Гурт адями-2017: Пичи Пурга ёросысь Аксакшурысь Людмила Баранова

Удмурт Дунне
By Удмурт Дунне Декабрь 30, 2017 16:58
снигирёва

Пичи Пурга ёросысь Аксакшурысь Л. Баранова.

Данъяськиськом Пичи Пурга ёросысь Аксакшурысь Людмила Барановаен. Со быдэс улонзэ визьнодан удыслы сӥзиз. Тыршемез пусъемын «Россиысь дышетон удысысь дано ужась» нимын, ужысь ветеран луэ, «Пичи Пурга ёрослэн нылыз» ним сётэмын.

Людмила Павловна Баранова вордӥськиз но будӥз Пичи Пурга ёросысь Аксакшур гуртын. 4 сузэръёс но вынзы котьку тупаса улӥзы, али ке но соос понна вормонтэмез ӧвӧл — ваньзэ вемеен быдэсто. Людмила, Сарапулысь педучилищеез йылпумъяса, Глазовысь пединститутын тодон-валанзэ азинтӥз. Нялтас гуртысьтымы ик нылпи садын визьнодась луыса ужаны кутскиз. Шудзэ кыдёкын утчаса ӧз улы, бызиз асьме гуртысь ик пияшлы, вордӥзы 3 пиоссэс, выль юрт пуктӥзы. Ми, гуртоос, али ке но шумпотӥськом, адӟем карымон нылкышно Аксаке ик кылиз шуыса.

Нылпи садын ужаны кутскыкуз, туж кельше вылэм солы нылпиослэсь шенгыль-пенгыль вераськемзэс магнитофонэ гожъяны. Пиналъёсын ужаны быгатэм сяна, Людмила Павловна гожъяськыны но усто пӧрмытылӥз.  Аксакысь гажано адямиос, арлыдоос, ас удысазы данэ потэм муртъёс сярысь гожтэмъёссэ ёрос но элькун газетъёсысь адӟыны луылӥз. Нылкышно ноку тэк пуконэз ӧз валалля. Удмуртлыкез гажан солэн вираз пыӵамын, шуыны луоз. Нылпиосты анай кылзэс яратыны, дунъяны дышетылӥз. Со ик нылпи садын удмурт сям-йылолъёсты улӟытонлы муг луиз. Сцена вылын нылпиосын герӟаськем сям-йылолъёсъя сценкаос пуктылыны ӧдъязы. Ортчытъям ужрадъёссы сярысь элькунысь газет-журналъёсы печатлазы.

Гижысь-пиньысь ужамзэ адӟыса, солы огвакытэ ӵектӥзы Яган-Докъя гурт котырысь нылпи садъёслы кивалтӥсь луыны. Соку ёросамы нылпи садъёслэсь кустовой огазеяськонъёссэс кылдытъяны кутскизы. Со вакытэ садъёс одӥг семья сямен улӥзы — вань ужрадъёссэс ӵош ортчытъязы.

Людмила Павловна котьку ӟеч кусып возьылӥз «Вордскем кыл» журналэн. Отчы кӧняез сценариосыз поттэмын ни. Солэн ужъёсызъя ми но, клубын ужасьёс, асьме ужрадъёсмес ортчытъяськом. Тани алигес Баграш-Бигра гуртын «Дэмен шулдыр» ёрос конкурс ортчиз. Отын ми возьматӥмы Л. Барановалэсь «Палэзян» композицизэ. Оло, сыӵе сюлмо но кылзэс гажась адямиослы луыса гуртысьтымы пичиос куспазы удмурт сямен верасько. Мукет гуртысь адямиослэсь кылӥськомы, нылпиоссы ӟучомо шуыса. Гуртысь клубамы но фольклоръя «Вуюись» кружоке покчи классъёсысь дышетскисьёс мыло-кыдо пырисько. Малпасько, со нылпи садын ужасьёслэн удмуртлыкез пичиос пӧлын вӧлмытон понна зол ужамзылэн  емышез.

Людмила Павловнаез тэк пукисен ноку адӟылэме ӧвӧл: я со нылпиос котырын, я сад-бакчаяз, я киуж сьӧрын.  Солы 2005-тӥ арын «Россиысь дышетон удысысь дано ужась» ним сётӥзы. Нош ар ортчыса, ужысь ветеран луиз. 2012-тӥ арын кузпалыныз валче адӟем карымон нылпиоссэс будэтэмзы понна солы «Пичи Пурга ёрослэн нылыз» ним сётӥзы. Табере 4 яратоно нунокъёссы будо ни. Нош кылем арын Людмила Павловна пыриськиз ёросын ортчем «Зарни песянай» вожвылъяськонэ.

Людмила Павловна арлыдызъя пенсиын ке но ини, нылпиослэсь люкиськыны уг ӵыды. Гань-гань улэме уг поты ай, быгатэмея пӧртэм ужрадъёсы пыриськисько, шуэ со. Аксакысь нылпи садын проект лэсьтонэн выре. Нылпи садын ужатозяз, кӧня куронъёс, программаос выльдӥськизы, одӥгез гинэ уз воштӥськы — пиналэз гажан, яратон, сюлэм шунытэз сётыса ужан. Со ик луэ йӧно но ӟеч сямо кивоштӥсьёсты будэтонлэн инъетэз.

Нылпиос но бадӟымъёс понна сюлмысь тыршемзэ пусйыса, дэмламе потэ Людмила Барановаез «Гурт адями» конкурслэн «Ӟеч сюлэм» номинацияз.

Ольга Буранова,

 Пичи Пурга ёросысь

Аксакшур гуртысь клубын ужась

Туспуктӥз А. Снигирёва

 

 

Удмурт Дунне
By Удмурт Дунне Декабрь 30, 2017 16:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*