Мар сётӥз асьмелы революция?

Удмурт Дунне
By Удмурт Дунне Декабрь 7, 2017 11:15

Альберт Разин.

Берло дыре Октябрь революциез азьвыл аръёсы кадь шукрес уг пусъё ни. Малы? Мугъёсыз уно. Революция — шудон ӧвӧл. Сое кык палтӥз но шерем пуртэн ӵошатыны луоз.

 «Столыпинлэн галстукез»

Большевикъёс музъемез крестьянъёслы сётоно, общинае берыктоно шуизы но, музъем ужась дурыстэм куанӥз. Солы ӧз кельшы П. Столыпинлэн 1906-тӥ арын музъемез вузан сярысь закон поттэмез, общинаез быдтэмез.

Общинаен улыкузы, гуртоос ваньзэ синйылто, чаклало: инкуазез (нюлэсэз, возьёсыз, музъемез) сӧремлэсь, сантэмамлэсь утё, ужан вакытэ юмшасьёсыз ало, быдэс гуртысь нылпиосты ужась но лякыт сямо будэтон сярысь сюлмасько. Сотэк адямилэн ассэ кутон биньгозыез сыркоме но сямыз уродме.

«Един» дыръя (озьы шуо вал общинаен улонэз) гуртлэн музъемез семьяослы люкылэмын вал. Сыӵе дыръя нокин уг косъяськы, котькудӥз ужа ас тодэмезъя. Ачиз тодэ: ку султоно, ку выдоно, мар  но кӧня кизёно, кытчы интыяно поттэм ваньбурдэ… Крестьянлы кельше ас йырыныз улыны. (Тани асьме вакытэ фермеръёслы секыт йӧтэ ке но, соослы кельше асьсэлы асьсэос кузё луыны.) А. Энгельгардт академик мурт косэмъя ужасьёсты (медоосты) батрак нима (государстволы медъяськемъёсты но, кузё вылэ ужасьёсты но). Мон но таин соглаш — медъяськем адями улон шоры кузё синмын учкыны уг быгаты, йырвизьмыз мукет сямен берга.

Тае ӧз ятвылты эксэй кивалтэтлэн тӧроез П. Столыпин. Со малпаз: «Крестьянэд революцие медаз пыриськы шуыса, сое огазеясь герӟетлэсь (общиналэсь) мозмытоно — котькудӥз ассэ гинэ тодыса мед улоз. Музъемез вузаны тупатоно. Нош кинъёс музъемлы шугъясько, Сибире мед кӧчозы. Кулакъёс мед йылозы, соос эксэй пала кариськозы, улонэз уз булгандыре. Музъем уже капитализм пыӵаз ке, трос ю-нянь люкаськоз, Россия узырмоз». Россиын чик но Пётр Аркадьевичлэн малпамезъя ӧз луы: 1906-тӥ-1911-тӥ аръёсы (Столыпинлэн музъем реформаез кутскем дырысен) урожай огъя лыдын гектарысьтыз 5 центнер гинэ люкаськиз. Россия нянез кунгож сьӧры келяз, калыксэ сютэм кельтыса. Николай II эксэй та пумысен йырзэ ӧз ик висьыты. Нош каръёсын но, гуртъёсын но бугыръяськон мылкыд пуромиз, революция лэсьтыны инъет кылдӥз. Столыпин реформаезлы пумитъяськисьёсты ур-вар кариз, репрессие кыскиз. Со понна нимысьтыз «тройкаос»  кылдытъяз. Соослы право сётэмын вал эрик понна нюръяськисьёсты сопал дуннее келяны — сюрсъёсын ошылӥзы. Кыӵесэз со вакытэ «столыпинский галстук» нимазы.

Глазов уездысь крестьянин. Большевикъёс гуртоосты ас палазы берыктӥзы, музъем сётыса. Туспуктэм кутэмын Йӧскалык музейлэн архивысьтыз.

Эксэй валаз ке но, Столыпинлэсь Россилы ӟеч лэсьтыны тыршемзэ, солы ӧз кельшы аслэсьтыз (эксэйлэсь) правозэ кулэстэмез — министерствоос кылдытъямез, Учредительной собраниосын моггетэмез. Та муген со Столыпинэз палэнтӥз — 1911-тӥ арын эксэй охранкалэн агентэз Дмитрий Богров калык азьын (Киевысь театрын) Столыпинэз ыбиз. Ватыкузы Николай II, Пётр Аркадьевичлэн корос дораз пыдесъяськыса, куинь пол «прости!» шуиз.

