Географической диктантэз гожтӥзы 11 интыын

Удмурт Дунне
By Удмурт Дунне Декабрь 4, 2017 09:00

Кылем арнянуналэ быдэс Россия географической диктант гожтӥз. Ужрад борды итӥськиз Удмуртия но. Туэ асьме дорын сое 11 интыын гожтӥзы.

230-лэсь ятыр адями люкаськиз Удмурт кун университетэ.

230-лэсь ятыр адями люкаськиз Удмурт кун университетэ. Визьзэс сынаны мылкыд кариллям пичиос но бадӟымъёс. Но тужгес трос вал школаын дышетскисьёс, соос быдэс классъёсынызы диктантэ пыриськизы.

Диктант Россиын 3-тӥ арзэ радъяське ни, сое ортчытыны кичӧлтонэн потӥз вал Россилэн Президентэз Владимир Путин. Радъялля сое Россиысь Географияя общество. Арысь аре визьзэс эскерыны мылкыд карисьёс тросгес но тросгес луо. Зэм, кылем арын диктант гожтӥсьёслэсь тодон-валанзэс, быдэс кунъя учконо ке, «3»-лы гинэ дунъяны луэ вал: 100 пӧлысь шоро-куспо люкам балл 52 люкаськиз.

Диктант географиез шоро-куспо тодӥсь адямилы чакламын, — вераз Россиысь Географияя обществолэн Удмуртиысь ёзэныз киалтӥсь, УдГУ-ысь профессор Иван Рысин. — Калык тодыны кулэ, кытын интыяськемын соиз яке таиз гурезь, шур, улос. Учке ай, США-ысь бадӟым политикъёс сурало, кытын Австрия но Австралия, со быдэс кунзылэсь данзэ сапта ук.

Туэ чузъяськизы 30 юанъёс. Соос 3 люкетлы висъямын вал. Нырысетӥяз географической терминъёсты тодоно, кыкетӥяз картаен ужаны быгатоно, нош 3-тӥяз интыосты, городъёсты, шуръёсты путешественникъёслэн гожъямысьтызы яке чеберлыко произведениосысь люкетъёсъя тодмано.

Кӧня баллы гожтэмын диктант, тодмо луоз 25-тӥ декабрь бере Россиысь Географической обществолэн сайтысьтыз.

Асьме тодосчиос дасязы Удмурт шаерен герӟаськем нимаз визь сынан. Ӵектӥськом тӥледлы  юанъёсын тодматскыны:

Географической диктантысь Удмурт шаер сярысь юанъёс

Ангелина Снигирёва

Удмурт Дунне
By Удмурт Дунне Декабрь 4, 2017 09:00