Географической диктантысь Удмурт шаер сярысь юанъёс

Удмурт Дунне
By Удмурт Дунне Декабрь 4, 2017 09:21

Географической диктантысь Удмурт шаер сярысь юанъёс

1. Вашкала дырысен удмуртъёс муысь пӧртэм узырлык поттылӥзы но соослэсь буёлъёс лэсьтылӥзы. Вожзэ лэсьтыны басьтылӥзы та минераллэсь. Удмуртиын но Пермь улосъёсын сое трос шедьтыло. Минераллы ним сётэмын 1812-тӥ арысь геройлэн нимызъя. Вералэ со минералэз.

2. Удмуртия мувӧй поттэмезъя (2 процент), Россиын 13-тӥ интыын. Асьме дорын 115 мувӧй кыскон интыос. Нырысетӥез месторождение — Вятской — 1955-тӥ арын усьтэмын. Но 1962-тӥ — 1966-тӥ аръёсы эшшо 7 бадӟым мувӧй интыос усьтэмын вал. Верало одӥгзэ ке но соос пӧлысь.

3. 1960-тӥ арын Ижын ужаны кутскиз корт ӵыжатон завод. Нош 1870-тӥ арын отын лэсьтыны кутско сое, мар Ижез быдэс дуннелы тодмо кариз. Мар поттыны кутске завод?

4. 2001-тӥ арын Удмуртиын тылобурдоосты эскеронъя нимысьтыз 6 инты кылдытэмын вал, 5-эз калыккуспо лыдъяське. Ваньмыз соос тылобурдоослэн лымшоре лобӟон сюрес вылазы интыяськемын, бурдоос отын пи поттоно. Кудӥз соос пӧлысь чорыг вордонъя хозяйствоен лыдъяське. Отын 47 тыметэз вань, 159 пумо бурдоос уло, 16-сэ соос пӧлысь нимысьтыз утёно.

5. Ваньмызылы тодмо, дыр, та чуръёс:

Бен, Волга но Каматэк уз лу чебер,

Волгамытэк нош Кама но ӧвӧл.

Россиятэк ӧвӧл Удмурт шаер,

Нош мон понна

Удмуртитэк Россия но ӧвӧл.

Сое калыкын Удмуртилэн кыкетӥ гимнэз шуо на. Кин гожтӥз та чуръёсты?

6. Кыӵе вуз поттон огазея Эгра ёросысь Факелэз но Можга городэз? Азьвыл таос борды ватсаны луысал на Красногорск ёросысь Валамаз черкогуртэз но.

7. Та чорыгъёс 5-тӥ категориысь — выльдыны луоно но выльдӥськись видъёс пӧлын, пыртэмын Горд книгае. 1950-тӥ-1970-тӥ аръёсы Кама шурысь соос быро ини вал, но 1990-тӥ арын лыдзы будыны ӧдъяз. Та лулос осётр выллем чорыгъёс пӧлысь векчиез. Асьме дорын пумиськылэ Кама, Белая, Вятка, Чепца, Иж, Кильмезь, Вала, Буй, Сива, Нылга шуръёсын. Та «эксэй» чорыгез трос кутылы лэземын ӧвӧл. Кыӵе чорыг сярысь вераське?

8. Болгуры, Байгурезь, минерал сюйёсын Юськи гурт, Вала шурлэн кутсконэз, Пышкетской парк, Кузёбайысь торф поттон инты, Михайловской гурт вӧзы нюрмульы будон инты, Заякиноын кедр арама. Мар огазея ваньзэ та объектъёсты, кызьы соосыз ниманы луоно.

9. Та пӧйшур Удмуртиын 19-тӥ даурын быдэс быдтэмын вал. Но 1947-тӥ-1973-тӥ арын солэсь лыдзэ будэтон понна трос сюлмаськизы. Туала вакытэ пӧйшур асьме шаерамы зол вӧлмиз ни али лыдыз 22 сюрс 500 котыр лыдъяське. Соослэн нимаз хозяйствоослы, фермеръёслы, изъян ваё нюлэс но сюрес хозяйствоослы.

10. Удмуртиын трос выжы калыкъёс асьсэлэсь дорзэс шедьтӥзы. Одӥгезлэн соос пӧлысь нимаз автономиез вань. Со калык асьме дорын гуртъёсын-гуртъёсын улэ. Удмуртъёслы матын луись калыкез ӵемгес пумитаны луэ лымшор ёросъёсын, уката ик Грак но Каракулино палъёсын. Вералэ со калыкез.