Кин ке, оло, уг но тоды, дыр: эксэез большевикъёс ӧз пешкытэ. 2017-тӥ арын феврале Ленин Швейцариысь Цюрихын вал ай.

Малы но кызьы эксэй власть куашказ? Ма, Николай II П. Столыпинэн валче туж уно кужымзэс понӥзы «революциез дасяны»: визьмо адямиосты виылӥзы, каторгаын яке тюрьмаын курадӟытӥзы, пыӵалтэм демонстрантъёсты казакъёс но солдатъёс сюрсъёсын ыбылӥзы. Япониен но Германиен ожмаськыса, Россия куанермиз. Вал лушкась Гришка Распутин  эксэен кивалтыны шӧтаз (царица пыр). Огкылын вераса, мыдлань кивалтон эксэй пуконэз лябӟытӥз. Самодержавилэн санэз воксё усиз.

Горд  дӥсь интые — флаг

Вашкала Римын патрицийёс асьсэды олокин кожаллязы, огшоры калыкез (плебейёсты) ултӥязы, горд дӥськутэн ветлыны ӧз лэзьылэ — со чебер угось. (Тӥледлы, пе, бездыт дӥськут но яралоз.) Но дӥсьтӥсьёслэн, юн сямоослэн сётскемзы ӧз потылы, мытылыса горд дэрем дӥсяллязы, «ми но адямиос» шуылӥзы кадь. Эксэй Россиын мытылӥсьёсты чурыт визьмаллязы, асьсэды дворянъёсын но кивалтӥсьёсын оградэ пуктыны тыршисьёсты шымыртон понна царская охранка но жандармерия кылдытэмын вал.

Берат ултӥянлы пумит луисьёс (мещанъёс, рабочийёс), горд дӥськут интые, ураме горд флаг кутыса потаны кутскизы. Соос пала кариськизы дышетскем адямиос, интеллигенция (разночинецъёс). Озьы эрикез яратэмзэс возьматӥзы. Огкылын вераса, горд флаг дӥсьтӥсьёслэн, эрик понна нюръяськисьёслэн (революционеръёслэн) пуссы луиз.

Малы вормизы большевикъёс?

1917-тӥ арын феврале ортчем буржуазной революция бере А. Керенскийлэн огдырлы кылдытэм правительствоез дантэм но ляб вал. Александр Фёдорович Нырысетӥ дунневыл войнаез дугдытыны ӧз вала, крестьянлы музъемзэ ӧз сёты. Соин валче властьсэ туж чаляк ыштӥз, большевикъёс Зимний двореце, вир кисьтытэк, пыризы.

Воксё мукет вал большевикъёслэн азьветлӥсьсы. Ленин 20-тӥ даурысь тужгес но зол политикъёс пӧлы пыре. Со, йыро луэменыз но трос лыдӟиськеменыз, ятвылтӥз: дунне возиське но азинске ужась калыклэн кужмыныз. Марксизм вылэ пыкъяськыса, валаз, улонэз кудпала ӧръяно: ас кужмынызы улӥсьёслы (крестьянъёслы но рабочийёслы) дурбасьтоно. Марксизм идеологиысь потӥзы выль кунлэн тодметъёсыз: сюрло но молот, ужась калыкез данъян сям.

Ильич Россиысь калыкъёсыз оградэ пуктӥз, луонлык сётӥз республикаос, автономиос кылдытъяны, ас кылынызы дышетскыны. Таӵе вождь кинлы уз кельшы? Ваньмыз соя кариськизы, большевикъёс сьӧры мынӥзы. Тужгес но лӧптӥзы нянь будэтӥсьёс. Совнаркомлэн музъемез крестьянлы сётон сярысь декретэз соосты воксё кисьматӥз.

Кин пуромытӥз Граждан ожез?

