«Ижысь виновка»: Висисьёс ке вань, шулдыргес

Удмурт Дунне
By Удмурт Дунне Декабрь 21, 2017 14:30

Кылем арнянуналэ Удмуртиысь А. Демидов нимо спорткомплексын «Ижысь винтовка» ӵошатсконлы кутскон сётэмын вал эстафетаос бордысен. Шумпоттӥз учкыны лыктэмъёслэн лыдзы, таяз учыре соос 1 сюрслэсь ятыр люкаськемын вал.

«Ижысь винтовка» асьме дорын 48-тӥзэ радъяське. Со ик луэ Россиысь биатлонистъёслэн кубок понна нюръяськонзылэн 3-тӥ люкетэз. Таиз вожвылъяськон азьвыл аръёслэсь трослы висъяськиз. Нырысь ик, шуныт куазен. Шумпоттӥзы биатлонэз учкыны лыктэмъёс но, азьвыл аръёсы соос 100-200 мында гинэ люкаськылӥзы ке, таяз учыре 10 поллы уногес вал. Ижысь сяна, шаермылэн пӧртэм ёросъёсысьтыз вуэмын вал.

Биатлонэз учкыны лыктэмъёс понна нимысьтыз программа дасямын вал. Соос концерт учкизы, нош нылпиос пӧртэм вожвылъяськонъёсы, шулдыр стартъёсы пыриськыны быгатӥзы. Та ӵошатсконъёсы быдэс семьяенызы висьыны ветло Ува ёросысь Петропавлово гуртысь Яковлевъёс. Валентина Григорьевна Сочиын ортчем Олимпиадаез учкыны но ветлэмын, нош «Ижысь винтовкаез» одӥгзэ но уг кельты. Сьӧраз нуллэ Россилэсь но Удмуртилэсь флагъёссэ, отчы со спортсменъёслэсь кинюртэмзэс бича.

Удмуртиысь егит пиослэн командазы эстафетаын 3-тӥ инты басьтӥз.

Биатлонъя ӵошатскон-лэсь мынэмзэ сак учкизы шаерысьтымы кивалтӥсьёс. Удмурт Республикалэн Тӧроез Александр Бречалов пусйиз: спортэз учкыны, спортсменъёс понна висьыны яратэ ке но, туж потэ вал биатлонэз ас синмыныз адӟемез.

— Биатлонлэсь данзэ вылэгес ӝутон сярысь малпаськоно. Удмуртиын трос кужмо спортсменъёс кыдамын, жаляса верано, уноез та вие мукет улосъёс понна бызьыло, — шуэ Александр Бречалов. — Спортсменъёсты дунъяны быгатоно, малпасько, матысь дыре Удмуртиысь биатлонэз бадӟымесь воштӥськонъёс витё.

Азьвыл аръёсы «Ижысь винтовка» ӵошатсконэ пырисько вал нылкышно командаос но. Берло дыре соос Чайковский городын вожвылъясько. Кызьы ивортӥз Удмуртиысь Биатлонъя федерациен кивалтӥсь Иван Черезов, бадӟым вожвылъяськон радъян вылысь Удмуртиын куд-ог куронъёс уг быдэсъясько, кылсярысь, уг тырмо гостиницаос. Матысь дыре та ужпумез эскерозы но бадӟым ӵошатсконэз быдэсак Удмуртие берыктыны тыршозы. Вылаз ик, Удмуртиысь нылкышноослэн вормонъёссы бадӟымесь. Кылем арняе Пермьын ортчем ӵошатсконъёсын Валентина Телицина 2-тӥ инты басьтӥз, Анастасия Кайшева егит нылъёс пӧлын 1-тӥ луиз.

Ижын воргоронъёс куспын ортчылӥсь эстафетаын арысь аре кужмо нюръяськон пуроме Ханты-Мансийскысь но Тюменьысь биатлонистъёс куспын. Таяз учыре но вормисе потӥзы ХМАО-Югра-2, ХМАО-Югра-1 но Тюмень командаос, Удмуртиысь воргоронъёс 5-тӥ инты басьтӥзы. Юниоръёс сярысь ке верано, тросэз соос кырыж ыбылӥськизы но мултэс кругъёс бызизы. Озьы ке но котькинлэсь сэзь луэмзэс возьматӥзы ХМАО-Югра, Тюмень но Удмуртия-1 командаос. Ӵошатсконын вормисе потэмъёслы винтовкалэсь пичи макетсэ но трос пӧртэм кузьымъёс сётӥзы.

Удмуртилэн командаез понна бызьылӥсь Виктор Плицев та ӵошатсконын ватсаса 3 патрон кутоно луиз. Каллен бызьыны, пе, возьыт вал, учкисьёс кесяськизы, ӝоггес бызьыны куризы. Азьвыл аръёсы чалмытак бызьылӥмы но ыбылӥськимы, учкисьёс ке вань, спортсменлэн мылкыдыз воштӥське вылэм, шуэ В. Плицев.

Спортсменъёслэсь золгес, дыр, шумпотӥзы учкисьёс. Угось соос пӧлын лотерея шудытӥськиз. Валтӥсь кузьымез — велосипед — утӥз Грак ёросысь Пуклё гуртысь Маргарита Печникова. Быдэс семьяеныз юри биатлонэз учкыны лыктӥллям. Шумпотэмын пизы но, азьланяз со биатлонист луон сярысь малпаське.

Валентина Емельянова

 

«Ижысь винтовка»: 20 иськемын ӵошатскиз 102 биатлонист

Удмурт Дунне
By Удмурт Дунне Декабрь 21, 2017 14:30