Елена Ведерникова: Луо но луло луэ

Удмурт Дунне
By Удмурт Дунне Декабрь 25, 2017 13:16

Елена дуннеысь луоен суредаськисьёслэн «Прикосновение» фестивалязы гран-при басьтӥз.

Елена Ведерникова буёлъёсын уг выры ке но, Ижысь огез аспӧртэмлыкоез художник. Егит анай пуш малпанъёссэ усьтэ… луоен суредаськыса. Та быгатонлыкез нокинлэсь но сюлэмзэ вырӟытытэк уг кельты. Туэ Елена дуннеысь луоен суредаськисьёслэн «Прикосновение» фестивалязы гран-при басьтӥз.

— Елена, малы одно луо? Мукет суредаськисьёслэсь висъяськемды потӥз?

— Сямы, вылды, сыӵе. Буёлъёс, кисточкаос монэ бордазы сокем юн уг кыско. Чиньыосы суредъёс мед кылдытозы кадь потэ. Нырысь-валысь пластилинэн вырылӥ, соосын мультфильмъёс дасялляй. Та бӧрсьы монэным учыр кемдӥз. Ижысь одӥгаз огазеяськонын валтӥсь дизайнер луыса ужасько вал. Ӵектӥзы Москвае выжыны. Отысен луонлык кылдӥз Искусствоосъя европейской школаын 3 толэзь дышетскыны. Бырйи шаерамы шер пумиськылӥсь творчество удысэз — луоен суредаськонэз.

Удалтэ мыным ӟеч, быгатӥсь адямиосын. Москваын тодматски 7bioz творчествоя объединениен. Татын пичильтык ужаса, ӧтизы Александр Амировлэн видеомонтажъя студияз. Амиров 2012-тӥ арын Россиысь тужгес устоез монтажёр лыдъямын вал. Со вӧзын быгатонлыке воксё воляз. Озьы та удысын коньы сямен берганы кутски: нуназе фильмъёслы монтаж лэсьтӥсько, ӝытъёсы луоен шоу возьматӥсько, уйин мультфильмъёслы пластилинлэсь декорациос ныркисько.

— Кызьы нылпиосын ужаны дырды кыльылӥз на?

— Интернатъёсысь висись пиналъёс котырын берганы мыным верантэм зол кельшылӥз. Малы ке шуоно пиналъёс луоен суредаськон пушкы сыӵе зол выё — возьдаськисез кепыр ваёнзэ вунэтэ, лӧптылӥсез шыпыта, пӧрмостэмез ас бордаз ужаны кутске. Суредзы уг пӧрмы но зар-зар бӧрдыны кутско. Соку вешатэк, ӟыгыртытэк одӥг пиналэз но бордысьтым ӧй лэзьялля.

— Та бӧрсьы асьтэос но анай луиды. Иже берытскиды. Пиды ик, оло, мылкыд сётӥз «Прикосновение» конкурсэ пыриськыны, отчы «Знание» уждэс кылдытыны?

— Та конкурс Днепр городын ортчылэ, туэ 5-тӥзэ радъяськиз. Отчы быдэс дуннеысь суредаськисьёс ужъёссэс ысъяло. Зэмзэ вераса, фестивале, оло, пыриськыны ӧй дӥсьтысал. Но талэсь азьвылгес суредъёсыным книгае потӥз, учкисьёс солы ӟеч дунъет сётӥзы. Озьы кужымелы, быгатонлыкелы осконэ юнмаз — ужме конкурсэ ыстӥ. Вормеме сярысь ивортэмзы бере лӧптӥ но, пайми но. Угось отчы 41 зол ужъёс келямын вал. Малпасько, нырысетӥ луыны юрттӥз пие но. Со ӟеч малпан сётӥз, нош та удысын идея — валтӥсез. Ӵапак та бордысен уж кутске.

1 суредлы ог 2 килограмм луо кошке, спектакльёслы — тросгес.