Граждан ожез большевикъёс ӧз пуромытэ. Ленин революцилэсь азьвыл ик куректӥз: «Кызьы кароно меда, узыръёс адями виылонэ медаз пыриське шуыса? Оло, фабрикантъёслы но банкиръёслы, медаз йыркуръяське шуыса, ваньбурзэс огшапсэ асьсэлы кельтоно?» Но узыръёс йыркуръяськыса ӧз улэ, кунгож сьӧры пегӟизы, зарниоссэс, кӧня вормо, сьӧразы нуизы. Нош Граждан ожез кенжытӥзы тӧдьы генералъёс М. Алексеев но Л. Корнилов. Ужатэк каньылэн улон понна властез ас киязы басьтыны малпаса, Донысь казакъёсыз большевикъёс вылэ узатӥзы, тӧдьы армия люказы. Берат армия кылдытӥзы А. Колчак адмирал, А. Деникин, П. Краснов, А. Шкуро, Н. Юденич генералъёс. Озьы кутскиз вир кисьтон.

Совето властез быдтон понна генералъёс вазиськизы на кунгож сьӧрысь кивалтӥсьёслы. Соосыдлы сюрем-а Россиез резь-куаж кесян, республикаослы люкылон — кемалась та пумысен дартланӥзы вал ини. Озьы асьме вылэ 14 кунысь ожгарчиос омыртӥськизы. Но ӧз ворме. Малы ӧз ворме? Ма, Россиын 80 процентэз калык гуртын улэ вал ук — ю-нянь будэтӥсьёс музъем сётэм совето власть пала кариськизы, улонзэс но ӧз жалялэ.

Ма луысал революцитэк?

Куд-огъёсыз (историез тодӥсьтэмъёс) гордъёсты каргало, трос вир,  пе, кисьтӥзы. Нош тӧдьыос ӧз кисьтэ шат? Атаелэсь 3 агайёссэ судтэк-мартэк Колчаклэн гыжкалъёсыз ыбылӥзы. Мар понна? «Сьӧлыкъёссы» Разин агай-вынъёслэн таӵеесь вал: а) куиньназэс ик калык нырысетӥ удмурт съездэ (Елабуга, 1918) делегатэ быръе; б) бадӟым ӧтчамысь бертыса, югдытӥсь луо: съездлэсь резолюцизэ улонэ пыӵатыса, удмурт книга-газетъёс вӧлдо, школаосты удмурт кылэ поттыны юртто; в) Василий (Елабугаын дышетскемез бере) Ӟунняшур школаын дышетӥсьын ужа. Соку ӝытъёсы мӧйыосыз но грамоталы дышетэ; г) Трокай Ӟатча волостьын «член волостной тройки» луэ, совето властез юнматонэн выре; д) музъем ужась Микаль ӵапак Февраль революция дыръя эксэй армиын служить каре, Петроградэ кемдэ. Митингъёсын ӟырдыт вераськемез понна солдатъёс сое депутатэ быръё — «депутат Петроградского Совета» луэ. Со угось юн мылкыдо, эшшо ке Кузьымгуртысь начальной школаез Похвальной грамотаен йылпумъямын. Армиысь бертэмез бере Кузьымгуртлэн тӧроез луэ, вынъёсыныз ӵош гуртоосызлы фамилиос люкылэ. Соку тӥни соос, асьсэды революционер шуыса, 17-тӥ даурысь бунтовщиклэн нимыз-тулызъя Разин фамилия басьто.

Ленин гожтэм: «Если революция не может защищаться, она ровным счётом ничего не стоит». Шонер. Кӧня революциос вир пӧлын орсмытэмын вал! Октябрь революция ӧй вормысал ке, Л. Корнилов выллем диктаторъёс зарезь мында вир кисьтысалзы: большевикъёсты сяна, либералъёсты но, кадетъёсты но, эсеръёсты но, меньшевикъёсты но кранак (одӥгтэм) виылысалзы. Ма, Колчак Дальневосточной республика кылдытӥз но диктатор луиз, эксэй дыръя кадь ик тупыттэм выриз. Сибирьын солы пумит партизан отрядъёс кылдӥзы, вань калык большевикъёс пала кариськиз но вир юись Колчакез палдытӥз. Озьы совето власть Россиез чара-пара люконлэсь утиз. Туннэ тае куд-огъёсыз вунэтӥзы но Ленинэз янгыше уськытыны выро.

Пумыз вуоно номерын.

 

 

 

 

Удмурт Дунне
By Удмурт Дунне Декабрь 7, 2017 11:15