11. Удмуртилэн Сьӧд книгаез поттэмын 2016-тӥ арын. Отчы пыртэмын дорамы палэнысь вуэм будосъёс. Соос, асьме турын-куаръёс пӧлы шедьыса, асьме будосъёслы вӧлмыны люкето, куд-ог учыръёсы экономикалы изъян ваё, адямилэн тазалыкезлы кышкытлык кылдыто. Удмуртиын вӧлмем сыӵе аляк будосъёс пӧлы пыртэмын 5-ез. Вералэ одӥгзэ ке но.

12. Та ёросэз гурезё-нюко интыосыз понна калыкын удмурт Швейцария нимало. Ёрос центразы вуриськон предприятизы вань. Татын ик Тол бабайлэн резиденциез но. Нималэ со ёросэз.

13. Та шурысь ву Удмуртиын тужгес умоен лыдъяське. Ярдур котыраз улыг интыос, нюлэсъёс пумиськыло. Шаерамы но артысь Киров улосын, кытчы вуоссэ вуттэ та шур, матаз кырсёмытӥсь предприятиос ӧвӧл. Нималэ со шурез.

14.19-тӥ даурлэн пумаз Удмуртиын ссылкаын улӥз тодмо ӟуч писатель. Солэн нимыз понэмын Кизнер ёросысь одӥгез гуртлы. Отын ик солы синпелет пуктэмын. Та воргорон адямиез курбон сёто шуыса янгыше уськытэм удмуртъёслы пумит ӝутэм ужез сэрттыны юрттӥз. Удмуртъёс шонере поттэмын вал. Вералэс со адямиез.

15. Берло 20 ар ӵоже таос Ижысь омырез 1,2 поллы кырсёмытӥзы. Омырез вань сӧрисьёс пӧлысь таосыз 75-85 процент басьто. Таӵегес ик югдур тупа тросэзлы бадӟым городъёслы. Мар сярысь вераське юанын?

16. 18-тӥ даурлэн кутсконаз Удмуртия быдэс нюлэсэн шобыртэмын вал. Заводъёс кылдэмен тэльёс пумен сӥнизы. Тазьы вал 1950-тӥ аръёс дорозь. Али нюлэсъёс будо нюлэс хозяйствоос пиоспуос мерттэмлы, колхоз бусыос тэлен басьтэмлы луыса.

Туала вакытэ нюлэсъёс Удмуртилэсь кӧня процент территоризэ басьто?

17. Та писпу шаерамы трос вӧлмемын ӧвӧл, ӵемгес пумиськылэ лымшор ёросъёсын. Нош кулэлыкез солэн бадӟым: со бордысь мушъёс мӧль бичало, со кутӥське киужъёс лэсьтонэ, азьвыл солэсь тусьты-пуньы, пыдкук пӧрмытъязы. Та писпулэсь удмурт но ӟуч нимзэ пумитаны луэ гуртъёслэн нимъёсысьтыз.

18. «Усть-Бельск» инкуазь парк 2001-тӥ арын кылдытэмын. Со нимысьтыз утёно интыен лыдъяське. Пуксемын нюлэсъёс но возьёс вискы. Татын вӧлмемын возьёс но паськыт куаро писпуос. Кыӵе ёросын но кыӵе шур дурын интыяськемын та инкуазь парк?

19. 1940-тӥ аръёслэн пумаз Камбаркаын кышкыт веществоосты возёнъя складъёс ӝутыны ӧдъязы. Берло татчы ваизы 6 сюрс 349 тонна мышъяк выллем веществоез. Со ку вылын яраос кылдытэ но урӟектытэ. 2006-тӥ — 2009-тӥ аръёсы кышкыт сурет быдэс быдтэмын вал. Кыӵе вещество сярысь вераське?

20. 1836-тӥ-1848-тӥ аръёсы Воткаысь заводэн кивалтӥз быгатӥсь инженер. Солы луыса заводын пыӵазы анданэз ӵыжатонъя выль технологиос, Россиын нырысьсэ мытэмын вал пароходъёслэсь корпусъёссэс кортлэсь лэсьтон. Зэм, дуннеын тросгес тодо солэсь пизэ, асьме дорын вордӥськем муртэз. Вералэ со инженерез.

Удмурт Дунне
By Удмурт Дунне Декабрь 4, 2017 09:21