Иднакаре берытскон

Удмурт Дунне
By Удмурт Дунне Декабрь 20, 2017 10:16

Ижысь ӟуч писательлэн Александр Мартьяновлэн книгаосаз горд сӥньысэн кошко улонысьтыз учыръёсыз. Гожъя со аслаз эшъёсыз, вордӥськем Глазов палъёсыз но городлэн лултэм дуннеез сярысь.

http://minkultura.udmurt.ru

Александр Кузьмичлэн поръян интыез «пичи» — Удмуртия, нош дуннеез арысь аре паськыта.

Александр Кузьмич поттӥз 4 книга — «Три цвета» (2005-тӥ ар) но «Возвращение на Иднакар» (2008-тӥ ар) кылбур бичетъёс, «Музыка для города» (2016-тӥ ар) но «Огранка. Записки россиянина» (2017-тӥ ар) веросъёсын бичетъёс. Берпуметӥ книгаез понна писатель туэ Удмуртиысь Правительстволэсь литературной премизэ басьтӥз.

Александр Кузьмичлэн поръян интыез «пичи» — Удмуртия, нош дуннеез арысь аре паськыта. Кызьы вера ачиз автор, кылбур бичетъёсын ӝутэм темаос, учыръёс паськытамын веросъёсаз. Автор улэ туж узыр улонэн, котькуд учырез сюлэм пыртӥз поттэ.

«Музыка для города» но «Огранка. Записки россиянина» прозаен книгаос вискын бадӟым гу. Берло гожтэмез — лэчыт, публицистической. Нош ны-рысетӥез…

— Писатель Антон Чехов шуиз: зол сузяд ке, котькуд книга сьӧрысь потоз авторлэн ымнырыз, — вера Ижысь «Суть» литературной клубен кивалтӥсь Т. Дмитриева. — «Музыка для города» книга сюлэмысь поттэмын, отысь шедьтыны луоз авторлэсь мылкыдъёссэ. Книга бордаз кутэ, со туж мур, гожтэмын традиционной чебер кылын. Со улон, огшоры адямилэн малпанъёсыз сярысь. Герой, трос пӧртэм мылкыдъёсты ас пыртӥз поттыса, кужмоя.

Зэм но! Одӥг веросын герой-рассказчик Оля нылкышноез кышно вае. Оля — секытэн. Тани герой Оля вӧзын пуке. Со пушкын пӧртэм мылкыдъёс бугыръясько: солэн уг поты вал та кышномуртэн кузпалъяськемез, чупамез гинэ но уг поты… Мукет веросын валтӥсь геройлэн яратонэз ошиське. «Музыка для города» книгаын трос таӵе ӝож мылкыдъёс, пурысь суредъёс, ортчемезлэсь мӧзмон. Но югдур воштӥське, действие геройлэн ужан интыяз ортче ке. Татын адӟиське, кызьы герой улыны, адямиосты гажаны дышетске.

Дунне котькыӵе паськыт мед луоз, котькыӵе мылкыдъёс мед сюлэмез портозы, но лул куке но буйга, улон пумын кыстӥське вордӥськем палъёсаз. «Возвращение на Иднакар» кылбур бичетын лирической герой утча аслэсьтыз философизэ. Шедьтэ сое тӧдьы Иднакарысь. Та тема — дорез шедьтон — азинтӥське берпуметӥ «Огранки. Записки россиянина» книгаяз но. Озьыен, герой шедьтэ аслэсьтыз кӧкызэ.

Мария Векшина

Туспуктэм: minkultura.udmurt.ru

Удмурт Дунне
By Удмурт Дунне Декабрь 20, 2017 10:16