ, пушсэ! Ваньмыз та монэ шумпоттэ. Пичи коркамы вань на, сое потэ удмурт шӧмъем лэсьтэме.

— Кызьы зарни лыдпустэс пусъёды?

— Шыпыт гинэ, чай юыса. Ачим мон гань-гань адями бере, уг поты паськыт конференциос, симпозиумъёс радъяме, кызьы научной ужасьёс пӧлын кулэ каро.

Мария Векшина

 

Удмурт Дунне
By Удмурт Дунне Декабрь 25, 2017 16:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*