«Знание» суредэ сӥземын вож нунылы. Тодосчиос верало, соос, пе, бадӟымъёс сямен ик, анайлэн кӧт пушказ чебересь уйвӧтъёс адӟыло. Со уйвӧтъёсты мон возьматӥ луо пыр. Та сяна, отчы ватсай Коранлы сӥзем ужъёсме. Ваньзэ ачим дасяй: суредай, видеоплёнка вылэ гожтӥ, монтаж кари. Но жаляса верано, Днепре фестивале вуылыны ӧз кылды. Пие, лемтэй куртчиськыса, висьыны усиз. Шуг-секытъёс кылдӥзы на Украинае потон ласянь но. Али малпасько: макем умой луонлык вылэм выль суредаськисьёсын тодматскыны, соослэсь ужан амалъёссэс асэстыны!

— Берло дыре Россиын но, Удмуртиын но луоен суредаськон паськыт вӧлмемын. Тае валаны луэ тӥя но — мультфильмъёс сяна, клипъёс, концертъёс вылысьтыз вылаз дасяськоды. Озьыен, учкисьлы со тунсыко!

— Зэм. Октябрь пумын Ижысь ляб кылӥсь пиналъёслэн школазы вордӥськем нуналзэ пусъе. Отын мон ужъёсме возьмато. Ноябре Санкт-Петербурге дасяськисько — театръёслэн фестивалязы крезьгур чузъяськем улсын суредасько. Та сяна, йылаз-пумаз вуттӥсько ини выль мультфильмме, 2 книгалы дасям суредъёсме. Кусып возисько «Молчи и танцуй» театрен. Крезьгур улсын пиос экто, нош экран вылын мынам ужъёсы возьматӥсько. Озьы суред, куара, выросъёс огазеясько. Ваньзэ тае адӟыса, мугор юзыр-кезьыр луэ.

— Калык азьын суредаськыкуды, котьку-а ужъёсты вольыт пӧрмо?

— 7 арлэсь ятыр суредаськисько ини. Но та ласянь сюлмаськонэ пушкысьтым уг кошкылы, тужгес но — бадӟым ужрадэ пыриськыны ӧтьыкузы. Киос куалекъяку, ужаны туж секыт. Соин ик, Москваын улыкум ай, представлениос вискын ульчае огшап шоканы поталлясько вал.

Уг вунэтӥськы ини Крокус Холлын суредаськемме. Сюрслэсь ятыр синъёс экран пыр ужамме пыр-пыр учко, ай куное ӧтемын «Браво» группа. Кышканме ог 40 секунд вормыны ӧй быгаты. Кивалтӥсе шуиз, киосыдлэн куалекъямзы, пе, зол валаськиз. Но собере ини асме кутӥ, ӧраз пыри.

— Одӥг ужез дасян понна кӧня луо кулэ? Суред макем ӝог кылдэ?

— 1 суредлы ог 2 килограмм луо кошке, спектакльёслы — тросгес. Таосаз куддыр пӧртэм буёлооссэ кутӥсько. Луоез бырйисько сюлэмы, чиньыосы куремъя. Мынам соос дуннелэн пӧртэм сэрегъёсысьтыз вуттэмын. Вань Кам шур котырысь, Алтай палъёсысь, али Крымысь луоен ужасько. Одӥгъёсыз тазаесь, мукетъёсыз векчиесь. Кудӥз ке бичамын, зарезь зыл-зыл кылльыку, кудӥз ке — тулкымъёс шуэръяськыку. Соосты котьку ик ачим уг октӥськы. Я эшъёсы, я учкисьёс ваё, почта пыр келяло.

Огпол вал учыр — луое быриз, нош учкисьёс суредъёсме витё. Амалтэк тылпуэз кысонлы дасям песокез ящикысь поттоно луи. Нош отын маиз но ӧвӧл — сьӧд сюез, кӧльыез, куасьмем турын-куарез…

Дыр ласянь ке — котькудӥз пӧртэм сямен кылдэ. Кылсярысь, 5-7 минутъем ролик дасяй вал. Та бордын 3 толэзь выри, котькуд нунал 16 час суредаськыса пукылӥ.

— Макем кӧт пӧсь кыле, вылды, тамында курадӟыса, сое ӵушылыны!

— Талэсь нокытчы но уд пыры. Соин ик ужъёсме туспуктылӥсько яке видео вылэ гожтӥсько.

Ольга Корепанова

Удмурт Дунне
By Удмурт Дунне Декабрь 25, 2017 13:16